अजिंठा लेण्यांची देशासह जगाला खरी ओळख करून देण्यामध्ये विख्यात शिल्पकार स्व. राम थत्ते यांचा सिंहाचा वाटा आहे. त्यांचे कार्य येणाऱ्या पिढ्यांसाठी अत्यंत प्रेरणादायी आहे, असे आदरार्थी उद्गार जळगाव येथील विख्यात उद्योजक अशोक जैन यांनी काढले.
‘अजंठा’ या शिल्पकार राम थत्ते लिखीत पुस्तकाच्या इंग्रजी आवृत्ती प्रकाशन सोहळ्यात ते बोलत होते. डॉ. मुंजे इन्स्टिट्यूट ऑफ कॉम्प्युटर स्टडीज अॅण्ड मॅनेजमेंट येथे हा कार्यक्रम पार पडला.
अजिंठ्यासारख्या अव्द‌ितीय कलाकृतींवर दुर्मिळ संदर्भ जागतिक मान्यता असणाऱ्या इंग्रजी भाषेत प्रकाशिक करण्याचे हे निमित्त चांगल्या कार्यास हातभार लावत आहे, असेही जैन यावेळी म्हणाले. ते म्हणाले, अजिंठ्याच्या पायथ्याशी असणाऱ्या वाकोद या गावी विख्यात उद्योजक स्व. भंवरलाल जैन यांचा जन्म झाला. त्यामुळे अजिंठ्याशी जैन परिवार व उद्योग समूहाचे नाते अतूट आहे. अजिंठा लेण्यांचे अभ्यासक व भाष्यकार शिल्पकार स्व. राम अनंत थत्ते यांच्यासोबतचे नातेही बरेच जुने आहे. इंग्रजी भाषेतील या पुस्तकामुळे अजिंठ्याची महती पाश्चात्य अन् चिकीत्सक पर्यटकांपर्यंत सक्षमपणे पोहचेल असाही विश्वास त्यांनी यावेळी व्यक्त केला.
याप्रसंगी प्रमुख पाहुणे म्हणून उपस्थित वास्तुविशारद अरुण काबरे म्हणाले, राम थत्ते व अजिंठ्याची चित्रे ही समरस झाली आहेत. त्याची प्रचिती मी अनेकवेळा घेतली आहे. नाशिकच्या सौंदर्यातही त्यांनी मोलाची भर घातली असून त्यांनी निर्माण केलेले बाबुभाई राठी चौकातील हाताचे शिल्प, कालिदास कलामंदिरावरील कालिदास, धामणकर कॉर्नर तसेच त्र्यंबक रोड ते जव्हार फाट्यापर्यंत अनेक रेखीव शिल्पे याची आजही साक्ष देतात असेही ते म्हणाले.
यावेळी बोलताना छायाचित्रकार प्रसाद पवार म्हणाले, तत्त्वज्ञान , कला, अलंकार, जीवनशैली यांचा दोन हजार वर्षे जुना संवाद अजिंठाच्या मार्फत होतो. कलेला राजाश्रय असला की कला लोकांपर्यंत पोहचते याची प्रचिती आज येते. अजिंठ्याची सध्या मोठ्या प्रमाणात झीज आली आहे. जुन्या काळातील जवळपास ६४ टक्के भाग आज बघता येत नाही. त्यामुळे हा ऐतिहासिक ठेवा जतन करण्याकरता प्रयत्न सुरू असल्याचे त्यांनी सांगितले. प्रख्यात आहारतज्ज्ञ व राम थत्ते यांची नात अवंती दामले यांनी मनोगत मांडले. त्या म्हणाल्या, ‘एखाद्या गोष्टीचा ध्यास घेऊन ती जिद्दीने पुढे कशी न्यायची याची शिकवण राम थत्ते यांनी दिली आहे. ती निश्चितच लक्षात राहील.’ आभार प्रदर्शन अभिजित थत्ते यांनी केले. तर सूत्रसंचालन सीमा पेठकर यांनी केले.
मोबाइल अॅप डाउनलोड करा आणि राहा अपडेट
