हजार ढोलांचे वादन नाशिक : ढोलताशाच्या गजरात नवीन वर्षाचं स्वागत करण्यात आले. गोदावी घाटावरील मंदिरावर रोषणाई करण्यात आली. नववर्षाच्या स्वागतासाठी संस्कृती संवर्धन मंडळातर्फे १ हजार ढोलांचे वादन करण्यात आले. मिरवणुकीत ढोल ताशे, लेझीम, पारंपरिक मर्दीनी खेळ इत्यादींचा समावेश होता.
चैत्राची सुरवात ज्या दिवसाने होते तो दिवस म्हणजे पाडवा. प्रत्येक हिंदूच्या दृष्टीने महत्त्वाच्या असलेल्या दिवसापासून रामाचे नवरात्र सुरू होते ते रामनवमीला संपते. हा साडेतीन मुहूर्तापैकी एक मानला जातो. हिंदू नववर्ष आणि पाडव्याचे औचित्य साधून रामनवमीच्या उत्सावाला पाडव्यापासून सुरुवात झाली. यावेळी काळाराम मंदिरात विशेष पूजा झाली. यावेळी महंत सुधीरदास पुजारी व विश्वस्त अॅड. अजय निकम सहभागी झाले. कपालेश्वर मंदिरात सकाळी अभिषेक घालत नवे वर्ष सुख समृद्धी आणि भरभराटीचे जावे अशी प्रार्थना करण्यात आली.
गंगापूर रोडला स्वागतयात्रेचा जल्लोष नाशिक : डोंबिवली, पुणे शहरांप्रमाणेच नाशिक येथील हिंदू नववर्ष स्वागत यात्रांनी एक वेगळेच आकर्षण निर्माण केले आहे. या स्वागत यात्रांमधून परंपरा जपतानाच सांस्कृतिक कार्यक्रमांचेही जतन करण्याचा प्रयत्न होताना दिसत आहे. नाशिकमध्ये सर्वप्रथम एकाच परिसरातून सुरू झालेली हिंदू नववर्ष स्वागत यात्रा आता शहराच्या विविध भागांतून निघू लागल्या असून या यात्रांमधील नागरिकांचा सहभाग दिवसेंदिवस वाढू लागला आहे. कार्यकर्त्यांच्या अथक प्रयत्नातून किमान तीन महिने आधीपासून तयारी केलेली स्वागत यात्रा गंगापूर रोड येथून जाताना हर्षोल्हास देऊन गेली. लहान मुलांपासून ते वृद्धांपर्यंत आयोजित विविध वेशभूषा स्पर्धा, रांगोळी स्पर्धा, सामूदायिक गुढी स्पर्धांनी ही यात्रा गाजली. यात्रेत लेझीम पथक, ढोल पथक तसेच फेटे घातलेले पुरुष-महिला, विविध वेशभूषा केलेले चिमुरडे यांचा सहभाग होता.
बीवायके कॉलेज येथे सकाळी १० वाजता यात्रेचा समारोप झाला. यावेळी प्रा. यशवंत पाठक यांचे व्याख्यान झाले. आमदार सीमा हिरे, महेश हिरे, भाजपचे माजी शहराध्यक्ष लक्ष्मण सावजी, सुरेश पाटील, किशोर विग यांची प्रमुख उपस्थिती होती. स्वागत यात्रांसाठी प्रकाश दीक्षित, विवेक पवार, सुहास करंदीकर, अशोक अमृतकर, अतुल देशपांडे, अजित कुलकर्णी तसेच वसुधा लगड यांनी यात्राप्रमुख म्हणून जबाबदारी पार पाडली. व्यसनमुक्तीचा संदेश पंचवटी : संस्कृती संवर्धन न्यास संचलित नववर्ष स्वागत समिती व प्रजापिता ब्रह्माकुमारी ईश्वरीय विश्व विद्यालयातर्फे पाडवा पहाट, शोभायात्रा व गुढी पूजन झाले. ब्रह्माकुमारी संस्थेतर्फे पंचवटी सेवा केंद्राच्या संचालिका राजयोगिनी पुष्पा दीदी यांच्या हस्ते गुढीपूजन झाले. संस्थेच्या राजयोग शिक्षिका पूनम दीदी, ब्रह्माकुमारी अनिता दीदी, स्वागत यात्रा समितीचे सदस्य सोमनाथ बोडके, दिगंबर धुमाळ, रुपेश पालकर आदी उपस्थित होते.
