शाळा-कॉलेजेसही बंद!

September 20, 2016, 3:30 pm

≪ Previous: मनसेच्या ‘त्या’ आंदोलनात कायकर्ते दोषी

बहुतांश संस्थांकडून सुटी जाहीर

म. टा. प्रतिनिधी, नाशिक

नगर जिल्ह्यातील कोपर्डी घटनेच्या निषेधार्थ शनिवारी (२४ सप्टेंबर) शहरात निघणाऱ्या मोर्चाचा परिणाम इतर क्षेत्रांप्रमाणे शाळा आणि कॉलेजेसवरही होणार आहे. मोर्चाच्या निमित्ताने शहरात दाखल होणारी संभाव्य गर्दी लक्षात घेता काही शैक्षणिक संस्थांनी शाळा व कॉलेजेसना सुटी जाहीर केली आहे. तर, काही शाळांकडून याबाबत अद्याप घोषणा झालेली नाही. तरीही शनिवारी विद्यार्थ्यांच्या उपस्थितीवर विशेष परिणाम जाणवणार आहे.

मोर्चामधील सहभागींची संभाव्य अफाट संख्या लक्षात घेता आयोजकांनीही शिस्तबध्दतेवर भर दिला आहे. ऐनवेळी शहरातील वाहतूक व्यवस्थेवर तणाव निर्माण होऊ नये, यासाठी शहराच्या चारही बाजूकडील मोकळ्या मैदानांवर बाहेरून येणाऱ्या वाहनांचे पार्किंग ठेवण्यात आले आहे. विविध विभागांमधून नाशिककडे येणाऱ्या वाहनांसाठी ठराविक विभागातच पार्किंगची व्यवस्था करण्यात आली आहे. मोर्चातील सर्व सदस्य हे जनार्दन स्वामी मठ नजीक तपोवनाच्या परिसरात एकत्रित जमणार आहेत. ही संख्या सुमारे १५ ते २० लाखांच्या घरात असल्याचा अंदाज प्रशासनाने वर्तवला आहे. परिणामी शहरातील वाहतुकीसह सर्व मार्गांचे नियोजनही अत्यंत काटेकोरपणे पोलिसांना करावे लागणार आहे. याचा मोठा परिणाम शहराच्या विविध भागातून होणाऱ्या विद्यार्थी वाहतुकीवर होण्याची शक्यता काही शाळांनी लक्षात घेऊन सुटी जाहीर केली आहे. तर, काही संस्थांनी अद्याप सुटीची घोषणा केलेली नाही. अनेक इंग्रजी माध्यमाच्या शाळांना दुसऱ्या व चौथ्या शनिवारी सुटी असते. त्यानुसार या शाळाही मोठ्या संख्येने त्या दिवशी बंद असतील. सुटी जाहीर करण्यात आलेल्या संस्थांमध्ये मराठा विद्या प्रसारक समाज, महात्मा गांधी विद्यामंदिर, जी. डी. सावंत कॉलेज, सपकाळ नॉलेज हब, ग्रामोदय शिक्षण संस्था, ब्रह्मा व्हॅली, एनआयटी पॉलिटेक्निक, धन्वंतरी मेडिकल कॉलेज आदी संस्थांनी सुटी जाहीर केली आहे. इतर मोठ्या शैक्षणिक संस्थांमध्ये यासंदर्भात विचारविनिमय सुरू आहे.

Latest Images