उपनगराध्यक्ष, स्वीकृतसाठी चुरस

December 29, 2016, 2:30 pm

≫ Next: अखेरच्या सभेलाही नगरसेवकांची दांडी!

≪ Previous: बक्ष‌िसावरून ‘दंगल’मध्ये रुसवा

म. टा. खास प्रतिनिधी, नाशिक

जिल्ह्यात महिनाभरापूर्वी झालेल्या थेट नगराध्यक्षपदाच्या निवडणुकीनंतर आता पहिली विशेष सर्वसाधारण सभा आज, शुक्रवारी (दि. ३०) होणार आहे. त्यात उपनगराध्यक्षपदाची निवड व स्वीकृत सदस्यांची नियुक्ती होणार असून, त्यासाठीची चुरस पाहायला मिळणार आहे. उपनगराध्यक्षपदासाठी नामनिर्देशनपत्र स्थानिक पातळीवर भरले जाणार आहे, तर स्वीकृत नगरसेवकपदासाठी गुरुवारी सहा नगरपालिकांच्या १४ जागांसाठी २३ नावांची शिफारस करण्यात आली असून, त्यांचे अर्ज जिल्हाधिकारी कार्यालयात तपासून ते नगराध्यक्षांकडे सकाळी पाठविण्यात येणार आहेत. त्यानंतर गटनेत्यांच्या शिफारशीनुसार तौलनिक बळानुसार या सदस्यांची नियुक्ती होणार आहे.

जिल्ह्यातील मनमाड, सिन्नर, नांदगाव व भगूर या नगरपालिकांत शिवसेनेचे नगराध्यक्ष झाले असून, येवला येथे भाजपला संधी मिळाली आहे, तर सटाणा येथे विकास आघाडीचा नगराध्यक्ष झाला आहे. या सहाही नगरपालिकांत काही ठिकाणी संख्याबळ कमी-अधिक प्रमाणात सत्ताधारी गटाकडे आहे. त्यामुळे शुक्रवारच्या या निवडणुकीत उपनगराध्यक्षपदासाठी चुरस निर्माण झाली आहे. त्याचप्रमाणे स्वीकृत सदस्यपदासाठीही इच्छुकांची संख्या मोठ्या प्रमाणात वाढल्यामुळे सत्ताधारी गटाप्रमाणे विरोधी गटाचीही अडचण झाली आहे. त्यामुळे तौलनिक संख्याबळापेक्षा जास्त अर्जांची शिफारस गटनेत्यांनी केली आहे.

स्वीकृत सदस्यत्वासाठी गटनेता देणार नाव

स्वीकृत सदस्यांच्या तौलनिक बळानुसार गटनेता नगराध्यक्षांना नाव देणार असून, त्यानंतर नगराध्यक्ष त्याला संमती देणार आहेत. त्यामुळे तौलनिक संख्याबळानुसारच ही नियुक्ती होणार आहे.

...यांनी दाखल केलेत अर्ज

जिल्हाधिकारी कार्यालयात बुधवारी मनमाड नगरपालिकेतून महेश बोरसे, गंगाभाऊ त्रिभुवन, सतीश शर्मा, नरेश फुलवाणी व शेख नझीम अफजल यांनी अर्ज दाखल केले. सिन्नर नगरपालिकेतून भवरलाल कलंत्री, विजय जाधव, मंगला शिंदे, रामानाथ भाऊशेठ लोणारे यांनी अर्ज दाखल केले. सटाणा नगरपालिकेतून मनोहर दगाजी देवरे, विद्या मनोहर सोनवणे, फारुक नूर मोहंमद शेख यांनी अर्ज दाखल केले. भगूर नगरपालिकेतून फरिद बापू शेख यांचा अर्ज दाखल झाला. येवला नगरपालिकेतून अजय भागचंद जैन, पंकज पारख, सुनील काबरा, हुसेन शेख, रुपेश दराडे, राजेंद्र लोणारी, योगेश पाटील यांनी अर्ज दाखल केले. नांदगावमधून महावीर पारख, अरुण पाटील व मोकळ यांनी अर्ज दाखल केले. यातील काही अर्ज उशिरापर्यंत भरणे सुरू होते.

नगराध्यक्षांच्या अध्यक्षतेखाली सभा

नगरपालिकांच्या निवडणुकीनंतर पहिली सभा जिल्हाधिकारी यांनी नियुक्त केलेल्या उपजिल्हाधिकाऱ्यांमार्फत आतापर्यंत होत होती. पण, यावेळी थेट नगराध्यक्षांना अधिकार देण्यात आल्यामुळे ही सभा त्यांच्या अध्यक्षतेखाली होणार असून, त्यात उपनगराध्यक्षपदाची निवड व स्वीकृत सदस्यांची नियुक्ती करण्यात येणार आहे.

सर्व सभा एकाच तारखेला

थेट नगराध्यक्षांना सभेचे अधिकार दिल्यामुळे जिल्ह्यातील सहाही सभा वेगवेगळ्या तारखांना होतील, असे संकेत होते. पण, या सर्व नगराध्यक्षांनी एकमेकांना विचारून एकच तारीख निवडल्यामुळे या सभा एकाच वेळी होणार आहेत.

Latest Images