म. टा. प्रतिनिधी, नाशिक
गत आठवड्यात गोदावरीला आलेल्या पुरामूळे नदीकाठचे रहिवासी आणि व्यावसायिकांचे मोठे नुकसान झाले असून, पंचनाम्यांचे काम युद्धपातळीवर सुरू आहेत. शहरात तीन दिवसांत ३ हजार २६४ स्थळांसह ९० टक्के पंचनामे पूर्ण झाल्याची माहिती जिल्हा प्रशासनाने दिली. उर्वरित पंचनामे लवकरच पूर्ण करून मदतीचा प्रस्ताव राज्य सरकारकडे पाठविण्यात येणार आहे. त्यामुळे सरकारकडून मदत कधी मिळते याकडे आता पूरग्रस्तांचे लक्ष लागले आहे.
ऑगस्टच्या पहिल्या सप्ताहात गोदावरीला महापूर आला. पावसाचा जोर आणि गंगापूर, दारणासह अन्य काही धरणांमधून सुरू असलेला पाण्याचा विसर्गामुळे पंचवटी परिसरासह नदीकाठची बाजारपेठ अक्षरशः पाण्याखाली गेली. नदीकाठच्या वस्त्यांमध्ये पाणी शिरल्याने रहिवाशांचे अतोनात नुकसान झाले. अनेकांचे संसार या पुरात वाहून गेले. अशी शेकडो कुटुंब पुरामुळे रस्त्यावर आली आहेत. विशेष म्हणजे सराफ बाजार, भांडी बाजार, दहीपूल, गोदाकाठ आणि पंचवटीच्या बऱ्याचशा परिसरात पाणी शिरल्याने व्यापाऱ्यांचेही मोठे नुकसान झाले आहे. पंचनामे लवकरात लवकर पूर्ण व्हावेत यासाठी दहा पथके स्थापन करण्यात आली. प्रत्येक पथकात महसूलचे तीन, महापालिका आणि पोलिसांचे प्रत्येकी दोन कर्मचारी आहेत. त्यासाठी मालेगाव, चांदवड, बागलाण, येवला, नांदगाव या तालुक्यांमधील महसूल खात्यातील तलाठी, मंडल अधिकाऱ्यांची नेमणूक करण्यात आली होती. पंचनाम्यांचे काम पूर्ण होत आल्याने नाशिक तालुक्याबाहेरील तलाठी रविवारी सायंकाळी त्यांच्या कार्यस्थळी रवाना झाले. पंचनामे करणाऱ्या पथकांकडून देण्यात येणारा अहवाल वस्तुस्थिती दर्शक असावा, त्यावर बाधित व्यक्तींची स्वाक्षरी असावी, अशा सूचना जिल्हाधिकाऱ्यांनी संबंधित अधिकाऱ्यांना दिल्या होत्या. संबंधित ठिकाणचे फोटो, व्हीडीओ शुटिंग करणे सक्तीचे होते. याबाबतच्या आदेशाची प्रत उपजिल्हाधिकारी उदय किसवे, प्रदीप भोये, दिपमाला चौरे, तहसीलदार गणेश राठोड यांसह महापालिकेच्या अधिकाऱ्यांना पाठविल्या होत्या.
७ ऑगस्टपर्यंत पंचनामे पूर्ण करण्याचे आदेश जिल्हाधिकाऱ्यांनी पथकांना दिले होते. सोमवारपर्यंत ९० टक्के पंचनामे पूर्ण झाल्याची माहिती नाशिक तहसील कार्यालयातून मिळाली. पंचनाम्याशिवाय त्यांनाही संबंधित विमा कंपन्यांकडून नुकसान भरपाई मिळत नसल्याने त्यांचे पंचनामे प्राधान्याने करण्यात आल्याचे सूत्रांकडून सांगण्यात आले.
मोबाइल अॅप डाउनलोड करा आणि राहा अपडेट
