म. टा. वृत्तसेवा, सटाणा
बागलाण तालुक्याच्या पाणीप्रश्न सोडविण्यासाठी विविध सिंचन योजना हाती घेतल्या आहेत. पहिल्या टप्प्यात नदी पुनरुज्जीवन कार्यक्रमांतर्गत आरम, हत्ती आणि कान्हेरी या तीनही नद्यांवर चौदा भूमिगत सिमेंट बंधारे प्रस्तावित करण्यात आल्याची माहिती केंद्रीय संरक्षण राज्यमंत्री डॉ. सुभाष भामरे यांनी दिली.
पहिल्या टप्प्यात आरम, हत्ती आणि कान्हेरी या नद्यांवर नदी पुनर्जीवन कार्यक्रम राबविण्यात येणार आहे. या कार्यक्रमांतर्गत आरम नदीवरील मुंजवाड, मळगाव, खमताणे, हत्ती नदीवरील औंदाणे, मुंजवाड, वटार, चौंधाणे, वनोली, तरसाळी, विंचुरे, कंधाणे, जोरण व कान्हेरी नदीवरील वटार, वनोली येथील शिवारात चौदा भूमिगत सिमेंट बंधारे प्रस्तावित केले आहेत. ही कामे मंजुरीच्या अंतिम टप्प्यात असून, त्यासाठी बारा कोटी रुपयांचा निधी अपेक्षित असल्याचे डॉ. भामरे यांनी सांगितले. दुसऱ्या टप्प्यात मोसम, करंजाडी व दोध्याड या नद्यांवर नदी पुनर्जीवन कार्यक्रम राबविण्यात येणार असल्याचे डॉ. भामरे यांनी सांगितले.
हरणटेकडी, साल्हेर व गणपती घाट या वळण योजना पूर्ण झाल्या असून, सुमारे ५३ दशलक्ष घनफूट अतिरिक्त पाणी उपलब्ध झाले आहे. हे पाणी गुजरातकडे वाहून जात होते. वाघंबा (शेरमाळ) डोंगरावरील पाणीदेखील गुजरातकडे मोठ्या प्रमाणात वाहून जात आहे. ते पाणी मोसम नदीत वळविण्यासाठी नव्याने वळण योजना तयार करण्यात येणार आहे. त्याचे लवकरच सर्व्हेक्षण करून अंदाजपत्रक तयार करण्याच्या सूचना अधीक्षक अभियंत्यांना दिल्या असल्याचे डॉ. भामरे यांनी नमूद केले.
तळवाडे भामेर कालव्यासाठी निधी मंजूर
तळवाडे भामेर पोच कालव्याचे काम पूर्णत्वास नेण्यासाठी शासनाने सतरा कोटी रुपयांचा निधी नुकताच मंजूर केला असल्याचे डॉ. भामरे यांनी सांगितले. या कामामुळे काटवनचा पाणीप्रश्न सुटण्यास मदत होणार आहे. तसेच हरणबारी डाव्या कालव्याचे काम अनेक वर्षांपासून प्रलंबित होते. हे काम मार्गी लावण्यासाठी सुधारित जलनियोजनस मान्यता घेतली आहे. प्रलंबित कामासाठी सुधारित प्रशासकीय मान्यतेसाठी प्रस्ताव समितीपुढे सादर करण्यात आला असून, या कामासाठी ५९ कोटी रुपयांच्या निधीची आवश्यकता आहे. हरणबारी उजव्या कालव्याच्या पुढील कामासाठी तत्कालीन सरकारने पाणी उपलब्ध नसल्याचे कारण दाखवत नकार दिला होता. हे काम मार्गी लावण्यासाठी जलसंपदामंत्र्यांनी हिरवा कंदील दिला असून, पारनेर ते सातमाणेपर्यंत कालव्याचे नव्याने सर्व्हेक्षण करण्याची मागणी केल्याचे त्यांनी सांगितले.
मोसम, आरम नदीवर केटीवेअर
बागलाण तालुक्यातील नद्या बारमाही करण्यासाठीही आपला शासनस्तरावर प्रयत्न सुरू असून, त्यासाठी मोसम नदीवर पाच ठिकाणी व आरम नदीवर चार ठिकाणी केटीवेअर बंधारे मंजुरीसाठी सादर केले असल्याचे डॉ. भामरे यांनी सांगितले. त्याच्या सोमपूर, नामपूर, मोराणे येथे प्रत्येकी एक व अंबासन येथे दोन केटीवेअर बंधारे प्रस्तावित करण्यात आले आहेत. आरम नदीवरील चौंधाणे, कंधाणे, मुंजवाड, दहिंदुले येथे प्रत्येकी एक बंधारा घेण्यात येणार आहे. या सर्व बंधाऱ्यांची क्षमता पाच दशलक्ष घनफुटाच्या आत राहणार आहे. त्याच्यात नामपूर येथील ४.८७ दशलक्ष घनफूट क्षमता असलेल्या बंधाऱ्याला तांत्रिक मंजुरी मिळाली असल्याचे डॉ. भामरे यांनी सांगितले. हे साखळी पद्धतीचे बंधारे राहणार असल्यामुळे या नद्या बारमाही होऊन पाणीप्रश्न निकाली काढण्यास मदत होणार आहे.
जलयुक्त शिवारांतर्गत तेरा सिमेंट बंधारे
बागलाणमध्ये जलयुक्त शिवार योजनेंतर्गत यंदा तेरा गावांना सिमेंट काँक्रीट बंधारे मंजुरीसाठी सादर करण्यात आल्याचे डॉ. भामरे यांनी सांगितले. त्याच्यात सुराणे व देवळाणे येथे प्रत्येकी दोन, भाक्षी, दरेगाव, टेंभे खालचे, टेंभे वरचे, कांद्याचा मळा, जामोटी, अजमेर सौंदाणे, बिजोटे, पारनेर येथे प्रत्येकी एक सिमेंट काँक्रीट बंधारा बांधण्यात येणार आहे. त्यापैकी बिजोटे व पारनेर येथील बंधाऱ्यांना प्रशासकीय मान्यता मिळाली असून, निविदा स्तरावर आहे.
मोबाइल अॅप डाउनलोड करा आणि राहा अपडेट
