टीम मटा
गेल्या पंधरा दिवसांपासून सुरू असलेला कांदा खरेदीचा तिढा सोमवारी सुटलेला दिसत असतानाच शेतकऱ्यांनी गोणीतून कांदा खरेदीला विरोध केला. कळवण, देवळा, उमराणा, मनमाड, निफाड येथील बाजार समितीत शेतकऱ्यांनी गोणीचा खर्च वाढतो, असे कारण पुढे करून लिलाव बंद पाडले.
उमराण्यात रास्तारोको उमराणा कृषी उत्पन्न बाजार समितीत लिलाव सुरू होताच गोणी पद्दत रद्द करून जुन्या प्रचलित पद्दतीनेच कांदा लिलाव घेण्यात यावेत, अशी मागणी करून संतप्त शेतकऱ्यांनी लिलाव बंद पाडले. मंगळवारी सकाळी ९ वाजता मुंबई-आग्रा रस्त्यावर उमराणा येथे उतरून तब्बल पाऊण तास रास्ता रोको आंदोलन छेडले.
सरकारच्या ५ जुलै २०१६ च्या अध्यादेशानुसार व्यापाऱ्यांच्या आडमुठेधोरणामुळे जिल्ह्यातील सर्व बाजार समित्या बंद होत्या. मात्र २४ जुलै रोजी मनमाड येथे झालेल्या व्यापाऱ्यांच्या बैठकीतील निर्णयानुसार २६ रोजी सकाळी ९ वाजता गोणी पद्धतीने लिलाव सुरू होताच शेतकऱ्यांनी त्यास विरोध दर्शविला. जुन्या प्रचलित पद्धतीनेच लिलाव घेण्यात यावेत, अशी करीत लिलाव बंद पाडून मुंबई-आग्रा रस्त्यावर उमराणा येथे रास्तारोको आंदोलन छेडले. यावेळी आंदोलन कर्त्यांच्यावतीने बाजार समितीचे सचिव नितीन जाधव यांना निवेदन देण्यात आले. आंदोलनात जाणता राजा मित्रमंडळाचे अध्यक्ष नंदन देवरे, ग्रामपंचायत सदस्य सचिन देवरे, रमेश देवरे, सुधाकर जाधव, भगवान देवरे, उमेश देवरे, भारत देवरे, विकास देवरे, अविनाश देवरे आदींसह परिसरातील शेतकरी सहभागी झाले होते.
देवळा लिलावही बंद देवळा कृषी उत्पन्न बाजार समितीत सुरू झालेले गोणी पद्धतीचे लिलाव रद्द करून जुन्या प्रचलित पद्धतीनेच कांदा लिलाव घेण्यात यावेत, अशी मागणी करून शेतकऱ्यांनी लिलाव बंद पाडले. बाजार समितीच्या कार्यालयात सचिव दौलत शिंदे, तहसीलदार कैलास पवार यांना निवेदन देण्यात आले. यावेळी बाजार समितीचे माजी सभापती योगेश आहेर, संचालक जगदीश पवार, सुनील पवार, काशिनाथ पवार, जिभाऊ पवार, कडू पवार, महादू पवार, रमेश पवार, उमेश पवार, विनायक पवार आदींसह शेतकरी उपस्थित होते.
कळवणला आज रास्तारोको कळवण : गोणीतून विक्रीस आलेला कांद्याचा सुरू असलेला लिलाव भाजप वगळता सर्वपक्षीय शेतकरी प्रतिनिधींनी बंद पाडला. ही पद्धत शेतकऱ्याला परवडणारी नसून, खुल्या पद्धतीने विनाअडत कांदा खरेदी करावा. अन्यथा कळवण तालुका बंदचा इशारा देण्यात आला. बुधवारी कळवण बस स्थानकासमोर रास्ता रोको आंदोलन होणार असल्याची माहिती संतप्त शेतकरी नेत्यांनी दिली.
सकाळी ११ वाजता सुरू करण्यात आलेला लिलाव २०० गोणी खरेदी पर्यंत आला असता मार्केटमध्ये सर्वपक्षीय पदाधिकारी, शेतकरी जमा झाले. त्यांनी गोणी खरेदीस विरोध करत लिलाव बंद पाडला. जमलेल्या पदाधिकाऱ्यांनी व्यापारी प्रतिनिधींशी चर्चा केली. बाजार समिती संचालक व कांदा व्यापारी हेमंत बोरसे यांनी व्यापारी संघटनांची भूमिका स्पष्ट केली. शेतकरी व सर्वपक्षीय पदधिकाऱ्यांनी या विरोधात बुधवारी सकाळी ११ वाजता कळवण बस स्थानकासमोर रास्तारोको करण्याचा इशारा देण्यात आला आहे. यावेळी शिवसेना नेते कारभारी आहेर, स्वाभिमानी जिल्हाध्यक्ष गोविंद पगार, माकप सरचिटणीस हेमंत पाळेकर, काँग्रेसचे शैलेश पवार, प्रभाकर पाटील, संभाजी पवार आदींसह सर्वपक्षीय पदाधिकारी, शेतकरी उपस्थित होते.
मनमाडला विरोध; पण खरेदी सुरू मनमाड : येथील कृषी उत्पन्न बाजार समितीत मंगळवारी लिलावाला सुरुवात झाल्याने शेतकरी वर्गात समाधान पसरले असताना दुसरीकडे मात्र गोणी पद्धत खर्चिक असल्याचे सांगत शेतकऱ्यांनी काही काळ कांद्याचे लिलाव बंद पाडले. मनमाड बाजार समितीत तब्बल १७ दिवसानंतर मंगळवारी लिलावाला सुरू झाला. शेतकऱ्यांना गोणी पद्धतीचा फटका बसत असल्याने त्यांच्यात नाराजीचे वातावरण होते. आडत बंद झाली पण गोणी पद्धत लावल्याने खर्च वाढला आहे. तो न परवडणारा असल्याचे सांगत शेतकऱ्यांनी मनमाड बाजार समितीत कांद्याचे लिलाव बंद पाडले. काही वेळाने लिलाव पूर्ववत सुरू झाले. मंगळवारी कांद्याला कमीतकमी ३०० तर जास्तीत जास्त ९०० व सरासरी ७२० भाव होता हा भाव समाधानकारक नसल्याची प्रतिक्रिया शेतकऱ्यांनी व्यक्त केली.
तीस वर्षांनंतर गोणीतून कांदा लिलाव निफाड : लासलगाव कृषी उत्पन्न बाजार समितीत १९८५ नंतर व्यापारीवर्गाच्या मागणीमुळे प्रथमच गोणीसह कांदा लिलाव मंगळवारपासून सुरू झाला. यावेळी बाजार समितीचे सभापती जयदत्त होळकर यांच्या हस्ते कांदा गोण्यांचे पूजन करण्यात आले. बाजार समितीत शेतकऱ्यांनी वाहनातून १७८६ गोणीत कांदा आणला होता. कांद्याला जास्तीजास्त ९५२ रुपये, सरासरी ८४४ रुपये तर कमीतकमी ४०० रुपये प्रति क्विंटल भाव मिळाला. गोणी पद्धतीने कांदा लिलाव सुरू झाल्याने शेतकऱ्यांची निराशा झाली. यामुळे शेतकऱ्यांचा खर्च अडीचपट वाढणार आहे. क्विंटलमागे ९० ते १०० रुपये अतिरिक्त खर्च येणार आहे. त्यामुळे गोणी पद्धत रद्द करावी, अशी मागणी सभापती जयदत्त होळकर यांनी केली.
मोबाइल अॅप डाउनलोड करा आणि राहा अपडेट
