मुसंडीसाठी शिवसेना-भाजप सज्ज
vinod.patil
@timesgroup.com
---
Tweet : vinodpatilMT
---
नाशिक : महापालिका निवडणुका जाहीर झाल्यानंतर नाशिकमधील मनसेच्या सत्तास्थापनेत महत्त्वाचा वाटा उचलणाऱ्या नाशिक पूर्वमधील लढतींकडे सर्वांचे लक्ष आहे. जुन्या नाशिकमधील मतदारांचा कौल हा निर्णायक राहिला असून, आतापर्यंत या भागाने शहराला पाच महापौर, तर पाच स्थायी समिती सदस्य दिले आहेत. त्यामुळे राजकीयदृष्ट्या अत्यंत महत्त्वाचा परिसर असलेल्या जुन्या नाशिकमधील राजकीय घडामोंडीकडे सर्वांचे लक्ष लागले आहे. गेल्या वेळी २४ नगरसेवकांपैकी मनसेचे तब्बल ९ नगरसेवक निवडून आले होते. असे असले, तरी काँग्रेस व राष्ट्रवादीचा गड म्हणूनही या भागाकडे पाहिले जाते. परंतु, आता स्थिती बदलली असून, या भागावर वर्चस्व मिळवण्यासाठी शिवसेना-भाजपने आपली ताकद पणाला लावली आहे. त्यामुळे मनसेच्या या गडावर कोण वर्चस्व मिळविणार, हा आता औत्स्युक्याचा विषय बनला आहे.
१९ नगरसेवक निवडणार
शहरातील सहा विभागांतील नाशिक पूर्व अर्थात, जुने नाशिक अशी ओळख असलेल्या या परिसरातून नव्या रचनेत १९ नगरसेवकांना निवडून दिले जाणार आहे. नव्या रचनेत याचा विस्तार हा आता पाथर्डी फाट्यापर्यंत पोहोचला आहे. यापूर्वी या भागातून २४ नगरसेवक निवडून देण्यात आले असले, तरी प्रभागांच्या मोडतोडीत या भागातील सदस्यसंख्या घटली आहे. गेल्या वेळी नाशिक पूर्व हा विभाग काँग्रेस व राष्ट्रवादीकडून मनसेने हिसकावून घेतला होता. या भागातील २४ सदस्यांपैकी मनसेचे ९ नगरसेवक निवडून आले होते. पाठोपाठ राष्ट्रवादीचे ५, काँग्रेसचे ४, तर भाजप २ आणि शिवसेनेचा एक सदस्य निवडून आला होता. तीन अपक्षांनीही या विभागातून बाजी मारली होती. या विभागातून ९ सदस्य निवडून आल्यानेच मनसेचा सत्तेचा मार्ग सुकर झाला होता. राजकीयदृष्ट्या अत्यंत महत्त्वपूर्ण असलेल्या जुने नाशिक, द्वारका, भाभानगर, काठे गल्ली, वडाळा, डॉ. आंबेडकरनगर, टाकळीरोड, इंदिरानगर, पाथर्डी फाटा आणि नाशिकरोडचा काही भाग नाशिक पूर्व विभागात येतो. त्यामुळे आकाराने या विभागाचा विस्तार बराच मोठा असून, राजकीय दिग्गजांचीही संख्या मोठी आहे. नव्या प्रभाग रचनेत प्रभाग क्रमांक १५, १६, २३, ३०, ३१ अशा पाच प्रभागांचा समावेश असून, प्रभाग क्रमांक १५ हा तीन सदस्यीय प्रभाग आहे. त्यामुळे १९ सदस्य या भागातून निवडले जाणार आहेत.
