मनसेत सभापतीपदासाठी रस्सीखेच म. टा. खास प्रतिनिधी,नाशिक
महापालिकेच्या स्थायी समितीच्या आठ सदस्यांची मुदत २९ फेब्रुवारी रोजी पूर्ण होत असून रिक्त जागांवर संधी मिळावी यासाठी सदस्यांची धावपळ सुरू झाली आहे. मनसे, राष्ट्रवादी, शिवसेना आणि काँग्रेसने वंचितांना संधी देण्याच्या मनस्थितीत असले तरी सर्वपक्षीय वजनदार पदाधिकाऱ्यांना स्थायीचे वेध लागले आहे. सभापतीपद मनसेला जाणार असल्याने पक्षात रस्सीखेच सुरू झाली आहे. या पदासाठी मनसे मराठा व महिला असे एकत्रित कार्ड खेळण्याच्या तयारीत आहे.
स्थायी समितीच्या नव्या सदस्यांच्या निवडीसाठी शुक्रवारी (दि. २६) महासभेची विशेष सभा होणार आहे. भाजपच्या रंजना भानसी, कुणाल वाघ, आरपीआयच्या ललिता भालेराव, अपक्ष गटाच्या रशीदा शेख, काँग्रेसचे राहुल दिवे, मनसेच्या सुरेखा भोसले, शिवसेनेचे शैलेश ढगे, शोभा फडोळ अशी निवृत्त सदस्यांची नावे आहेत. त्यामुळे या रिकाम्या होणाऱ्या जागांसाठी नगरसेवकांनी मोर्चेबांधणीला सुरुवात केली आहे. या आठ सदस्यांसह सर्वांना संधी या उद्देशाने उर्वरित सदस्यांचेही राजीनामे घेण्याचा विचार पक्षांतर्फे सुरू आहे. त्यामुळे जवळपास १५ सदस्य स्थायीमध्ये नव्याने येवू शकत असले तरी, प्रथम आठ सदस्यांची निवड केली जाणार आहे.
सभापतीपद मनसेकडे जाणार असल्याचे निश्चित आहे. त्यामुळे मनसेत सदस्यपदासह सभापती पदाची एकत्रित फिल्डींग लावली आहे. मनसेत सुरेखा भोसले, यशवंत निकुळे, सलिम शेख, शशिकांत जाधव, अशोक सातभाई, अनिल मटाले, रुची कुंभारकर, गुलजार कोकणी अशी बड्या इच्छुकांची नावे आहेत. विशेषता महापौर पदाच्या शर्यतीत असलेल्या इच्छुकांनी आता स्थायीसाठी फिल्डींग लावली आहे. यासोबतच आतापर्यंत पदे न मिळालेल्या नगरसेवकांनीही स्थायीत जाण्यासाठी जोर लावला आहे. त्यामुळे मनसेत रस्सीखेच वाढली आहे. सभापतीपदासाठी मनसेत सुरेखा भोसले, सलिम शेख, यशवंत निकुळे यांच्यात स्पर्धा आहे. मात्र, मनसे मराठा किंवा मुस्लिम कार्ड खेळण्याची शक्यता आहे. महापौर पदावेळेस मराठा समाजावर अन्याय झाल्याची भावना आहे. त्यामुळे मनसेतर्फे महिला व मराठा उमेदवार म्हणून सुरेखा भोसले यांचे नाव पुढे केले जाण्याची शक्यता आहे.
शिवसेनेतही हेवीवेट पदाधिकाऱ्यांनी स्थायीत जाण्यासाठी तयारी दर्शवली आहे. हर्षा बडगुजर, विनायक पांडे यांच्यासह कल्पना पांडे, उत्तम दोंदे, मंगला आढाव यांनी इच्छा व्यक्त केली आहे. पक्षाच्या वतीने त्यांची नावे पक्षश्रेष्ठींकडे पाठविण्यात आली आहेत. तर राष्ट्रवादीनेही सदस्यांना कायम ठेवायचे की राजीनामे घ्यायचे याचा निर्णय घेतला नाही. तरीही दुसऱ्या वर्षासाठी वर्तमान सभापती शिवाजी चुंभळे यांच्यासह रंजना पवार इच्छुक आहेत. तर काँग्रेसच्या एकमेव रिक्त जागेसाठी गटनेते शाहू खैरे इच्छुक आहेत. सोबतच अपक्ष गटाच्या वतीने संजय चव्हाण यांनी इच्छा व्यक्त केली आहे. वंचित की बडे नेते यापैकी कुणाला संधी द्यायची अशा पेचात पक्ष सापडला आहेत.
स्थायी सभापतीपदी मराठा की मुस्लिम?
महापौर‍पद शर्यतीत मराठा उमेदरावारांना पक्षातर्फे डावलण्यात आले होते. त्यामुळे मनसेमध्ये अस्वस्थता आहे. सोबतच गेल्यावेळी मराठा उमेदरावांसह मुस्लिम समाजाच्या वतीने सलिम शेख महापौरपदाच्या शर्यतीत होते. मात्र त्यांनाही संधी मिळाली नाही. पुढील वर्षी महापालिका निवडणूक आहेत. त्यामुळे या दोन्ही समाजाची भूमिका महत्त्वाची राहणार आहे. त्यामुळे मराठा किंवा मुस्लिम समाजाला सभापतीपदाची संधी देण्याचा विचार पक्षातर्फे केला जात आहे.
सोमवारी राज दरबार
स्थायी समिती सभापती पदावर चर्चा करण्यासाठी मनसे अध्यक्ष राज ठाकरे यांनी सोमवारी (दि. २९) मनसे पदाधिकारी व इच्छुकांना मुंबईत पाचारण करण्यात आले आहे. या बैठकीत सभापतीपदाची संधी कोणाला द्यायची याचा फैसला केला जाणार आहे. बड्या पदाधिकाऱ्यांशी चर्चा करून सभापतीपदाचा नावावर शिक्कामोर्तब केले जाणार आहे.
मोबाइल अॅप डाउनलोड करा आणि राहा अपडेट
