गोणीत कांदा आणण्यास शेतकऱ्यांचा विरोध; बाजार समित्यांमध्ये शुकशुकाट
टीम मटा
नियमनमुक्ती धोरणामुळे निर्माण झालेला कांदा लिलावाचा तिढा चिघळतच चालला आहे. त्यातच कांदा गोणीत आणावा, अशी आडमुठी भूमिका व्यापाऱ्यांनी घेतल्यानंतर शेतकरी या विरोधात रस्त्यावर उतरले आहेत. काही ठिकाणी रास्ता रोको आंदोलन करण्यात आले. यामुळे बुधवारी नाशिक जिल्ह्यातील कळवण, सटाणा, येवला, झोडगे, मुंगसे, उमराणे बाजार समितीत लिलाव सुरळीत होऊ शकले नाहीत. गोणी पद्धतीने कांदा लिलाव नको, या मागणीवर शेतकरी ठाम आहेत. यामुळे शेतकरी-व्यापारी असा संघर्ष निर्माण झाला आहे.
कळवणला सर्वपक्षीय रास्ता रोको
कळवण ः गोणी पध्दतीऐवजी बाजार समित्यांमध्ये जुन्याच प्रचलित पध्दतीनेच विना आडत कांद्याचे लिलाव त्वरित सुरू करावेत, अशी स्पष्ट भूमिका घेत सर्वपक्षीय पदाधिकारी व शेतकरी बांधवांनी कळवण बसस्थानकासमोर ठिय्या मांडत रास्ता रोको आंदोलन केले. या आंदोलनाला कायदेशीर अडचण ठरवत आंदोलनकर्त्या सर्व शेतकऱ्यांना कळवण पोलिसांनी अटक करून नंतर सोडून दिले. दरम्यान, या प्रश्नी आज कळवण बंदची हाक देण्यात आली आहे.
बाजार समितीमध्ये गोणी पद्धतीच्या कांदा खरेदीला मंगळवारी सुरुवात झाली होती. मात्र सर्वपक्षीय शेतकऱ्यांनी त्यास विरोध दर्शवत व्यापारी संघटनेचा निषेध नोंदवत बुधवारी सकाळी ११ वाजेपासून कळवण बस स्थानकासमोर तीन तास रास्ता रोको आंदोलन केले. यामुळे कळवण-देवळा व कळवण-नाशिक रस्त्यावरील वाहतूक खोळंबली होती. कांदा उत्पादक शेतकऱ्यांनी तहसीलदार कैलास चावडे, कळवण बाजार समितीचे सचिव रवींद्र हिरे, सहाय्यक निबंधक प्रकाश देवरे, पोलिस निरीक्षक सुजय घाडगे यांना निवेदन दिले. या आंदोलनासाठी आमदार जे. पी. गावित यांनी हजेरी लावत या गंभीर प्रश्नावर आपण शेतकऱ्यांच्या पाठीशी आहोत व विधानसभेत हा प्रश्न मांडणार असल्याचे स्पष्ट केले. यावेळी शेतकरी संघटनेचे राज्य उपाध्यक्ष देवीदास पवार, शिवसेनेचे नेते कारभारी आहेर, स्वाभिमानी संघटनेचे जिल्हाध्यक्ष गोविंद पगार, राजेंद्र भामरे, हेमंत पाटील, संजय वाघ, शैलेश पवार, प्रभाकर पाटील, भाई दादाजी पाटील, शांताराम जाधव आदींनी मनोगत व्यक्त करीत शेतकऱ्यांच्या पाठीशी असल्याचे स्पष्ट केले. या आंदोलनाप्रसंगी जिल्हा परिषद सदस्य नितीन पवार, रवींद्र देवरे, नगरपंचायतचे गटनेते कौतिक पगार, उपसभापती संजय पवार, सुधाकर पगार, निंबा पगार, मोतीराम पगार, साहेबराव पगार, संभाजी पवार, किशोर पवार, प्रवीण रौंदळ, अतुल पगार, प्रदीप पगार, जितेंद्र पगार, भाऊसाहेब पवार, संतोष देशमुख, भरत शिंदे आदींसह सर्वपक्षीय पदाधिकारी, कार्यकर्ते, शेतकरी उपस्थित होते.
सटाण्यात राष्ट्रवादीचे आंदोलन
सटाणा ः गेल्या पंधरा ते वीस दिवसांपासून जिल्ह्यातील बाजार समित्यांचे लिलाव पूर्णत: बदं असल्याने कांदा व भुसार मालाचे व्यवहार ठप्प झाले आहेत. कांदा सडू लागल्याने, तसेच गोणी पध्दतीला शेतकऱ्यांचा विरोध असल्याने सटाणा राष्ट्रवादी काँग्रेसच्या वतीने तहसील कचेरीच्या आवारात मोफत कांदा वाटप करण्यात आला. लवकरात लवकर प्रचलित लिलाव सुरू करावा, या मागणीचे निवेदनदेखील तहसीलदार सुनील सैंदाणे यांना देण्यात आले.
