भर रस्त्यात पेटलेल्या वाहनातून ज्या शाळेच्या विद्यार्थ्यांची वाहतूक केली जात होती, त्या शाळेच्या मुख्याध्यापक व संस्थाचालकांना कारणे दाखवा नोटीस दिली जाणार असल्याची माहिती नाशिक विभागाचे शिक्षण उपसंचालक रामचंद्र जाधव यांनी ‘मटा’शी बोलताना दिली.
तसेच ज्या शाळेत शालेय विद्यार्थ्यांची वाहतूक विनापरवानाधारक वाहनातून केल्याचे आढळून येईल, अशा वाहन चालकांवर थेट फौजदारी गुन्हे दाखल करण्याचे आदेश दिले जाणार असल्याचेही जाधव यांनी स्पष्ट केले. त्यांच्या या पवित्र्यामुळे आता विद्यार्थ्यांच्या सुरक्षेच्या जबाबदारीकडे कानाडोळा करणाऱ्या शाळांचे मुख्याध्यापक व शिक्षण संस्थाचालकांचे धाबे दणाणले आहे. नाशिकरोड येथे बुधवारी दुपारी भर रस्त्यात पेटलेल्या व्हॅनमध्ये जेलरोडवरील स्कॉट‌िश इंग्लिश मीड‌िअम शाळेचे सात विद्यार्थी होते. त्यामुळे या शाळेच्या मुख्याध्यापकासह संबंधित शिक्षंण संस्थेच्या पदाधिकाऱ्यांनाही कारणे दाखवा नोटीस दिली जाणार असल्याचे उपसंचालक जाधव यांनी सांगितले.
समितीची बैठक
विद्यार्थी वाहतूक प्रश्नावर शालेय परिवहन समितीची बैठक घेण्यात येणार असून, या बैठकीस शहरातील सर्व शाळा प्रमुखांनाही बोलावण्याचे आदेश जिल्हा परिषदेचे व मनपाचे शिक्षणाधिकारी यांना दिले जाणार आहेत. या बैठकीत विद्यार्थी वाहतुकीसंदर्भात सबंधित शाळाप्रमुखांनी काय उपाययोजना केल्या आहेत, याचा आढावा घेतला जाईल.
मोबाइल अॅप डाउनलोड करा आणि राहा अपडेट
