म. टा. प्रतिनिधी, जुने नाशिक
महापालिका निवडणुकीची आचारसंहिता लागू होण्यापूर्वी नगरसेवकांची विविध विकासकामांच्या उद्‍घाटनांची लगीनघाई सुरू आहे. या माध्यामातून ते प्रभागातील नागरिकांना वचनपूर्ती केल्याची जाणीव करून देत आहेत. तर दुसरीकडे, अन्य इच्छुक उमेदवार मतदारांना विविध मोफत सेवा देण्याचा उपक्रम राबवित जनसंपर्क मोहिमेला गती देत आहेत.
मोफत जिओ मोबाइल सिमकार्ड, प्रभागात मोफत वाय-फाय, आधारकार्ड, पॅनकार्ड बनवून देण्यासाठी शिबिरे, आरोग्य तपासणी शिबिरे, धार्मिक सहली, कार्यक्रम, भंडारे, आनंदमेळा,आदी विविध माध्यमातून इच्छुकांनी नागरिकांची काळजी घेतली जात आहे. नववर्षासाठी ३१ डिसेंबरचे ही खास आकर्षणाचे कार्यक्रमाचे आयोजन करण्यात आले आहे. आपापल्या वोटबँकची खास दक्षता घेत विविध मोफत सेवा देण्याचे व कार्यक्रमांचे आयोजन करण्यात येत आहे. जुने नाशिकमधील मुस्लिम बहुल इलाख्यात शनिवारी, ३१ डिसेंबर निमित्त नामवंत कलावंतांचा कथडा परिसरात खास कव्वालीचा कार्यक्रम आयोजित करण्यात आला आहे.
इच्छुकांच्या हालचालींवर लक्ष
निवडणूक काळात मिळणाऱ्या मोफत सेवांमुळे नागरिकही भारावून जात आहेत. दर दिवशी एक नवीन इच्छुक उमेदवार एक नवा उपक्रम व मोफत सेवा देण्यासाठी आपले परिचयपत्रक घेऊन मतदारांच्या दारी धडकतोय. प्रभागाचे मावळते नगरसेवकही या प्रतिस्पर्धी इच्छुकांच्या हालचालींवर खास लक्ष ठेवून आहेत. नगरसेवकांनाही प्रभागातील नागरिकांच्या भेटीगाठी सुरू केल्या आहेत. विविध विकासकामांचे उद्घाटन कार्यक्रमांद्वारे पाच वर्षातील कामाचा लेखाजोखा मांडून वचनपूर्ती करून दिल्याची नागरिकांना जाणीव करून देत आहेत.
सुविधा लाभासाठी उसळतेय गर्दी
जुने नाशिमधील यापूर्वीच्या प्रभाग क्रमांक २५, २६, २६, ३८, २९, ३०, ३१, ३७, ३८, ३९, ४०, ५४, ५७ या भागांमध्ये नगरसेवकांनी विकासकामांच्या उद्घाटन कार्यक्रमांचे बार उडविले आहेत. यातून मतदारांशी संपर्क वाढविण्यावर त्यांनी भर दिला आहे. मतदारांना आकर्षित करण्यासाठी नगरसेवकांची विकासकामांच्या उद्‍घाटनांची लगीनघाई तर दुसरीकडे अन्य इच्छुक उमेदवारांचे मोफत विविध सेवांचे फंडे वापरत असल्याने निवडणुकीचे वातावरण तापण्यास सरुवात झाली आहे. मोफत मिळणाऱ्या विविध सोयी-सुविधा पदरात पाडून घेण्यासाठी नागरिकही पिछाडीवर नाही, हे विशेष.
मोबाइल अॅप डाउनलोड करा आणि राहा अपडेट
