सुमारे दीड लाख लोकसंख्या असलेल्या आणि जंक्शन म्हणून अवघ्या देशभरात परिचित असलेल्या मनमाड शहराला लातूरप्रमाणे रेल्वेच्या जलदूत वाहिनीने पाणी उपलब्ध करून देण्यात यावे, अशी मागणी करणारी जनहित याचिका मुंबई हायकोर्टात शुक्रवारी दाखल केली आहे.
सामाजिक कार्यकर्ते अशोक परदेशी व सचिन कासार यांनी ही याचिका दाखल केली आहे. महिन्यातून एकदा पाणीपुरवठा होत असल्याने लातूर शहर यंदा चर्चेत आले आहे. मात्र, गेल्या ३० वर्षांपासून मनमाड शहराला पिण्याच्या पाण्यासाठी कडवा संघर्ष करावा लागत आहे. आताही महिन्यातून केवळ एकच वेळा मनमाडवासीयांना पाणी मिळत आहे. जंक्शन असूनही केवळ पाणी उपलब्ध होत नसल्याने रेल्वेगाड्यांच्या वेळापत्रकावर परिणाम होत आहे. त्यामुळे रेल्वे मंत्रालयाच्या मदतीने पाणी उपलब्ध करून द्यावे, अशी मागणी जनहित याचिकेतून करण्यात आली आहे.
जलवाहिनी फुटली
निफाड ः लासलगाव विंचूरसह सोळागाव पाणीपुरवठा योजनेच्या सदस्यांनी प्रयत्नांची पराकाष्ठा करून पिण्याच्या पाण्यासाठी नांदूरमध्यमेश्वर धरणात पाण्याचे आवर्तन मिळवले होते. मात्र, ढिसाळ नियोजनामुळे सोळा गाव पाणीपुरवठा करणारी जलवाहिनी नांदूरमध्यमेश्वर धरण परिसरातील दिंडोरी तास शिवारात फुटल्याने ऐन दुष्काळात हजारो लिटर पाण्याचा अपव्यय झाला आहे. ही जलवाहिनी फुटली की फोडली याचा उलगडा मात्र होऊ शकलेला नाही. मात्र, ही जलवाहिनी वारंवार फुटते, असे निदर्शनास आणूनही अधिकारी दुर्लक्ष होत असल्याने शेतकऱ्यांनी संताप व्यक्त केला आहे. दिंडोरी तास येथील आबा तासकर यांच्या द्राक्षबागेत लासलगाव सोळा गाव पाणीपुरवठा योजनेची जलवाहिनी फुटल्याने हजारो लिटर पाणी तासकरांच्या द्राक्षबागेत पसरल्याने या बागेचे तळ्यात रूपांतर झाले आहे. यामुळे बाग कोसळण्याचा धोका निर्माण झाला आहे.
मोबाइल अॅप डाउनलोड करा आणि राहा अपडेट
