अखंड सौभाग्याचे वरदान मिळावे, यासाठी सुवासिनींनी मोठ्या उत्साहात हरतालिकेची पूजा केली. शहरातील सातपूर, नाशिकरोड भागातील महादेवाची मंदिरे रविवारी (दि. ४) सकाळपासून गजबजलेली दिसत होती. दिवसभर हरतालिकेचा उपवास करून मनोभावे हे व्रत पाळण्यात आले.
फुले, दुर्वा, विड्याची पाने, फळे, बेल, आघाडा, अत्तर असे विविध साहित्य घेण्यासाठी बाजार फुलला असल्याचे चित्र दिसून आले. रविवारी पहाटेही फुलबाजारात यासाठी अनेकींनी पूजेचे साहित्य खरेदी केले. त्यानंतर सर्व साहित्य, नैवेद्य घेऊन अनेकींनी महादेवांच्या मंदिरात पूजा केली. भाद्रपद महिन्यात शुक्ल पक्षाच्या तृतीयेस हरतालिकेचे व्रत केले जाते. हे व्रत करून पार्वतीने महादेवाला प्राप्त करून घेतले होते.
त्यामुळे आपल्या पतीप्रती श्रद्धा राखत महिलावर्गाचा याकडे अधिक कल असतो. पतीला दीर्घायुष्य मिळावे, तसेच कौटुंबिक चिंता दूर व्हाव्यात, अशी प्रार्थना करत भक्तीभावाने हे व्रत पूर्ण करण्यात आले.रात्री उशिरा महादेवाच्या आरत्या, देवाचे गाणे गाऊन सुवासिनी हरतालिका साजरी केली. सुवासिनींबरोबरच कुमारिकाही हे व्रत मनासारखा जोडीदार मिळावा, यासाठी करतात. महादेवाच्या मंदिरात त्यांचीही लगबग दिसून आली. अनेकींनी हे व्रत पहिल्यांदाच केलेले असल्याने त्यांच्यामध्ये मोठी उत्सुकता दिसून आली. हरतालिकेच्या व्रतामागील संकल्पना समजावून घेत कहाणीचे श्रवणदेखील केले.
देशस्थ ऋग्वेदी संस्थेत पूजन
नाशिक : देशस्थ ऋग्वेदी संस्थेच्या दुर्गा मंगल कार्यालयात सालाबादाप्रमाणे यंदाही हरतालिका पूजन मोठ्या उत्साहात यथाशास्त्र करण्यात आले. या कार्यक्रमाचे पौरोहित्य वेदमूर्ती पांडुरंगशास्त्री पैठणकर यांनी केले. सकाळी नऊ ते दुपारी चारपर्यंत सर्व समाजातील सुमारे सहाशे सुवासिनींनी मोठ्या भक्तीभावाने हरतालिका पूजन केले. कार्यक्रमाचे आयोजन देशस्थ ऋग्वेदी संस्थेच्या महिला शाखेच्या कार्याध्यक्षा जयश्री पोळ यांनी केले. तसेच महिला शाखेच्या सदस्या संध्या कुलकर्णी, सविता तारे, अनिता जस्ते, वनिता जालियलकर यांच्यासह अनेक महिला सदस्या उपस्थित होत्या. कार्यक्रमासाठी संस्थेचे कार्यवाह नरेंद्र कुलकर्णी, मकरंद सुखात्मे, बापू कुलकर्णी, अजय चौधरी, सचिन निरंतर, वसंत कुलकर्णी आदींसह सदस्यांनी परिश्रम घेतले.
मोबाइल अॅप डाउनलोड करा आणि राहा अपडेट