बागलाण तालुका राष्ट्रवादी काँग्रेसच्या वतीने तालुका कार्याध्यक्ष संजय पवार यांच्या नेतृत्वाखाली शेतकऱ्यांचा कांदा सडू लागल्याने कांदा उत्पादकांच्या माध्यमातून तहसील कचेरीच्या प्रांगणात मोफत कांदा वाटप करण्यात आला. शेतमाल विक्रीची समांतर व्यवस्था उभारून कांदा व भुसार मालाचे विक्री व्यवहार तत्काळ सुरू करावेत, अन्यथा शेतकरी मालाचे ट्रॅक्टर्स भरून तहसील आवारात उभे करतील, अशा इशारा निवेदनाद्वारे देण्यात आला आहे. यावेळी राष्ट्रवादीचे ज्येष्ठ नेते जिभाऊ सोनवणे, माजी नगराध्यक्ष पांडूरंग सोनवणे, शहराध्यक्ष राजेंद्र सोनवणे, माजी संरपच संजय पवार, गटनेते काका रौंदळ, जे. डी. पवार, काकाजी सोनवणे, सुभाष सोनवणे, केशव सोनवणे, मयूर अहिरे, आप्पा पाटील, प्रसाद दळवी आदींसह शेतकरी उपस्थित होते.
मुंगसे, उमराणेत लिलाव ठप्प
मालेगाव ः नियमनमुक्ती धोरणामुळे निर्माण झालेला कांदा लिलावाचा तिढा अद्यापदेखील कायम आहे. मालेगाव बाजार समितीच्या झोडगे, मुंगसे कांदा खरेदी केंद्र, तसेच उमराणे बाजार समितीत बुधवारीदेखील लिलाव सुरळीत होऊ शकले नाहीत. गोणी पद्धतीने कांदा लिलाव नको, या मागणीवर शेतकरी ठाम आहेत. यामुळे बुधवारी बाजार समित्यांमध्ये शुकशुकाट पहायला मिळाला.
मंगळवारी उमराणे बाजार समिती आवारात संतप्त शेतकऱ्यांनी रास्ता रोको केला होता, तर मुंगसे येथे देखील लिलाव बंदच राहिला. बुधवारीदेखील या दोन्ही ठिकाणी कांदा लिलाव सुरळीत होऊ शकला नाही. एरवी दोन ते तीन हजार क्विंटल आवक होणाऱ्या मुंगेस खरेदी विक्री केंद्रात बुधवारी अत्यल्प तीस क्विंटल कांद्याची आवक झाल्याची माहिती बाजार समिती सचिव अशोक देसले यांनी दिली.
आमदार चव्हाण यांनी मांडला स्थगन प्रस्ताव
सटाणा ः कांदा गोणीत कांदा आणला तरच लिलावात सहभागी होऊ, अशी भूमिका व्यापाऱ्यांनी घेतल्यामुळे नाशिक जिल्ह्यातील कांदा उत्पादक शेतकरी संतप्त झाले असून, यावर शासनाने तातडीने तोडगा काढून शेतकऱ्यांना दिलासा द्यावा, या मागणीसाठी आमदार दीपिका चव्हाण यांनी बुधवारी विधीमंडळात स्थगन प्रस्ताव मांडला.
कांदाप्रश्नांची दखल घेत आमदार दीपिका चव्हाण यांनी विधीमंडळाच्या स्थगन प्रस्तावाप्रसंगी आपली भूमिका विषद करताना स्पष्ट केले की, शेतीमाल नियमनमुक्त करण्याच्या अध्यादेशाविरुद्ध व्यापाऱ्यांनी महिनाभरापासून आंदोलनाचे हत्यार उपसले आहे.
मंत्रालयस्तरावर पणन मंत्र्यांसमवेत बैठका होऊन देखील व्यापाऱ्यांनी कांदा लिलावात सहभागी न होण्याचा निर्णय घेतला आहे. व्यापाऱ्यांच्या या आडमुठ्या धोरणामुळे नाशिक जिल्ह्यातील कांदा उत्पादक आंदोलनाच्या पावित्र्यात आहेत. कांदा गोणीत भरल्याने शेतकऱ्यांचे आर्थिक नुकसान होऊन मोठ्या आर्थिक संकटाला सामोरे जावे लागणार असल्याने शासनाने तातडीने या संदर्भात महत्त्वपूर्ण तोडगा काढण्याची मागणी स्थगन प्रस्तावाद्वारे केली आहे.
मोबाइल अॅप डाउनलोड करा आणि राहा अपडेट