नागचौकात गुढी पूजनानंतर शोभायात्रा काट्यामारुती पोलिस चौकी, गजानन चौक, पाथरवट लेन, पंचवटी कारंजा, मखमलाबाद नाका, गंगाघाट या मार्गावरून आल्यानंतर भाजीबाजार मैदानावर समारोप करण्यात आला. तेथे व्यसनमुक्ती विषयावर नाटिका सादर करण्यात आली. तसेच बेटी बचाव आणि पाणीबचतीच्या घोषणा देण्यात आल्या.
देवळालीमध्ये विद्यार्थ्याचा उत्साह देवळाली कॅम्प : संसरीनाका येथील देवळाली प्लाझापासून शुभारंभ झालेल्या शोभा यात्रेस शीतलदास बालानी, वरिष्ठ पोलिस निरीक्षक राजेश आखाडे, मंगेश गुप्ता, दीपक बलकवडे, कैलास गायकवाड, भगवान कटारिया आदींच्या हस्ते श्रीफळ वाढवून मिरवणुकीचा शुभारंभ झाला. नूतन विद्यामंदिर, डॉ. गुजर सुभाष हायस्कूल विद्यार्थ्यांनी लेझीमचे सादरीकरण केले. टाळ मृदुंगाच्या गजरात विद्यार्थ्यांनी भजन सादर केले. मराठमोळ्या पेहरावातील महिला पथकातील फुगडी व विविध पारंपारिक खेळांनी देवळालीकरांचे लक्ष वेधले. मिरवणुकीत अग्रभागी देवदेवतांसह राष्ट्रपुरुष, स्वातंत्र्यसैनिकांची वेशभूषा केलेल्या विद्यार्थ्यांनी जिवंत देखाव्यांनी शोभायात्रेची शान व हिंदू संस्कृतीचे दर्शन घडविले. जीवन गायकवाड, नारायणदास चावला, प्रा. सुनिता आडके आदींनी आयोजक केले. शोभायात्रेस शिक्षण मंडळ भगूरचे कार्याध्यक्ष एकनाथ शेटे, नगरसेवक सचिन ठाकरे, भगवान कटारिया, आशा गोडसे, तानाजी करंजकर, दीपक बलकवडे आदी उपस्थित होते. कार्यक्रम यशस्वीतेसाठी संदीप गायकवाड, विशाल शिरसाठ, लक्ष्मण मुसळे, बाळकृष्ण घोलप, संतोष पिंपळे आदी प्रयत्नशील होते. शोभायात्रेचे देवळालीकरांनी रस्त्यावर ठिककिठकाणी आकर्षक रांगोळ्या रेखाटत स्वागत केले. जुन्या बस स्थानक येथे शोभायात्रेचा समारोप करण्यापूर्वी मान्यवरांच्या हस्ते गुढी उभारण्यात आली. शोभायात्रेत देवळालीकर पारंपारिक वेशभूषा करून सहभागी झाले होते.
पाणीबचत, आरोग्याची गुढी नाशिकरोड : राजसारथी प्रतिष्ठानचे अध्यक्ष रोहन देशपांडे आणि महालक्ष्मी मित्र मंडळाचे अध्यक्ष नरेंद्र आढाव यांच्या पुढाकाराने जेलरोडच्या छत्रपती शिवाजी महाराज चौकात नवसंकल्पाची ५१ फुट उंच गुढी उभारण्यात आली. छत्रपती शिवाजी महाराजांच्या पुतळ्यास पुष्पहार अर्पण करण्यात आला. नगरसेवक अशोक सातभाई, संभाजी मोरुस्कर, मनसेचे नेते विक्रम कदम, शिव प्रतिष्ठानचे शाम वाघ, उद्योजक धनंजय बेळे, महिला बँकेच्या संचालिका प्रेरणा बेळे प्रमुख पाहुणे होते. महिला सक्षमीकरण, हितसंबंध जोपासणे, योगसाधना, वाचन, अंधश्रद्धा निर्मूलन, पाणीबचत आदींचा संकल्प वकील, डॉक्टर, अभियंते, शिक्षक, कलाकार, ज्येष्ठ नागरिक, उद्योजक आदींच्या उपस्थितीत गुढी उभारण्यात आली.
