म. टा. खास प्रतिनिधी, नाशिक
नवरात्रोत्सवाच्या पार्श्वभूमीवर वणी येथील सप्तशृंगीदेवी दर्शनाला जाणाऱ्या भाविकांसाठी राज्य परिवहन महामंडळातर्फे २८० जादा बसेसचे नियोजन केले आहे. भाविकांची वाढती संख्या लक्षात घेऊन जिल्हाभरातील १३ आगारातून १९५ बसेस थेट सप्तशृंगी गडावर जाणार आहेत. तर ८५ बसेस या नांदुरी फाटा ते सप्तशृंगी गड येथे जाणार आहे.
महामंडळाने नवरात्रोत्सव काळातील १ ते ११ ऑक्टोबरचे नियोजन केले असून त्यासाठी सर्व आगारांना नियोजनाचे पत्र पाठवले आहे. पहिले तीन दिवस कळवण आगारातून नांदुरी फाटा ते सप्तशृंगी गड अशी वाहतूक करणार आहे. त्यानंतर गर्दीनुसार सटाणा, मालेगाव व इतर आगारातून बस मागवण्याच्या सूचना केल्या आहे. या बसेसमध्ये मालेगाव, मनमाड, सटाणा, सिन्नर, नांदगाव, इगतपुरी, लासलगाव, पेठ, येवला, पिंपळगाव यांच्या प्रत्येकी पाच बसेस असणार आहेत. तर कळवण आगारातून ३५ बसेस असणार आहे. या सर्व बस ४ ते ११ ऑक्टोबरपर्यंत धावणार आहेत.
गडावर जाण्यासाठी नाशिक एकमधून ३० व नाशिक दोनमधून २५ बसेस जुने सीबीएस येथून धावणार आहेत. मालेगाव २०, मनमाड १५, सटाणा १५, सिन्नर १०, नांदगाव १०, इगतपुरी १०, लासलगाव १०, कळवण १५, पेठ १०, येवला १०, पिंपळगाव १५ अशा एकूण १९५ बसेस असतील.
महामंडळाने आगाराला दिले दिनविशेष
गर्दीचे नियोजनासाठी महामंडळाने आपल्या पत्रात दिनविशेषसुध्दा दिले आहे. यात १ ऑक्टोबरला घटस्थापना, २ ऑक्टोबरला गांधी जयंती, ३ ऑक्टोबरला मोहरम मासारंभ, ४ ऑक्टोबरला चौथी माळ, पाच ऑक्टोबरला विनायक चतुर्थी, सहा ऑक्टोबरला ललिता पंचमी, ७ ऑक्टोबरला सातवी माळ, ८ ऑक्टोबरला महालक्ष्मी पूजन, ९ ऑक्टोबरला दुर्गाष्टमी, महालक्ष्मी उपवास, आठवी माळ, १० ऑक्टोबरला महानवमी, नवरात्री स्थापना व उपवास पारणा, ११ ऑक्टोबरला विजयादशमी (दसरा) हे दिन असल्याचा तक्ता दिला आहे.
मोबाइल अॅप डाउनलोड करा आणि राहा अपडेट
