नाशिक येथे तिसऱ्या राज्यस्तरीय खाशाबा जाधव कुस्ती स्पर्धेत सरकारने आर्थिक व्यवहारातून महाराष्ट्र कुस्तीगीर परिषदेला खड्यासारखे दूर ठेवल्यानेच वादाची ठिणगी पडली. स्पर्धेत बक्षिसांपासून पंच, प्रशिक्षकांच्या मानधनापर्यंतच्या सर्वच बाबतीत धनादेशावर सही करण्याचे अधिकार केवळ प्रभारी क्रीडा उपसंचालक संजय सबनीस यांनाच देण्यात आले होते. यापूर्वीच्या स्पर्धांत कुस्तीगीर परिषदेचे सरचिटणीस व शासकीय अधिकाऱ्याच्या सहीशिवाय कोणतेही व्यवहार होत नव्हते. मात्र, या वेळी हे अधिकार केवळ सबनीस यांनाच असल्याने कुस्तीगीर परिषदेत अस्वस्थता होती. त्याला बक्षिसाच्या मुद्द्याने खतपाणी घातले आणि आयोजक- परिषदेतील वाद चिघळतच गेला. त्याची परिणती कुस्ती स्पर्धा स्थगित होण्यात झाली.
नाशिकमध्येच गेल्या वर्षी भाई नेरूरकर चषक खो-खो स्पर्धा क्रीडा उपसंचालक संजय सबनीस व आमदार सीमा हिरे यांच्या आयोजन व नियोजनाखालीच झाली होती. त्या वेळी क्रीडा उपसंचालकांबरोबरच महाराष्ट्र खो-खो संघटनेच्या सरचिटणीसांचीही सही घेतली जात होती. यापूर्वीच्या खाशाबा जाधव कुस्ती स्पर्धेतही हाच पायंडा होता. यंदा मात्र हा पायंडा मोडला. कुस्तीगीर परिषदेचे सरचिटणीस बाळासाहेब लांडगे दिल्लीत असल्याने त्यांना स्पर्धेच्या दिवशी उपस्थित राहता येणे शक्य नव्हते. त्यामुळे प्रभारी क्रीडा उपसंचालक संजय सबनीस यांच्याच सहीने धनादेश दिले जात होते. कुस्तीगीर परिषदेला ही बाब समजल्यानंतर प्रचंड संताप व्यक्त झाला. यामागचा सूत्रधार सबनीस हेच आहेत, अशी कुस्तीगीर परिषदेची धारणा झाली. मात्र, बाळासाहेब लांडगे नाशिकमध्ये एक दिवस उशिराने दाखल होणार असल्याने तोपर्यंत आर्थिक व्यवहार ठप्प होतील म्हणूनच हे अधिकार सबनीस यांनी स्वतःकडे घेतले. मात्र, ते शासनाच्या संमतीने घेतले किंवा नाहीत याची अद्याप उकल होऊ शकलेली नाही. मात्र, आठव्या वजनगटातील बक्षिसांच्या रकमेवरून या वादाला फोडणी मिळाली.
'अयोध्या'त रामायण!
स्पर्धेतील पंच, प्रशिक्षक व कुस्तीगीर परिषदेच्या पदाधिकाऱ्यांची निवास व भोजन व्यवस्था अयोध्या हॉटेलमध्ये होती. येथे बक्षिसाच्या मुद्द्यापेक्षाही परिषदेचे सरचिटणीस बाळासाहेब लांडगे यांना धनादेशावर सहीचे अधिकार नसल्याची चर्चा अधिक चवीने रंगली. ही माहिती बाळासाहेबांच्या कानावर घातल्याने आयोजक व कुस्तीगीर परिषदेतील धुसफूस वाढली. बक्षिसाचा मुद्दा उपस्थित झाल्यानंतर बाळासाहेब तातडीने नाशिकला रात्री अकराच्या सुमारास दाखल झाले. त्यांनी त्याच रात्री बैठक घेतली. एकूणच हे संपूर्ण प्रकरण सबनीस यांच्यावरच फोडले. हे संपूर्ण रामायण 'अयोध्या'वरच रंगले.
स्पर्धेवर प्रश्नचिन्ह
खाशाबा जाधव कुस्ती स्पर्धेला सुरुवातीपासून लागलेले ग्रहण पाहता याबाबत आयोजक व महाराष्ट्र कुस्तीगीर संघटनेत अनेकदा बैठकी झाल्या. आता स्पर्धा अनिश्चित काळापर्यंत स्थगित करण्यात आल्याने राज्य सरकारने यापुढे ही स्पर्धा घ्यायची किंवा नाही, यावर गंभीरपणे विचार सुरू केला आहे. याबाबत आमदार सीमा हिरे यांच्याशी संपर्क साधला असता त्यांनी सांगितले, की खेळाडूंच्याच फायद्यासाठी ही स्पर्धा घेतली होती. आता स्पर्धा स्थगित झाल्याने क्रीडामंत्री विनोद तावडे यांनीही या स्पर्धेबाबत गंभीरपणे विचार सुरू केला आहे.
लाखो रुपयांचा खर्च वाया
स्पर्धेवर आतापर्यंत १२ ते १४ लाख रुपयांपर्यंत खर्च करण्यात आला होता. पहिल्या दिवसाच्या लढती झाल्यानंतर उर्वरित लढती स्थगित करण्यात आल्या. त्यामुळे स्पर्धेवरील खर्च वाया गेला आहे. हा खर्च कोणी द्यायचा असा प्रश्न आयोजकांसमोर आहे. याबाबत सरकारला संपूर्ण माहिती दिली जाईल. त्यानंतरच काय तो निर्णय होईल, असे क्रीडा कार्यालयाच्या सूत्रांनी सांगितले.
मोबाइल अॅप डाउनलोड करा आणि राहा अपडेट
