तळेगाव (अंजनेरी) घटनेचे पडसाद, जनजीवन विस्कळीत
टीम मटा
त्र्यंबकेश्वर तालुक्यातील तळेगाव (अंजनेरी) येथे पाच वर्षांच्या चिमुरडीवरील बलात्कार प्रकरणाचे संपूर्ण नाशिक जिल्ह्यात तीव्र पडसाद उमटले. जिल्हाभरात रास्ता रोको आंदोलन करीत संशयित आरोपीवर कडक कारवाई करण्याची मागणी करण्यात आली. दरम्यान, रास्ता रोकोमुळे जिल्हाभरात ठिकठिकाणी वाहतूक ठप्प झाली होती. अचानक झालेल्या या आंदोलनामुळे जनजीवन विस्कळीत होऊन पोलिस प्रशासनाची धावपळ उडाली.
बागलाणमध्ये रास्ता रोको
तळेगाव घटनेच्या निषेधार्थ सटाणा शहरासह तालुक्यातील नामपूर येथे रास्ता रोको आंदोलन छेडण्यात आले. सटाणा बसस्थानकासमोर मनसे व मराठा क्रांती मोर्चाच्या कार्यकर्त्यांनी रास्ता रोको आंदोलन केले. यावेळी नायब तहसीलदार आबासाहेब तांबे यांना निवेदन देण्यात आले. यामध्ये मनसेचे शहराध्यक्ष पंकज सोनवणे, मनोज सोनवणे, वैभव सोनवणे, डॉ. आशिष सूर्यवंशी, सुमित वाघ, अनिल सोनवणे, योगेश सोनवणे, अमोल पवार, माजी नगराध्यक्ष विजय वाघ, पंचायत समिती उपसभापती वसंत भामरे, ज. ल. पाटील आदींसह कार्यकर्ते उपस्थित होते.
देवळावासीयांचा इशारा
देवळा येथील सकल मराठा समाजाच्या तरुणांनी पाचकंदील येथे रास्ता रोको आंदोलन छेडले. युवानेते संभाजी आहेर, सामाजिक कार्यकर्ते पंकज अहिरराव, शिवसंग्रामचे उदयकुमार आहेर, अतुल आहेर, राजेश आहेर आदींनी मराठा समाजाच्या भावनांची दखल न घेतल्यास आंदोलन तीव्र करण्याचा इशारा दिला. यावेळी लक्ष्मीकांत आहेर, जितेंद्र आहेर, सुनील आहेर, भाऊसाहेब पगार, जगदीश पवार, नानू आहेर, उमेश आहेर, प्रतीक आहेर, कौतिक पवार, बंडूनाना आहेर, प्रदीप आहेर, बाळासाहेब शिंदे आदी उपस्थित होते. यावेळी तळेगाव येथील नराधमाला त्वरित फाशीची शिक्षा देण्यात यावी, अशा आशयाचे निवेदन श्रुतिका आहेर व समृद्धी आहेर यांच्या हस्ते पोलिस निरीक्षक सतीश माने, तलाठी राजेंद्र गुंजाळ यांना देण्यात आले. आंदोलनामुळे विंचूर-प्रकाशा मार्गावरील वाहतूक ठप्प झाली होती.
निफाडमध्ये नागरिक रस्त्यावर
निफाड परिसरातील नागरिकांनी तीव्र संताप व्यक्त केला आहे. निफाड, नैताळे, पिंपळस, ओझर आदी ठिकाणी नागरिकांनी रास्ता रोको केला. निफाड येथील शांतीनगर चौफुली यथे राष्ट्रवादीचे तालुकाध्यक्ष अनिल कुंदे यांच्या नेतृत्वाखाली अर्धा तास रास्ता रोको करण्यात आला. अत्याचार करणाऱ्या नराधमाला फासावर लटकवा, अशी मागणी यावेळी आंदोकानी केली. वाल्मीक कापसे, विक्रम रंधवे, मधुकर कापसे, भीमराज काळे, देवदत्त कापसे, संपतराव व्यवहारे, दीपक गाजरे, महेश चोरडिया आदी उपस्थित होते. नैताळे येथे राष्ट्रवादीचे कार्याध्यक्ष राजेंद्र बोरगुडे यांच्या नेतृत्वाखाली अर्धा तास रास्ता रोको करण्यात आला. यावेळी अण्णा बोरगुडे, उपसरपंच अरविंद बोरगुडे, महेश बोरगुडे, दिलीप घायाळ, दादा बोरगुडे उपस्थित होते. पिंपळस रामाचे येथेही नाशिक-औरंगाबाद महामार्ग, ओझरजवळ दहावा मैल या मुंबई महामार्गावरही रास्ता रोको करण्यात आला.
