म. टा. वृत्तसेवा, त्र्यंबकेश्वर
त्र्यंबकेश्वर मंदिराच्या गाभाऱ्यात महिलांना प्रवेश नको म्हणून पुरुष भाविकांनाच प्रवेश नाकारणाऱ्या देवस्थान ट्रस्टने आता महिलांना गाभाऱ्यात प्रवेश देण्याच्या उच्च न्यायालयाच्या निर्णयालाच सर्वोच्च न्यायालयात आव्हान देण्याचा निर्णय घेतला आहे. शनि शिंगणापूर येथील चौथरा महिलांना खुला झाल्यानंतर त्र्यंबकराजाचा गाभाराही सर्वांसाठी खुला होईल अशी अपेक्षा व्यक्त केली जात होती. मात्र, ग्रामस्थांनी मंदिर खुले करण्यास कडाडून विरोध केला आणि देवस्थाननेही त्यांचीच री ओढल्याने त्र्यंबकराजाचा गाभारा महिलांसाठी सध्यातरी बंदच राहणार आहे.
त्र्यंबकेश्वर मंदिराच्या गाभाऱ्यात महिलांना प्रवेश द्यायचा की नाही, यावर निर्णय घेण्यासाठी शनिवारी विश्वस्त मंडळाने ग्रामस्थांची सहविचार सभा आयोजित केली होती. या बैठकीस त्र्यंबकमधील सर्व समाजाच्या व्यक्तींना प्रातिनिधीक स्वरूपात निमंत्रित करण्यात आले होते. देवस्थान विश्वस्तांनी महिलांना प्रवेश देता येऊ नये यासाठी भेदाभेदाचा आरोप टाळण्यासाठी पुरुषांवरही बंदी घातल्याने संतापलेल्या ग्रामस्थांनी विश्वस्तांविरोधात मोर्चे काढले होते. प्रकरण अंगलट येणार हे लक्षात आल्यावर विश्वस्तांनी सहविचार सभा बोलावून ग्रामस्थांनीच निर्णय घ्यावा, अशी भूमिका घेतली. यावर बराच वेळ दोन्ही बाजूने चर्चा झाली.
नगरसेवक धनंजय तुंगार यांनी विश्वस्तांना धारेवर धरले. फुलनारळ बंदी, दिवसभर गाभाऱ्यात प्रवेश बंदी, पूर्व दरवाजा मंडप आणि काँक्रिटीकरण, २०० रुपयांचे पेड दर्शन असे अनेक निर्णय घेताना ग्रामस्थांना विचारले होते का, असा सवाल करून विश्वस्तांना घेरले. विश्वस्तांच्या मनमानी निर्णयामुळे त्र्यंबकेश्वरमधील अनेकांचा व्यवसाय बुडाला, त्याचा विकृत आनंद घेतला गेला. आता जबाबदारी टाळण्यासाठी ग्रामस्थांनी न्यायालयात जावे, अशी अपेक्षा कशी करता, असाही सवाल केला. त्यास उपस्थितांनी टाळ्यांच्या गजरात समर्थन दिले. विश्वस्तांना जबाबदारी सांभाळता येत नसेल तर पदाचा राजीनामा देवून बाहेर पडावे असे आवाहन केले आहे. याच बैठकीत पुरूषोत्तम लोहगावकर, मोहन झोले, प्रकाश दिवे, अनघा फडके, देवेंद्र कदम, अनंत पाचोरकर, शांताराम बागूल, लोकेश अकोलकर, प्रश़ांत गायधनी, माधुरी जोशी, मनोज काळे आदिंनी आपले विचार मांडले. यावेळी अनेकांनी सर्वोच्च न्यायालयात उच्च न्यायालयाच्या निर्णयाविरोधात पुनर्विचार याचिका दाखल करावी अशी भूमिका मांडली. परंपरा मोडू नका मात्र ग्रामस्थांचा गाभाऱ्यात जाण्याचा अधिकारही हिरावू नका, असेही स्पष्ट करण्यात आले. या बैठकीस विश्वस्त यादवराव तुंगार, डॉ. सत्यप्रिय शुक्ल, अॅड. श्रीकांत गायधनी, ललीता शिंदे, जयंत शिखरे, सचिन पाचोरकर यांनीही आपली भूमिका मांडली. न्यायालयीन प्रक्रिया करणे गरजेचे असल्याचे सांगत विश्वस्त मंडळास दिलेले अधिकार जपण्यासाठी न्यायालयात दावा दाखल करणार असल्याचे यावेळेस सांगण्यात आले.
'स्वराज्य'च्या महिलांची धडक
पुणे येथील स्वराज्य महिला संघटनेच्या महिलांनी शनिवारी त्र्यंबकेश्वराच्या मंदिरात धडक मारली. सायंकाळी पाच वाजेच्या सुमारास स्वराज्य महिला संघटनाच्या राष्ट्रीय अध्यक्षा वनीता तानाजी गुट्टे, भाग्यश्री शांताराम नरवडे, सुरेखा राजेंद्र थोरात, मयुरी देशमाने, रंजना गणपत वाळुंज या महिला त्र्यंबकेश्वर मंदिराच्या गाभाऱ्यात प्रवेशासाठी दाखल झाले. यावेळी गाभाऱ्यात कोणालाही प्रवेश नसल्याच्या ३ एप्रिलच्या निर्णयाची प्रत देवस्थान विश्वस्तांनी महिलांच्या हाती सोपविली. मात्र महिलांनी उच्च न्यायालयाचे आदेश व शनिशिंगणापूरच्या घटनेचा हवाला दिला. परंतु वाद वाढू नये यासाठी पोलिसांच्या मदतीने त्यांना मंदिराबाहेर काढण्यात आले. काही वेळातच तेथे ग्रामस्थ गोळा झाल्याने त्यांची महिलांशी बाचाबाची होऊन परिसरात तणाव निर्माण झाला होता. त्र्यंबकेश्वर आणि कोल्हापूर मंदिरात प्र्रवेश करू पाहणाऱ्या तृप्ती देसाई यांचा विरोध करण्याचा इशारा हिंदू जनजागृती समिती प्रणित 'रणरागिणी' संघटनेने शनिवारी दिला.
मोबाइल अॅप डाउनलोड करा आणि राहा अपडेट
