नाशिक शहरातील नागरिकांना वाहतुकीच्या नियमांचे पालन करण्याबाबत, दक्षता घेण्याबाबत विश्वास बँकेने तयार केलेल्या अभिनव दिवाळी शुभेच्छापत्राचे प्रकाशन करण्यात आले. नुकतेच हे शुभेच्छापत्र प्रकाशित करण्यात आले आहे. ही संकल्पना विश्वास ठाकूर यांची आहे.
तिडके कॉलनी येथील चिल्ड्रन ट्रॅफिक पार्कच्या सभागृहात झालेल्या खास समारंभात पोलिस आयुक्त रवींद्र सिंघल, नाशिक महापालिकेचे आयुक्त अभिषेक कृष्णा, महापौर अशोक मुर्तडक, पोलिस उपायुक्त विजय पाटील, उपप्रादेशिक परिवहन अधिकारी भरत कळसकर, नाशिक फर्स्टचे अभय कुलकर्णी यांच्या हस्ते शुभेच्छापत्राचे प्रकाशन करण्यात आले.
नाशिकच्या वाढत्या रहदारीच्या समस्यांवर तोडगा काढण्यासाठी सर्वांनी पुढे येणे गरजेचे असल्याचे, तसेच याच सामाजिक जाणिवेतून हा उपक्रम राबविण्यात येत असल्याचे विश्वास ठाकूर यांनी सांगितले. या वेळी विश्वास बँकेतर्फे पन्नास हजार रुपयांची देणगी या उपक्रमासाठी देण्याचे ठाकूर यांनी जाहीर केले.
जनसामान्यांमध्ये वाहतूक नियमांविषयी जागृती व सजगता निर्माण व्हावी व त्यासाठी विश्वास को-ऑप. बँकेने घेतलेला पुढाकार कौतुकास्पद असल्याचे मत उपस्थित मान्यवरांनी या वेळी व्यक्त केले. वाहतुकीविषयी रस्ता ओलांडण्याचा प्रभावी जागृतीपर संदेश शुभेच्छापत्रातून देण्यात आला आहे.
बँकेने ‘मतदान’ करण्याविषयी जनजागृतीपर संदेश दिला होता. त्यालाही उत्स्फूर्त प्रतिसाद लाभला व त्याचेही समाजातील सर्व थरातील जनतेने स्वागत केले. याबरोबरच ‘मतदान’ करणाऱ्या बँकेच्या सभासदांना आकर्षक भेटवस्तू म्हणून पैसे साठविण्याचा डबा देण्यात आला. सुमारे ५००० खातेदारांनी सक्रिय सहभाग नोंदविला.
या शुभेच्छापत्रांच्या माध्यमातून बँकेने नेहमीच समकालीन विषयांचे प्रबोधनपर संदेश दिलेले आहे. ‘स्वाइन फ्लू’ रोगाविषयक प्रतिबंधक उपाय म्हणून माहितीपत्रकांचे वाटप करण्यात आले. सुमारे तीन लाखांहून अधिक पत्रके शाळा-महाविद्यालये, मेडिकल स्टोअर्स, बस/रेल्वे स्थानक इत्यादी ठिकाणी वाटप करण्यात आली. अंधश्रद्धा निर्मूलन, ध्वनिप्रदूषण, मोबाइल वापरताना घ्यावयाची काळजी, रोज चालण्याचे फायदे, हृदयरोग टाळण्यासाठी घ्यावयाची काळजी, पाण्याची बचत, रस्ता सुरक्षा अशा अनेक विषयांवर लोकप्रबोधनात्मक जाणिवेतून याआधी शुभेच्छा कार्ड तयार करण्यात आली होती.
मोबाइल अॅप डाउनलोड करा आणि राहा अपडेट
