रूढी परंपरेत अडकलेले ‘३०२ प्रश्नचिन्ह’

November 19, 2016, 2:30 pm

≪ Previous: नवप्रकाश योजनेला ‌दिली मुदतवाढ

म. टा. खास प्रतिनिधी, नाशिक

कितीही पूरक, सकारात्मक घटना घडल्या तरी समाजातील रूढी परंपरा काही केल्या नष्ट होणार नाहीत. तसेच नकारात्मक घटना घडल्यावर मात्र त्याची तत्काळ दखल घेत त्यावर जातपंचायत बसवून निर्णय दिला जाईल. त्यामुळे कुणाचे आयुष्याचे नुकसान झाले तरी त्याची पर्वा समाज करीत नाही ही वस्तुस्थिती मांडणारे ‘३०२ प्रश्नचिन्ह’ हे नाटक शनिवारी सादर झाले.

महाराष्ट्र राज्य सांस्कृतिक संचालनालयाच्या वतीने आयोजित ५६ व्या राज्य हौशी मराठी नाट्य स्पर्धेत मयूर थोरात लिखित ‘३०२ प्रश्नचिन्ह’ हे नाटक सादर झाले. हे नाटक रंगकर्मी थिएटर्स संस्थेच्यावतीने प्रस्तूत करण्यात आले होते. ‘३०२ प्रश्नचिन्ह’ हे सामाजिक विषयावर भाष्य करणारे नाटक होते. गावाच्या भल्याचा विचार करणारे गुरूजी आपण बाप होणार या आनंदात असतात. मात्र त्यांचा आनंद पत्नीच्या निधनाने मावळून जातो. तरी मुलीची जबाबदारी ते पार पाडतात. एका आयाकडे मुलगी सांभाळण्यासाठी देतात. दिवसांमागून दिवस जातात. मुलगी मोठी होते. कॉलेजला जाते. परंतु, तिला बाप कधी वेळ देत नाही. यामुळे ती नेहमी नाराज असते. त्यात तिचे एका मुलावर प्रेम जडते. मुलगा जातीचा नसल्याने गुरूजींशी तिचे भांडण होते. त्यातून तोल जाऊन ती पडते व तिचा मृत्यू होतो. तिच्या मृत्यूला स्वत:ला कारणीभूत मानून गुरूजी जेलमध्ये जातात. पुढे त्यांचा न झालेला जावई त्यांची केस लढतो व न्यायालयाला त्यांची माफी मागावयास भाग पाडतो. पुन्हा एका मुलीची किंकाळी येते, पुन्हा जातपंचायत, पुन्हा रूढी परंपरा.

या नाटकात ऋचा वैद्य, तेजस बिल्दीकर, रेणुका पोतदार, जयदीप लखलानी, सुप्रिया अमृतकर, अभिजीत धारणे, सागर शिंदे, वैदेही जोशी, उत्तम लबडे, निशिगंधा उपासनी, सौरभ अमृतकर, जयश्री साळुंके, केतन औसकर, वैभव उगले, काव्या धारणे, तनिष्का धारणे यांनी भूमिका केल्या. नेपथ्य निवेदिता कस्तुरे, भूषण क्षिरे यांचे होते. प्रकाशयोजना जयदीप पवार यांची होती. संगीत अभिजीत धारणे यांचे, तर संगीत संयोजन रोहित सरोदे यांचे होते. वेशभूषा प्रथमेश कपोते, रंगभूषा माणिक कानडे यांची होती. दिग्दर्शन मयूर थोरात यांनी केले होते. रंगमंच सहाय्य पंकज बिल्दीकर, शामली देवरे यांचे होते.

आजचे नाटक

पराग घोंगे लिखित ‘वाळुचे घर’परशुराम साईखेडकर नाट्यगृह, सायंकाळी ७ वाजता.

Latest Images