शहरातील सर्वच रस्त्यांची दुरवस्था झाल्याने नागरिक आधीच हैराण झाले आहेत. अशातच संगमेश्वर भागातील मोतीबाग नाका ते नवा अल्लमा एक्बाल पूल दरम्यान पाणीपुरवठा विभागाने जलवाहिनी टाकण्यासाठी खोदकाम केल्याने आधीच खड्डेमय झालेल्या या रस्त्याची अवस्था असून अडचण नसून खोळंबा अशी झाली आहे. या रस्त्यावरून मोठ्या प्रमाणात वाहतुकीची वर्दळ असल्याने नागरिकांना त्रास सहन करावा लागत आहे.
शहरातील सर्वच प्रमुख रस्ते खड्डेमय झालेले असताना येथील मनपाचा सार्वजनिक बांधकाम विभागाने मात्र सोईस्कर दुर्लक्ष केले आहे. आधीच उघडलेले रस्ते वारंवार कोणत्या न कोणत्या कारणासाठी खोदण्यात येत असल्याने रस्त्यांची अधिक वाट लागत आहे. संगमेश्वर भागातील मोतीबाग नाका ते नवीन पूल दरम्यान असलेला रस्तादेखील मनपाच्या पाणीपुरवठा विभागने खोदला आहे. कलेक्टर पट्टा भागात असलेल्या नवी वस्तीमधील नवीन जलकुंभात पाणीपुरवठा करण्यासाठी रविवार वार्ड जळकुंभ ते नवी वस्ती जलकुंभ अशी जलवाहिनी टाकली जाते आहे. मात्र यासाठी या रस्त्यालगत बुलडोजरच्या सहाय्याने खोदकाम करण्यात येत आहे. त्यामुळे आधीच प्रचंड रहदारी असलेला हा रस्ता खोदकाम केल्याने अरुंद झाल्याने वाहतुकीस अडथळा निर्माण होत आहे.
नाशिककडून शहरात येणाऱ्या वाहतुकीस शहरात प्रवेश करण्यासाठी हाच सोयीचा रस्ता असून, टिळकनगर, कलिका नगर, देवरे प्लॉट तसेच कलेक्टर पट्टा भागातील नागरिकांनादेखील याच रस्त्याने ये-जा करावी लागते. शहाराअंतर्गत होणारी अवजड वाहनेदेखील याच रस्त्याने जातात. वर्धमान, काकाणी शाळेत जाणाऱ्या विद्यार्थ्यांची पायी तसेच स्कूलबससाठी या रस्त्यावर दिवसभर वर्दळ असते. पावसाळ्यात या रस्त्याला नेहमीच खड्डे पडतात. त्यात आता जलवाहिनी टाकण्यासाठी रस्ता खोदकाम केल्याने दिवसभर वाहतुकीचा खोळंबा होत आहे. सकाळी शालेय विद्यार्थी, पालकांनादेखील याचा त्रास सहन करावा लागत आहे. अशाच प्रकारे नवा अल्लमा एकबाल पूल ते रामसेतू दरम्यान शिंपी मंगलकार्यालय परिसरात खोदकाम करण्यात आले आहे. किमान महिनाभर तरी हे काम सुरू राहणार असल्याने नागरिकांना पुढचा महिनावर अशाच रस्त्यावरून वाट काढावी लागेल काय असा प्रश्न उपस्थित होत आहे.
आमच्या भागातून जाणारा हा प्रमुख रस्ता आहे. जलवाहिनी टाकण्यासाठी रस्ता खोदकाम केले असले तरी तो व्यवस्थित बुजण्यात आलेला नाही. आधीच हा रस्ता खराब होता. आता तो अरुंदही झाला आहे.
- सागर अह‌िरे, रहिवासी
मोबाइल अॅप डाउनलोड करा आणि राहा अपडेट
