महावितरणचा नाशिक विभाग हा औरंगाबाद विभागाला जोडण्यात येईल, अशी घोषणा महाराष्ट्राचे उर्जामंत्री चंद्रशेखर बावनकुळे यांनी एकलहरे येथे बुधवारी केली. मात्र, यामुळे सामान्य नागरिकांच्या मनात संभ्रम निर्माण झाला होता. नाशिकच्या लोकांना महावितरणच्या कामासाठी औंरंगाबादला जावे लागले असे वाटत होते. मात्र, नाशिक विभाग हा औरंगाबादला जोडण्यात येणार नसून तो कल्याण विभागाला जोडण्यात येणार असल्याची माहिती महावितरणच्या अधिकाऱ्यांनी दिली.
महावितरणच्या कामात सुसूत्रता यावी यासाठी राज्यात चार विभाग करण्यात येणार आहेत. या चार विभागांची स्थापना झाल्यास प्रत्येकाला आपल्या कामाचा निपटारा आपल्या विभागातच करता येणे शक्य होणार आहे. यासाठी राज्यात पुणे, कल्याण, नागपूर, औरंगाबाद ही चार केंद्र स्थापन करण्यात येणार असून औरंगाबाद विभागात- औरंगाबाद, लातूर, नांदेड, आणि जळगाव, नागपूर विभागात- अकोला, अमरावती, चंद्रपूर, गोंद‌यिा पुणे विभागात- पुणे, कोल्हापूर, बारामती तर कल्याण विभागात- नाशिक, रत्नागिरी, भांडूप, मुंबई इत्यादी झोनचा कार्यभार असणार आहे. प्रत्येक विभागाच्या प्रमुख पदावर व्यवस्थापकीय संचालकांची नियुक्ती करण्यात येणार आहे. नाशिक विभागाचे काम आहे त्या स्थितीत आहे त्या ठिकाणाहूनच सुरू रहाणार आहे.
कर्मचाऱ्यांचा विरोध
या विकेंद्रीकरणाला मात्र महावितरणच्या सर्व संघटनांनी विरोध दर्शविला आहे. पूर्वी नाशिक विभागात कार्यरत असलेल्या कर्माचाऱ्याची बदली फार तर जळगाव किंवा धुळे या ठिकाणी होत असे. मात्र, नाशिक विभाग कल्याण विभागाला जोडल्याने नाशिकच्या कर्मचाऱ्याला रत्नागिरी अलिबाग येथे जावे लागणार आहे. त्यामुळे या विकेंद्रीकरणाच्या प्रस्तावाला कर्मचाऱ्यांचा विरोध आहे.
मोबाइल अॅप डाउनलोड करा आणि राहा अपडेट
