--
pravin.bidve@timesgroup.com
Tweet : BidvePravinMT
नाशिक : शिक्षणाने जगण्याचा हरवलेला विश्वास पुन्हा मिळवून दिला. दुर्धर आजाराने होरपळलेलं जगणं सुसह्य बनवलं अन् प्रगतीच्या संकोचलेल्या वाटा पुन्हा खुल्या करून दिल्या... हे बोल आहेत एड्ससारख्या दुर्धर आजाराशी दोन हात करून नव्याने प्रगतीच्या विश्वात झेपावू पाहणाऱ्या आशावादी मनांचे.
शिक्षणाने त्यांना आत्मविश्वास दिलाय. जीवन जगण्याची कला शिकविली आहे. आज कुणी कॉलेजमध्ये इंजिनीअरिंग शिकतेय, तर कुणी मुक्त विद्यापीठात पदवी घेण्यात गुंतले आहे. पुनर्वसन केंद्रातील अनुभवाला शिक्षणाची जोड मिळाल्याने काही जण तर शहरातील नामांकित संस्थांमध्ये समुपदेशक म्हणूनही काम करताहेत. आपण एचआयव्ही पॉझिटिव्ह आहोत हे कळल्यानंतर सुरुवातीला त्यांच्यातील त्राणच गेले होते. सुरुवातीचा काही काळ अत्यंत नैराश्यात गेला. जीवन अंधःकारमय झाले. आत्महत्येचा विचार कितीतरी वेळा मनाला स्पर्शून गेला, नव्हे काहींनी आत्महत्येचा प्रयत्नही करून पाहिला. आपल्याच माथ्यावर या दुर्धर आजाराचा शिक्का का? हा प्रश्न त्यांना वारंवार डिवचू लागला. मात्र, काही व्यक्ती सहकारी म्हणून भेटल्या अन् एच.आय.व्ही बाधितांचे दु:ख कुठल्या कुठे पळून गेले.
नाशिकमध्ये अनुसया शिक्षण प्रसारक मंडळ, प्रवरा मेडिकल ट्रस्ट, डॉट्स सामजिक संस्था, मॅग्मो वेल्फेअर, बागलाण सेवा समिती, मनमीलन बहुउद्देशीय सामाजिक संस्था, विहान आणि यश फाउंडेशन अशा अनेक स्वयंसेवी संस्था एच.आय.व्ही बाधितांसाठी काम करीत आहेत. अशा संस्थांकडून मिळणाऱ्या पाठबळामुळे एचआयव्हीग्रस्तांच्या जगण्याला नवीन अर्थ मिळू लागला आहे. यश फाउंडेशन आणि महिन्द्रा अॅण्ड महिन्द्राने तर एक पाऊल पुढे टाकत एच.आय.व्ही.ग्रस्तांसाठी पुनर्वसन केंद्र सुरू केले आहे. फाइल, हातमोजे, बॅग्ज इतकेच नव्हे, तर सणांसाठीचे साहित्य बनविणाऱ्या एडसग्रस्तांना स्वावलंबी बनविले आहे. समदु:खी व्यक्ती एकाच ठिकाणी आल्याने विचारांची देवाणघेवाण सुरू झाली अन् त्यामुळे नैराश्याला पळवून लावण्यास मदत झाली. कधीकाळी केवळ गृहिणी म्हणून समाजात वावरणाऱ्या अनेक महिलांना या पुनर्वसन केंद्राने स्वावलंबी बनविले आहे. इतकेच नव्हे, तर शिक्षण अर्ध्यावर सोडणाऱ्यांना शिक्षणाच्या मुख्य प्रवाहात आणले आहे. काहींनी शिक्षण पूर्ण करून समुपदेशक म्हणून नामांकित संस्थांमध्ये कामही सुरू केले आहे.
--
एच.आय.व्ही.ग्रस्तांचे पुनर्वसन काळाची गरज आहे. त्यामुळे या बाधितांमधील एकटेपणाची भावना दूर होण्यास मदत मिळेल. पुनर्वसन केंद्राने अनेक एच.आय.व्ही.ग्रस्तांना जगविले. त्यांना आयुष्य जगायला शिकविले. त्यांना आत्मविश्वास मिळवून दिला. राज्य सरकारने प्रत्येक जिल्ह्यात अशी केंद्रे सुरू करायला हवीत. एच.आय.व्ही.ग्रस्त बनवित असलेल्या वस्तूंना हक्काची बाजारपेठ मिळाली, तर त्यांना आर्थिक आधार मिळू शकेल.
-रवींद्र पाटील, अध्यक्ष, यश फाउंडेशन
(समाप्त)
मोबाइल अॅप डाउनलोड करा आणि राहा अपडेट