भारत मातेचा जयघोष सिन्नर फाटा : भारत मातेचा जयघोष करीत नाशिकरोड शहरातून हिंदू नववर्ष समितीच्या वतीने शोभायात्रा काढण्यात आली. उपनगर पोलिस ठाण्याचे वरिष्ठ पोलिस निरिक्षक अशोक भगत यांच्या हस्ते गुढीचे पूजन झाले. शोभा यात्रेचे संयोजक उदय शेवतेकर, नाना पाटील, गोपाल लाल, अक्षय एडके, नगरसेवक संभाजी मोरुस्कर, आदींनी केले.
शोभायात्रेत ब्रह्मध्वजाची मिरवणूक काढण्यात आली. पारंपरिक मराठमोळ्या वेषात अश्वारुढ तरुणी, शिवरायांसह स्वामी विवेकानंद, राणी लक्ष्मीबाई, डॉ. बाबासाहेब आंबेडकर, लोकमान्य टिळक, महात्मा गांधी या थोर महापुरुषांच्या वेषभूषा व श्री मनकामेश्वर महादेव प्रतिष्ठाणचे ढोल पथकाने यावेळी सर्वांचे लक्ष वेधून घेतले. शोभा यात्रेत के. जे. मेहेता हायस्कूल, इस्कॉन यांनीही सहभाग घेतला. देवळाली गावातून प्रारंभ झालेली शोभायात्रा पुढे लिंगायत कॉलनी, गाडेकर मळा, दत्तमंदिर रोड, राजधानी चौक, आनंद नगर, जगताप मळा, दत्तमंदिर चौक, मोटवाणी रोड या मार्गे जावून पुरुषोत्तम हायस्कूल या शाळेच्या मैदानावर विसर्जित करण्यात आली. शोभायात्रेत सहभागी चित्ररथांनी पाणीबचत व स्त्रीभृणहत्या या विषयांवर संदेश दिला.
मनसेने उभारली महागुढी मनसेच्या वतीने शाळा क्रमांक १२५ जवळील राजधानी चौकात महागुढी उभारली. यावेळी नगरसेविका संगिता गायकवाड, अशोक सातभाई यांच्यासह हेमंत गायकवाड, प्रकाश कोरडे, शाम गोहाड, किशोर जाचक आदींसह कार्यकर्ते व नागरिक मोठ्या संख्येने उपस्थित होते. शंभुनाद ढोल पथकाच्या वादनाने नागरिकांना आकर्षित केले.
जेलरोडला शोभायात्रा तहकूब शिवसेनेचे ज्येष्ठ कार्यकर्ते बाळासाहेब गाडगीळ यांचे पाडव्याच्या पूर्वसंध्येला अचानक निधन झाल्याने जेलरोडला आयोजित नववर्षाची शोभायात्रा रद्द करण्यात आली. त्यामुळे या ठिकाणचे काही कार्यकर्त्यानी देवळाली गावातील शोभायात्रेमध्ये सहभाग घेतला.
सातपूरला तरुणाईचा जल्लोष सातपूर : नववर्षाचे स्वागत करण्यासाठी सातपूर कॉलनीत स्वागत यात्रा निघाली होती. जुनी कॉलनीतील इच्छामणी गणपती मंदिरावरून सकाळी ७ वाजता निघालेली स्वागत यात्रा मिरवणूक मुख्य रस्त्यांवरून फिरून पुन्हा गणपती मंदिरात आणण्यात आली. स्वागत यात्रे ढोल ताश्यांच्या पथकासह फेटे बांधलेले तरुण, लहान मुले, महिला तसेच भाजपाचे पदाधिकारी देखील सहभागी झाले होते. यात्रेचे आयोजन भाजप सातपूर मंडलचे अध्यक्ष राजेश दराडे यांनी केले.
जुने नाशिकमध्ये उत्साहात स्वागत जुने नाशिक : पाडव्यानिमित्ताने हिंदू एकता आंदोलन पक्षातर्फे सकाळी साडे सहा शोभायात्रा व धार्मिक सभेचे आयोजन करण्यात आले आहे. शहीद भगतसिंग चोक, श्री टेमब्लाई माता मंदिर, द्वारकापासून तर गंगा घाटपर्यंत शोभायात्रा काढण्यात आली. यावेळी रामसिंग बावरी, बाळासाहेब मोरे, प्रसाद बावरी, विजय पवार, दीपक अहिरे, करणसिंग बावरी, अशोक गांगुर्ड, अंकुश राऊत, उमेश चव्हाण आदी सहभागी झाले. शोभायात्रेमध्ये पाच मंडळांचे चित्ररथ सहभागी झाले.
मोबाइल अॅप डाउनलोड करा आणि राहा अपडेट
