म. टा. प्रतिनिधी, नाशिक
ठेवीदारांना जादा आर्थिक परतावा देण्याचे आश्वासन देऊनही परतावा मिळत नसल्याचा आणखी एक प्रकार पुढे आला आहे. केबीसी, मैत्रेयमधील गुंतवणूकदारांच्या फसवणुकीचे प्रकार ताजे असताना आणखी एक मोठा घोटाळा उघडकीस येण्याची शक्यता असून, गंगापूर पोलिसांनी विद्याविकास सर्कल परिसरातील हाऊस ऑफ इन्व्हेस्टमेंट कंपनीशी संबंधित १० जणांवर गुन्हा दाखल केला आहे.
विनोद बाळू पाटील, महेश सुधाकर नेरकर, अनिल निवृत्ती कोठुळे, सतीश शेषराव कामे (चौघे रा. सिडको), सुशांत रमेश कोठुळे, भगवंत कोठुळे (दोघे रा. तपोवन), विजय लक्ष्मण खुनकर व सुरेखा भगवंत कोठुळे (दोघे रा. जेजुरकर मळा, तपोवन) रवींद्र पुंडलिक दळवी (रा. पंचवटी), दर्शन विजय शिरसाठ (रा. नाशिकरोड) अशी गुन्हा दाखल झालेल्या संशयितांची नावे आहेत. त्यांच्यावर फसवणुकीसह एमआयडीसी कायदा ३,४ सिक्युरीटीज कॉन्ट्रॅक्टर कायदा कलम १९५६ चे कलम २३ व कंपनी कायदा २०१३ चे कलम ३६७, ३७४, ७५/४४७ अन्वये गुन्हा दाखल करण्यात आला. विद्या विकास सर्कल परिसरात हाऊस ऑफ इन्व्हेस्टमेंट कंपनीसमोर गणोर हाईट्समध्ये २०१२ पासून हा प्रकार सुरू होता. विनोद पाटील हा या फसवणूक प्रकरणाचा मुख्य सूत्रधार असल्याची माहिती पोलिसांनी दिली आहे.
गणेश गुरूनाथ देसाई (३२, रा. शंकरनगर, टाकळीरोड, द्वारका) यांनी या प्र्रकरणी फिर्याद दिली आहे. आपली पावणे चार लाख रुपयांची फसवणूक झाल्याचे त्यांनी फिर्यादीत म्हटले आहे. नाशिक तालुक्यातील अनेक शेतकरी तसेच चाकरमान्यांची अशाप्रकारे फसवणूक होत असल्याचे प्रकार आता पुढे येऊ लागले आहेत. हाऊस ऑफ इन्व्हस्टमेंट कंपनीत ११ लाख रुपये गुंतविले असता सांगितल्याप्रमाणे परतावा न देता आपली फसवणूक करण्यात आल्याची कैफियत गिरणारे येथील गणेश काटे या शेतकऱ्याने मे महिन्यातच पोलिसांकडे मांडली होती. कंपनीचे संचालक सर्व गुंतवणूकदारांना पैसे परत देण्याचे आश्वासन देत होते. पोलिसांनीही त्यासाठी संबंधितांना वेळ दिला होता. मात्र, पैसे देण्याऐवजी त्यांच्याकडून टाळाटाळच सुरू असल्याने अखेर पोलिस आयुक्त एस. जगन्नाथन यांनी हाऊस ऑफ इन्व्हेस्टमेंट कंपनीशी संबंधितांवर गुन्हे दाखल करण्याचे आदेश अधिकाऱ्यांना दिले. त्यानुसार गुन्हा दाखल करण्यात आला.
आश्वासनांचे गाजर
साधारणतः पाच ते सहा महिन्यांपासून 'हाऊस ऑफ इन्व्हेस्टमेंट'च्या व्यवहारात अनियमितता सुरू झाली. व्याज मिळत नसल्याने गुंतवणूकदारांनी मुद्दलाची रक्कम परत मागण्यास सुरुवात केली. मागील महिन्यापर्यत सर्वांचे पैसे व परतावा करण्याचे आश्वासन दिले जात होते. पैसे मिळतील असा विश्वास असल्याने गुंतवणूकदार तक्रार दाखल करीत नव्हते. तसेच पोलिसांनीही अद्याप गुन्हा दाखल केला नव्हता. मात्र, आता गुन्हा दाखल झाल्याने आणखी काही गुंतवणूकदार तक्रार देण्यासाठी पुढे येण्याची शक्यता आहे.
कंपनीकडून परदेशात गुंतवणूक
वार्षिक २४ टक्के व्याज देण्याचे आमिष दाखवित हाऊस ऑफ इन्व्हेस्टमेंट प्रा. लिमिटेड कंपनीशी संबधित असणाऱ्यांनी कोट्यवधी रुपयांचा घोटाळा केल्याचा आरोप गुंतवणूकदारांकडून होतो आहे. कंपनीचे सुमारे ३० एजंट असून, त्यांच्यामार्फत ३ हजारांहून अधिक गुंतवणूकदारांकडून पैसे उकळण्यात आले आहेत. ही रक्कम विनोद पाटील याने पोर्टफोलिओ मॅनेजमेंट ऍण्ड सर्व्हिसेस, विनोद बुलियन्स दुबई, हाऊस ऑफ बुलियन्स, हाऊस ऑफ इन्व्हेस्टमेंट, हाऊस ऑफ बिल्डकॉन, हाऊस ऑफ ऍग्रो कम्युनिटी या व अन्य काही कंपन्यांच्या माध्यमातून शेअर मार्केट तसेच बांधकाम व्यवसायात गुंतविल्याची माहिती पुढे आल्याचे पोलिस सूत्रांचे म्हणणे आहे.
मोबाइल अॅप डाउनलोड करा आणि राहा अपडेट
