एक तपापासून महसूल अधिकाऱ्यांचे जिल्ह्यातच बस्तान
pravin.bidve@timesgroup.com
Tweet : @bidvepravinMT
नाशिक : लोकशाहीत सरकारे बदलतात. आमदार, खासदारही बदलतात. राजकीय पक्षांमध्येही कधीतरी परिवर्तनाची लाट येतेच. परंतु नाशिकचा महसूल विभागातील 'विशिष्ट' अधिकारी मात्र वर्षानुवर्ष येथेच ठिय्या मांडून असल्याचे समोर आले आहे. यासाठी या बहाद्दरांनी सरकारी नियमावलीही खुंटीला टांगत अपेक्षित नियुक्त्या पदरात पाडून घेतल्या आहेत. विशेष म्हणजे आघाडीचे सरकार बदलून युतीचे सरकार आले तरीही 'त्यांचा' नाशिक मुक्काम कायम आहे. महेश पाटील, सरिता नरके, रामदास खेडकर, रमेश मिसाळ, प्रज्ञा मिसाळ अशी ही भली मोठी वतनदारांची नावे असून, तप उलटूनही अनेकांचा जिल्ह्यातच मुक्काम आहे. या अधिकाऱ्यांना नाशिकचा मोह सुटत नसल्याबद्दल आश्चर्य व्यक्त केले जात आहे.
जिल्ह्यातील महसूल यंत्रणा राजकीय लोकप्रतिनिधींपेक्षा महसूल विभागातील अधिकारीच चालवितात की, काय अशी शंकेची पाल आता चूकचूकू लागली आहे. महसूल आयुक्तांपासून सचिव आणि मंत्र्यांपर्यंत सर्वांवरच गारूड घालणाऱ्या काही अधिकाऱ्यांची नाशिकमध्येच मक्तेदारी निर्माण झाली आहे. कामावर, कलेवर खुश होऊन बादशहाने राजदरबारातील एखाद्याला वतनदारी बहाल करावी, तसा नाशिक जिल्हा मोजक्या अधिकाऱ्यांना आंदण देण्यात आल्याची चर्चा महसूल वर्तुळात कायम रंगत आली आहे. लोहचुंबकासारखे वर्षानुवर्ष जिल्ह्यातील विविध खुर्च्यांनाच चिकटून बसणारे अधिकारी एका पदावरून दुसऱ्या पदावर नियुक्ती मिळवित सेवेचा कार्यकाळ पूर्ण करीत असल्याचे निदर्शनास येऊ लागले आहे. विशेष म्हणजे आघाडीचे सरकार जाऊन आता युतीचे सरकार सत्तेवर आले तरीही काही अधिकाऱ्यांचा महसूल विभागावरील वरचष्मा कायम राहीला आहे.
अनेकांना नाशिक बहाल!
निफाडचे प्रांताधिकारी म्हणून अल‌िकडेच रूजू झालेले महेश पाटील ३ डिसेबर २००० ते आजतागायत म्हणजे तब्बल १६ वर्ष नाशिक जिल्ह्यातच तळ ठोकून आहेत. केवळ मार्च २००९ ते ऑगस्ट २०११ असे अडीच वर्ष ते अहमदनगरमध्ये नियुक्तीवर होते. पुरवठा अधिकारी पदावरील सरिता नरके २००३ ते २०१६ अशा तपाहूनही अधिक काळ नाशिकमध्ये कार्यरत आहेत. जिल्ह्यात १३ मे २००३ रोजी त्यांनी देवळा तहसीलदार म्हणून कामकाजाला सुरूवात केली. तेव्हापासून आजतागायत त्यांना एकदाही जिल्ह्याबाहेर बदली झालेली नाही. रामदास खेडकर यांनीही उपजिल्हाधिकारी, निफाड प्रांताधिकारी, एमआयडीसीचे प्रादेशिक अधिकारी म्हणून जबाबदारी पार पाडल्यानंतर निवासी उपजिल्हाधिकारी पदासारखी मोठी जबाबदारी देण्यात आली आहे. वर्षानुवर्ष नाशिक मुक्कामीच राहणाऱ्या अधिकाऱ्यांना टप्प्याटप्प्याने महत्त्वाच्या जबाबदाऱ्यांचीच बक्षिस मिळत आले आहे. त्यामुळे असे अधिकारी महसूल विभागात 'वजनदार' ठरू लागले आहेत. नाशिकबाहेर बदली झाली तरी काही काळ तेथे घालवून पुन्हा नाशिकमध्येच नियुक्ती मिळविण्याची कलाही अधिकाऱ्यांनी अवगत केली आहे. यात बाळासाहेब वाकचौरे, वासंती माळी, अजय मोरे, मधुमती सरदेसाई, रमेश मिसाळ, प्रज्ञा बढे-मिसाळ, विठ्ठल सोनवणे, उदय किसवे आदी अधिकाऱ्यांचा समावेश आहे.
कुटुंबाचे स्थैर्य, पाल्यांचे शिक्षण, उच्च दर्जाच्या वैद्यकीय सुविधा आणि मुंबईशी कनेक्ट‌िव्हीटी यामुळे अधिकाऱ्यांना महसूल विभागीय कार्यालयाच्या ठिकाणीच बदली हवी असते. नाशिकमध्येच नाही तर पुणे, औरंगाबाद, नागपूर, अमरावती, कोकण (मुंबई) या सहा विभागांतही अशीच परिस्थिती आहे. नाशिक विभागात जसे धुळे, नंदुरबार सारख्या जिल्ह्यांत जाणे अधिकाऱ्यांना शिक्षा वाटते तशीच अन्य विभागांमधील परिस्थिती असल्याचे समोर येत आहे.(क्रमशः)
अधिकाऱ्याचे नाव नाशकातील सरासरी कार्यकाळ
सरिता नरके- १३ वर्षे ३ महिने, महेश पाटील- १३ वर्षे ४ महिने, रामदास खेडकर- किमान १० वर्षे, रमेश मिसाळ- किमान १० वर्षे, प्रज्ञा मिसाळ- किमान १० वर्षे, मधुमती सरदेसाई- ९ वर्षे ६ महिने, उदय किसवे- ९ वर्षे २ महिने, बाळासाहेब वाकचौरे- ६ वर्षे ७ महिने, विठ्ठल सोनवणे- ६ वर्षे ३ महिने, वासंती माळी- ४ वर्षे १० महिने, अजय मोरे- ४ वर्षे ७ महिने
मोबाइल अॅप डाउनलोड करा आणि राहा अपडेट
