रक्षाबंधन म्हणजे बहीण-भावातील नातेसंबंधांची वीण अधिक घट्ट करणारा सण. मात्र, असे काही समाजघटक असतात की, त्यांना या नात्याचे प्रेम मिळत नाही. बंदीजन हा त्यापैकीच एक घटक. आपल्या हातून काहीतरी चुकीचे घडल्यावर कारागृहात असलेल्या बंदीजनांना बहिणीची कमतरता जाणवू नये यासाठी सामाजिक बांधिलकीच्या नात्याने कम्युनिटी हेल्थ फाउंडेशन व डब्ल्यूओडब्ल्यू संघटनेतर्फे मध्यवर्ती कारागृहात भावुक वातावरणात रक्षाबंधन साजरे करण्यात आले. कारागृह अधीक्षक रमेश कांबळे यांच्या सहकार्याने हा विशेष सोहळा झाला.
महिलांनी बंदीजनांना राख्या बांधून या नात्याला उजाळा दिला. काही कैद्यांना यावेळी गहिवरून आले. या मानलेल्या भावांनी आपल्या वर्तनात सुधारणा करावी, ही ओवाळणी अनेक बहिणींनी मागितली गेली. कम्युनिटी हेल्थ फाउंडेशनच्या अश्विनी न्याहारकर म्हणाल्या की, आज विविध संधी उपलब्ध असताना वाईट घटना टाळता येऊ शकतात. गतकाळातील वाईट गोष्टी व कटू आठवणी मागे टाकून बंदीजनांनी नव्या दमाने व नव्या जोमाने आयुष्याला प्रारंभ करावा. या आगळ्यावेगळ्या सामाजिक कार्यक्रमाच्या यशस्वीतेबद्दल महिलांचे विशेष कौतुक करण्यात आले.
यावेळी मेघा मराठे, कामिनी तनपुरे, संगीता गायकवाड, जया आढाव, अश्विनी निकम, स्नेहा वर्मा, सीमा पाटील, प्रतिभा पाटील, नूतन पाटील, अरुणा पाटील आदींची उपस्थिती होती. कार्यक्रम यशस्वीतेसाठी अश्विनी
न्याहारकर व त्यांच्या सहकाऱ्यांनी विशेष प्रयत्न केले.
---
विविध संस्थांनीही घेतला पुढाकार
नाशिकरोड ः मध्यवर्ती कारागृहात शहरातील विविध संस्थांतर्फेदेखील रक्षाबंधन साजरे करण्यात आले. रेणुका महिला औद्यागिक सहकारी संस्थेतर्फे बंदीजनांचे औक्षण करून राखी बांधण्यात आली. यावेळी महिला आघाडी अध्यक्षा मंदा फड, जिजाबाई जाधव, सुनीता जाधव, कल्पना पोटिंदे, कांचन चव्हाण, शिवानी जाधव, दीपाली कुलथे, सुदाम निकम आदी उपस्थित होते. नाशिक सोशल सर्व्हिस सोसायटीतर्फे देशभक्तीपर सांस्कृतिक कार्यक्रम घेण्यात आले. संस्थेचे फादर आल्वीन व इतर महिला पदाधिकारी उपस्थित होत्या. त्यांनी दोनशे बंदीजनांना राख्या बांधल्या. झेप बहुउद्देशीय सामाजिक संस्थेच्या अध्यक्षा सुनीता निमसे व त्यांच्या सहकाऱ्यांनी दीडशे बंदीजनांना राख्या बांधल्या. नाशिकरोडच्या सॅव्ही कालेज आणि युवा मंचतर्फे रक्षाबंधन झाले. संचालिका श्रुती भुतडा, युवा मंचच्या अध्यक्षा स्मिता बोरा आदी उपस्थित होते. त्यांनीही बंदीजनांना राख्या बांधल्या. गोविंदा चॅरिटेबल ट्रस्टचे विश्वस्त राजेंद्र तिवारी यांच्या उपस्थितीत दीडशे बंदीजनांना राख्या बांधण्यात आल्या. कारागृह अधीक्षक रमेश कांबळे, उपअधीक्षक वैभव आगे, प्रमोद वाघ, वरिष्ठ तुरुंगाधिकारी कैलास भवर, एस. एस. कुंवर, जी. ए. मानकर, श्रीमती एन. वाय. गुजराथी, बी. एन. मुलाणी, तसेच विविध संस्थांचे पदाधिकारी उपस्थिती होते.
मोबाइल अॅप डाउनलोड करा आणि राहा अपडेट
