उपनगर पोलिस स्टेशनच्या हद्दीत झालेल्या दुहेरी हत्याकांड प्रकरणात पोलिसांनी सात संशयितांना अटक केली आहे. वर्षभरापूर्वी झालेल्या भांडणाच्या कारणातून हे दुहेरी हत्याकांड घडल्याची माहिती पोलिस तपासात पुढे आली आहे.
परिमंडळ दोनचे पोलिस उपायुक्त श्रीकांत धिवरे यांनी दिलेल्या माहितीनुसार, अतिश कैलास निकम, नितीन निवृत्ती बनकर (दोघे रा. रोकडोबावाडी), प्रशांत नाना जाधव (रा. जाधव मळा), आकाश नामदेव खताळे, अमोल अंबादास पठाडे, गोविंदा शंकर इंगोले (तिघे रा. विहितगाव) यांच्यासह एका अल्पवयीन संशयिताला अटक करण्यात आली आहे.
सोमवारी (८ ऑगस्ट) रात्री साडेअकराच्या सुमारास रोकडोबावाडीतील वालदेवी नदीकिनारी अकबर शेख याचा मृतदेह आढळून आला होता. गुलाम शेख याचा उपचारादरम्यान मृत्यू झाला, तर संदीप जैन गंभीर जखमी असून, त्याच्यावर सिव्हिल हॉस्पिटलमध्ये उपचार सुरू आहेत. मृतांच्या नातलगांनी हा खुनाचा प्रकार असल्याचा दावा केल्यानंतर उपनगर पोलिसांनी गुन्हा दाखल केला. मृतदेहांचे विच्छेदन करणाऱ्या अधिकाऱ्यांनीही खुनाचा संशय व्यक्त केला होता. या प्रकरणाचा तपास करीत असताना पोलिसांनी आतिश निकम याला चौकशीसाठी ताब्यात घेतले. त्यानंतर या प्रकरणाचा उलगडा झाला. आतापर्यंत सात जणांना अटक करण्यात आली असून, तिघेजण पसार आहेत. पूर्ववैमनस्यातून हा प्रकार घडल्याची माहिती तपासात पुढे आली आहे.
मोबाइल अॅप डाउनलोड करा आणि राहा अपडेट