कळवणला निवेदन
कायदा व सुव्यवस्थेच्या दृष्टीने कळवणमध्ये शांतता अबाधित राहावी म्हणून तहसीलदार कैलास चावडे यांनी आयोजित केलेल्या बैठकीत मराठा समाजाच्यावतीने निवेदन देण्यात आले. पीडित मुलीला १० लाखांची शासनाने आर्थिक मदत करावी, अशी मागणी करण्यात आली. या प्रसंगी प्रदीप पगार, सुधाकर पगार, निंबा पगार, मोतीराम पगार, ललित आहेर, प्रकाश आहेर, कौतीक पगार, सुभाष शिरोडे, जितेंद्र पगार, शशिकांत पाटील, टिनू पगार, अतुल पगार आदी उपस्थित होते.
दिंडोरीत कारवाईची मागणी
जानोरी दहावा मैल मुंबई-आग्रा महामार्गावर ओझर, जानोरी व जऊळके दिंडोरी येथील संतप्त नागरिकांनी अर्धा तास रास्ता रोको करून निषेध नोंदवला. या प्रसंगी निफाडचे तहसीलदार भामरे व ओझरचे पोलिस निरीक्षक यांना निवेदन देऊन संशयित आरोपीला कठोर शासन करण्यात यावे, अशी मागणी करण्यात आली.
चांदवडमध्ये वाहतूक ठप्प
चांदवडमध्ये तीव्र पडसाद उमटले असून, या घटनेच्या निषेधार्थ तसेच संशयितावर कठोर कारवाई करावी, या मागणीसाठी रविवारी मराठा समाज बांधवानी एकत्रित येऊन चांदवड चौफुलीवर अर्धा तास रास्ता रोको आंदोलन केले. अचानक झालेल्या या आंदोलनामुळे पोलिस प्रशासनाची धावपळ उडाली. नाशिक-मालेगावकडे जाणारी वाहतूक ठप्प झाली. माजी आमदार शिरीष कोतवाल, बाजार समिती सभापती डॉ. आत्माराम कुंभार्डे, उपसभापती नितीन आहेर, अनिल काळे, डॉ. गवांदे, संजय जाधव, दत्तात्रय गांगुर्डे, बाळासाहेब जाधव, रमाकांत जामदार आदी उपस्थित होते.
सिन्नरला आंदोलन
अत्याचार घटनेच्या सिन्नर येथे प्रतिक्रिया उमटल्या असून, मराठा क्रांती मोर्च्याच्या समितीच्या वतीने नाशिक-पुणे महामार्गावरील आडवा फाट्यावर रास्ता रोको करण्यात आला. संध्याकाळी साडेसहा वाजता मराठा क्रांती मोर्चाच्या समितीच्या वतीने रास्ता रोको करण्यात आला. या प्रकरणी अत्याचार करणाऱ्या नराधमावर पोलिसांनी कारवाई करावी, अशी मागणी करण्यात आली. या प्रसंगी पोलिस निरीक्षक राजेश शिंगटे यांना निवेदन देण्यात आले. रास्ता रोको केल्यामुळे नाशिक पुणे महार्गावर वाहनांच्या रांगा लागल्या होत्या.
मोबाइल अॅप डाउनलोड करा आणि राहा अपडेट
