तळेगाव दिंडोरी (ता. दिंडोरी) येथे घरगुती वादातून एका वृद्ध शेतकऱ्याने पत्नीला काठीने मारहाण केल्याने तिचा मृत्यू झाला. तिच्या मृत्यूनंतर वृद्ध शेतकऱ्याने गळफास घेऊन आत्महत्या केल्याने खळबळ उडाली आहे. दिंडोरी पोलिसांनी पतीविरुद्ध पत्नीच्या खुनाचा, तसेच आत्महत्या केल्याचा गुन्हा दाखल केला आहे.
तळेगाव दिंडोरी येथील तातीराम अर्जुन उगले (वय ८५) व गीताबाई तातीराम उगले (वय ७६) हे शेतकरी दाम्पत्य दोघेच वस्तीवर राहत होते. रविवारी रात्री त्यांच्यात वाद होऊन तातीराम यांनी पत्नीस त्यांच्याच आधाराच्या बांबूच्या काठीने डोक्यावर मारहाण केली. त्यातच त्यांचा मृत्यू झाला. पत्नीच्या मृत्यूनंतर तातीराम यांनीही स्वतः राहत्या घरात दोरीने गळफास घेऊन आत्महत्या केली. सकाळी त्यांचा मुलगा आला, तेव्हा दरवाजा बंद आढळला. नातेवाइकांनी दरवाजा तोडून आत प्रवेश केल्यानंतर हा प्रकार उघडकीस आला. या दाम्पत्याच्या मागे दोन मुलगे, मुली, सुना, नातवंडे असा परिवार आहे. दिंडोरी पोलिसांनी तातीराम उगले यांच्याविरुद्ध पत्नीच्या खुनाचा, तसेच आत्महत्येचा गुन्हा दाखल केला असून, पोलिस निरीक्षक मधुकर गावित करीत आहेत.
मोबाइल अॅप डाउनलोड करा आणि राहा अपडेट
