प्रशासनाने नाशिक विभागातील २९ नगरपालिकांच्या निवडणुकीची तयारी सुरू केली आहे. राज्य निवडणूक आयोगाच्या निर्देशानुसार नगरपरिषद व नगरपंचायतीच्या प्रभाग रचनेस अंत‌मि मान्यता देण्याची कार्यवाही सुरू झाली आहे.
राज्य निवडणूक आयोगाने यावेळी अ, ब, क वर्गाच्या नगरपालिका व नगरपंचायतींचे प्रारुप प्रभाग रचना तयार करण्याची जबाबदारी ही मुख्याधिकाऱ्यांवर तर प्रारुप प्रभाग रचनेस मान्यता देणे, प्रसिद्ध करणे, प्राप्त हरकतींवर व सूचनांवर सुनावणी देण्याची जबाबदारी जिल्हाधिकाऱ्यांवर टाकली आहे. सुनावणीअंती जिल्हाधिकाऱ्यांकडून प्राप्त अहवालानुसार अंतिम प्रभाग रचनेस मान्यता देण्याचे अधिकार महसूल आयुक्तांकडे सोपविण्यात आले आहेत.
नाशिक विभागातून निवडणुका होत असलेल्या २९ नगरपालिकांच्या हद्दीतील एकूण लोकसंख्या १५ लाख ५८ हजार ८ इतकी असून त्यापैकी १ लाख ७७ हजार १५८ अनुसुचीत जाती व ८३ हजार ७५३ इतकी अनुसुचित जमातीची लोकसंख्या आहे. या सर्व नगरपालिकांच्या कार्यक्षेत्रात एकूण ३०२४ प्रगणक गटांची निर्मिती करण्यात आली आहे. लोकसंख्येच्या बाबतीत नाशिक विभागात भुसावळ ही सर्वात मोठी नगरपालिका असून या नगरपालिकेची लोकसख्या तब्बल १ लाख ८७ हजार ४२१ इतकी आहे. केवळ १२ हजार ३५० इतकी लोकसंख्या असलेली भगुर नगरपालिका विभागातील सर्वात लहान नगरपालिका आहे.
मोबाइल अॅप डाउनलोड करा आणि राहा अपडेट
