म. टा. खास प्रतिनिधी, नाशिक
हजार-पाचशेच्या नोटा चलनातून बाद झाल्या असल्या, तरी कर भरण्यासाठी या जुन्या नोटांचा पर्याय राज्य सरकारने उपलब्ध करून दिल्याचा नागरिकांनी चांगलाच लाभ घेतला आहे. घरपट्टी व पाणीपट्टीसह विविध करांपोटी दोन दिवसांत पालिकेच्या तिजोरीत तब्बल बारा कोटी रुपयांची रक्कम जमा झाली आहे. शुक्रवारी नऊ कोटी ५० लाख, तर शनिवारी दीड कोटीची रक्कम पालिकेच्या तिजोरीत पडल्याने पालिका दोन दिवसांत मालामाल झाली आहे. कर भरण्यासाठी राज्य सरकारने मुदतवाढ केली असली, तरी शनिवारी वसुलीला फारसा प्रतिसाद मिळाला नसल्याचे चित्र होते.
महापालिकेने विविध करांचा भरणा पाचशे व हजारांच्या नोटांद्वारे स्वीकारण्याचे जाहीर केल्यानंतर शुक्रवारी व शनिवारी महापालिकेवर हजार व पाचशेच्या नोटांचा अक्षरशः पाऊस पडला. शुक्रवारी एका दिवसात पालिकेच्या तिजोरीत घरपट्टी व पाणीपट्टीपोटी नऊ कोटी ५० लाख रुपये जमा झाले आहेत. सरकारने कर भरण्यासाठी जुन्या नोटांची मुदत आणखी तीन दिवस वाढवल्याने महापालिकेने शनिवार, रविवार व सोमवार असे तीन दिवस कर स्वीकारण्याची व्यवस्था केली. परंतु, शनिवारी मात्र या वसुलीला थंड प्रतिसाद मिळाला. शुक्रवारच्या मानाने शनिवारी मात्र नागरिकांनी कर भरण्यासाठी गर्दी केली असली, तरी करदात्यांची संख्या रोडावली होती. रविवार व सोमवार असे दोन दिवस त्यात आणखी वाढ होण्याची शक्यता आहे.
शनिवारी दिवसभरात घरपट्टीतून पालिकेला एक कोटी चार लाख रुपये मिळाले, तर पाणीपट्टीतून ३२ लाख रुपये मिळाले आहेत. एमटीएस विभागाला दिवसभरात १९ लाख रुपये मिळाले. पहिल्या दिवशी महापालिकेला ६५ लाख, दुसऱ्या दिवशी साडेनऊ कोटी, तर तिसऱ्या दिवशी दीड कोटी रुपये मिळाले आहेत. त्यामुळे अडीच दिवसांत महापालिकेची तब्बल बारा कोटींची कमाई झाली आहे. रविवार व सोमवार असे दोन दिवस अजून वसुली सुरू ठेवण्यात आली असल्याने हा आकडा वाढण्याची शक्यता आहे.
मंगळवारपासून जप्तीची कारवाई
घरपट्टी व पाणीपट्टीसह विविध करांपोटी दोन दिवसांत पालिकेच्या तिजोरीत मोठी भर पडल्याने महापालिका मालामाल झाली आहे. कर भरण्यासाठी राज्य सरकारने मुदतवाढ दिल्याने दोन दिवसांत अाणखी मोठ्या प्रमाणात करभरणा केला जाणार आहे. या पार्श्वभूमीवर येत्या मंगळवार (दि. १५)पासून महापालिकेच्या वतीने घरपट्टी व पाणीपट्टी थकविणाऱ्यांवर जप्तीची कारवाई करण्यात येणार आहे. घरपट्टी थकविणाऱ्यांवर मालमत्ता जप्तीची, तर पाणीपट्टी थकविणाऱ्यांवर पाण्याचे कनेक्शन तोडण्याची कारवाई करण्यात येणार असल्याची माहिती महापालिकेच्या वतीने देण्यात आली.
विभागनिहाय स्थिती अशी
विभाग घरपट्टी (रुपये) पाणीपट्टी (रुपये)
सातपूर ७ लाख ६४ हजार ३ लाख ६० हजार
नाशिक पश्चिम १६ लाख ८६ हजार ३ लाख ४३ हजार
नाशिक पूर्व २० लाख १९ हजार ३ लाख ३६ हजार
पंचवटी २२ लाख ६ हजार ७ लाख ४३ हजार
नवीन नाशिक १७ लाख ४१ हजार ९ लाख ८ हजार
नाशिकरोड १७ लाख ३६ हजार ४ लाख ३६ हजार
मोबाइल अॅप डाउनलोड करा आणि राहा अपडेट
