वचक निर्माण करावा, या मागणीचा वेगळा अर्थ काढून काम करणाऱ्या पोलिसांनी नुकतेच एका सर्वसामान्य नागरिकास बेदम मारहाण केली. झालेली चूक दडपण्यासाठी आता प्रयत्न सुरू असून, गुन्हेगारांना सोडून सर्वसामान्यांना वेठीस धरण्याचा उद्योग पोलिसांनी बंद करणे गरजेचे आहे.
गुन्हेगारी घटनांमुळे माध्यमांसहीत राजकीय पक्षांच्या टीकेला सामोरे जाणाऱ्या शहर पोलिसांनी आपल्या कार्यपध्दतीत बदल करण्याचा निर्णय घेतला. दोन दिवसांपूर्वी झालेल्या बैठकीत पोलिस आयुक्त एस. जगन्नाथन यांनी गुन्हेगारांविरोधात आक्रमक भूमिका घेण्यास सर्व अधिकाऱ्यांना सांगितले. याानंतरच सरकारवाडा पोलिस स्टेशनच्या एका कर्मचाऱ्याने पुतणीला घेऊन जाणाऱ्या काकास बेदम मारहाण केली. कैलास नरेडा असे या व्यक्तीचे नाव आहे. दोन दिवसांपूर्वी सिडको परिसरात राहणाऱ्या नरेडा यांच्या पुतणीचे घरात वाद झाले. यानंतर ही तरुणी एकटीच घराबाहेर पडली. तिच्या शोधार्थ नरेडा यांच्यासह त्यांच्या सोसायटीत राहणारे महेंद्र वाघ घराबाहेर पडले. संध्याकाळच्या सुमारास ठक्कर बाजार येथे तरुणी सापडली. तिला घरी येण्याची विनंती या दोघांनी केली. त्यास त्यांच्या पुतणीने नकार दिला. दोघांमध्ये वाद झाला. यावेळी तिथे काही युवक आले. त्यांनी नरेडा यांनाच उलट विचारणा केली. तेवढ्यात सरकारवाडा पोलिस स्टेशनचे एक कर्मचारी तिथे पोहचले. त्यांनी नरेडा यांना थेट चौकीत नेले. तिथे त्यांच्यावर मुलींना पळवून नेण्याचा आरोप लावीत संबंधित कर्मचाऱ्याने त्यांना बेदम मारहाण केली. या प्रकरणाची चर्चा सुरू होताच नरेडा यांना दमबाजी करून सोडून देण्यात आले. आपल्यावर झालेल्या अन्यायाची तक्रार करण्यासाठी नरेडा काही जणांसोबत सरकारवाडा पोलिस स्टेशनमध्ये गेले. मात्र, गुन्हा दाखल होण्याऐवजी फक्त तक्रार अर्जावर नरेडा यांची बोळवण करण्यात आली. सूत्रांच्या माहितीनुसार काही पोलिस नरेडा यांच्या घरी जाऊन आले. तक्रार मागे घ्यावी, यासाठी प्रयत्न सुरू आहेत.
सरकारवाडा पोलिस स्टेशनच्या कर्मचाऱ्याने एका व्यक्तीस मारहाण केल्याची तक्रार समोर आली आहे. त्यानुसार, वरिष्ठ पोलिस निरीक्षक सीताराम कोल्हे अधिक चौकशी करीत आहे. पोलिस कर्मचारी दोषी असल्यास कारवाई करण्यात येईल. - सचिन गोरे, सहायक पोलिस आयुक्त, क्राईम ब्रँच
मोबाइल अॅप डाउनलोड करा आणि राहा अपडेट
