लोकसभा निवडणुकीप्रमाणेच नगरपालिका निवडणुकांची आचारसंहिता जिल्हाभर लागू करण्यात आली आहे. या आचारसंहितेची काटेकोर अंमलबजावणी होईल याकडे लक्ष द्या, गाफील राहू नका, असे आदेशच जिल्हाधिकाऱ्यांनी यंत्रणेला दिले आहेत. सणासुदीच्या निमित्ताने उमेदवार कुठल्या ना कुठल्या प्रकारे मतदारांना प्रलोभने दाखवितात. मात्र त्यावर होणारा खर्चही निवडणुकीच्या खर्चात मोजला जाईल, असे मंगळवारी जिल्हाधिकाऱ्यांनी स्पष्ट केले.
नगरपालिका निवडणुकीचा बिगूल वाजला असून, रविवारी २७ नोव्हेंबरला जिल्ह्यातील सहा नगरपालिकांमधील १३२ जागांसाठी मतदान प्रक्रिया राबवली जाणार आहे. निवडणुकीचा कालबध्द कार्यक्रम निवडणूक आयोगाने जाहीर केला आहे. नाशिक जिल्ह्यात भगूर, सिन्नर, येवला, नांदगाव, मनमाड आणि सटाणा या सहा नगरपालिकांमध्ये मतदान प्रक्रिया राबविण्यात येणार आहे. एका जिल्ह्यात चारहून अधिक नगरपालिकांमध्ये निवडणूक होत
असल्याने आयोगाच्या निर्देशानुसार पूर्ण जिल्ह्यात आचारसंहिता लागू करण्यात आल्याची माहिती जिल्हाधिकारी राधाकृष्णन बी यांनी दिली. आचारसंहितेच्या अंमलबजावणीबाबत माहिती देण्यासाठी जिल्हाधिकाऱ्यांनी बैठक बोलावली होती. ही निवडणूक तसेच आयोगाचे निर्देश गांभीर्याने घ्या, अंमलबजावणीचे काटेकोरपणे पालन होईल याची काळजी घ्या, असे आदेश त्यांनी यंत्रणेला दिले. त्यानंतर पत्रकार परिषद घेऊन त्यांनी निवडणूक प्रक्रिया अन त्या अनुषंगाने येणाऱ्या आचारसंहितेबाबत माहिती दिली. यावेळी अपर जिल्हाधिकारी कान्हुराज बगाटे, मालेगावचे अपर जिल्हाधिकारी दिलीप स्वामी, निवासी उपजिल्हाधिकारी रामदास खेडकर, उपजिल्हाधिकारी शशिकांत मंगरूळे आदी उपस्थित होते. लोकसभा, विधानसभा निवडणुकीप्रमाणेच ही आचारसंहिता असणार आहे. महापालिका क्षेत्रासह ती संपूर्ण जिल्ह्यात लागू राहणार आहे.
तपासणीसाठी पथक
आचारसंहितेची प्रभावीपणे अंमलबजावणी होतेय की नाही हे तपासण्यासाठी जिल्हा प्रशासनाचे फ्लाईंग स्कॉड, व्हीजिलन्स स्कॉड, अकाउंटिंग टीम कार्यरत राहणार आहे. झोनल अधिकाऱ्यांची नियुक्ती करण्यात येणार असून, निवडणूक कामाशी संबंधित अधिकारी, कर्मचाऱ्यांना प्रशिक्षणही देण्यात येणार आहे.
अशी असेल आदर्श आचारसंहिता
सभेच्या ठिकाणांचे सर्व पक्षांना समन्यायी पध्दतीने वाटप, प्रचारकाळात हेलिकॉप्टरचा वापर झाल्यास उमेदवाराच्या निवडणूक खर्चात समावेश, झेंडे, खुर्च्या, व्यासपीठाचा खर्चही लावण्यात येणार, प्रसिध्दी पत्रकांवर छापील पत्रकांची संख्या आणि मुद्रकाचे नाव बंधनकारक, मुद्रकाचे नाव नसल्यास त्याच्यावर कायदेशीर कारवाई, प्रचारासाठी तीन वाहने वापरण्यास परवानगी, बल्क मेसेजेसचा खर्चही मोजला जाणार, सोशल मीडियावरून आक्षेपार्ह मजकूर प्रसारीत केल्यास कारवाई, मंदिर व तत्सम धार्मिक स्थळांवर सभा घेण्यास मज्जाव, परीक्षाकाळात शाळा, महाविद्यालयांजवळ सभेला परवानगी नाही, पक्ष, उमेदवारांकडून मतदारांना प्रलोभने दाखविण्यास मज्जाव, परवानाधारक उमेदवारांना शस्त्र जमा करावी लागणार, रात्री १० नंतर सभेला परवानगी नाही, सरकारी विश्रामगृह, सरकारी वाहनांचा वापर करता येणार नाही, नव्याने निविदा काढता येणार नाही,
अधिकाऱ्यांसाठी आदेश
मतदारसंघातील प्रत्येक प्रभागाला भेट देऊन सूक्ष्म नियोजन करा. निवडणुकांच्यादृष्टीने आवश्यक पथके तयार करा. मतदार जागृतीवर विशेष भर द्या. नगरपरिषदेच्या ठिकाणी नियंत्रण कक्ष स्थापित करा. सभास्थळ अथवा इतर कोणत्याही परवानगी देताना प्रथम येणाऱ्यास प्राधान्य द्या.
सर्व उमेदवारांना समान न्याय या तत्त्वाचे पालन करा. महामंडळ, स्थानिक स्वराज्य संस्था, बाजार समिती आदींकडील पदाधिकाऱ्यांना देण्यात आलेली वाहने ताब्यात घ्या. प्रचार सभा किंवा जाहिरातीतून सामाजिक तेढ निर्माण करणारे संदेश प्रसारीत होणार नाहीत यावर लक्ष ठेवा.
मोबाइल अॅप डाउनलोड करा आणि राहा अपडेट