---
प्रभाग १५
अनेकांची प्रतिष्ठा पणाला
पाच प्रभागांपैकी प्रभाग क्रमांक १५ हा ‘व्हीआयपी’ असणार आहे. महापालिकेच्या भाजपच्या निवडणुकीची संपूर्ण जबाबदारी टाकलेल्या माजी आमदार वसंत गितेंची प्रतिष्ठा त्यांच्या चिरंजीवाच्या राजकारणातील प्रवेशामुळे या प्रभागात पणाला लागणार आहे. अनुसयानगर, गीताईनगर, घरकुल, बनकर चौक, रवींद्र विद्यालय परिसर, काठे गल्ली, भाभानगर, जनरल वैद्यनगर, किनारा हॉटेल परिसर, शंकरनगर परिसर, मिरजकरनगर, स्टेट बँक कॉलनी असा परिसर या प्रभागात असून, येथून तीन सदस्य निवडले जाणार आहेत. सुरुवातीला मनसेचा गड राहिलेल्या या प्रभागात मुसंडी मारण्यासाठी भाजप व सेना सज्ज झाली आहे. येथून शिवसेनेकडून विद्यमान नगरसेवक सचिन मराठे, भाजपच्या अर्चना थोरात, वंदना शेवाळे, मनसेकडून संदीप लेनकर, गुलजार कोकणी मैदानात उतरणार आहेत. सोबतच रेखा कैलास मोरे, प्रथमेश गिते, मिलिंद भालेराव, सुमन भालेराव, प्रिया मुनशेट्टीवार, कैलास मोरे, आशा परदेशी, प्रशांत रकटे, खुशाल पवार, अर्चना टाकेकर, नीलेश खैरे आदी इच्छुक आहेत. वसंत गितेंना आपली ताकद दाखवण्याची संधी या प्रभागात असली, तरी त्यांना पक्षांतर्गत विरोधकांसह शिवसेना व मनसेशी सामना करावा लागणार आहे. गेल्या पाच वर्षांत प्रभागात झालेल्या चांगल्या कामांच्या जोरावर मराठे, थोरात, कोकणी यांनी पुन्हा दावेदारी ठोकली आहे. काँग्रेस-राष्ट्रवादीकडे सक्षम उमेदवारांची वानवा असल्याने मुख्य लढत ही शिवसेना, भाजप व मनसेमध्येच होणार असल्याचे चित्र आहे.
---
प्रभाग १६
एेनवेळी अच्छे दिनची चिन्हे
प्रभाग १६ मध्ये श्रीनिवास कॉलनी, उत्तरा कॉलनी, आशीर्वादनगर, आगर टाकळी, रामदास कॉलनी, जय भवानीनगर, समतानगर, रामदास स्वामीनगर, उपनगर, शांती पार्क, मातोश्रीनगर, ड्रीम सिटी हा परिसर येतो. गेल्या वेळेस मनसे व काँग्रेसचे प्राबल्य या प्रभागात होते. काँग्रेसचे राहुल दिवे, मनसेच्या सुमन ओहोळ, मेघा साळवे, भाजपचे प्रा. कुणाल वाघ या विद्यमान नगरसेवकांचा हा प्रभाग आहे. त्यामुळे मनसेसह काँग्रेस व भाजपला आपले वर्चस्व सिद्ध करावे लागणार आहे. दुसरीकडे या प्रभागात मुंसडी मारण्यासाठी शिवसेना व भाजपने कंबर कसली आहे. माजी महापौर अशोक दिवे यांचे वर्चस्व या प्रभागात असून, त्यांची साथ निकालात निर्णायक ठरणार आहे. सद्यस्थितीत या चौघांसह दिनकर आढाव, अनिल ताजनपुरे, अनिल जोंधळे, गिरीश चांदवडकर, ऋषिकेश गायकवाड, उज्ज्वला हिरे, नंदिनी जाधव, आशिष साबळे, सचिन पाटील इच्छुक आहेत. भाजप व सेनेकडे उमेदवारी मिळवण्यासाठी इच्छुकांचा कल असला, तरी या दोन्हींकडून उमेदवारी मिळाली नाही, तर ऐनवेळी मनसेसह काँग्रेसला या ठिकाणी अच्छे दिन येऊ शकतात.
---
प्रभाग २३
राजकीय गणित किचकट
प्रभाग २३ मध्ये भारतनगर, श्रीरामनगर, विनयनगर, हॅपी होम कॉलनी, अशोका मार्ग, खोडेनगर, गणेशबाबानगर, सावतामाळीरोड, डीजीपीनगर, कमोदनगर, इंदिरानगर हा परिसर येतो. विद्यमान नगरसेवक भाजपचे सतीश कुलकर्णी, राष्ट्रवादीच्या नीलिमा आमले या प्रभागातून उमेदवारीसाठी इच्छुक आहेत. सोबतच गोपाळ पाटील, सुनील खोडे, अमित पाटील, रुपाली निकुळे इच्छुक आहेत. भाजप व राष्ट्रवादीचे या प्रभागात प्राबल्य असले, तरी हा संपूर्ण परिसर भाजपमय करण्यासाठी सतीश कुलकर्णी यांनी ताकद लावली आहे. त्यामुळेच गोपाळ पाटील यांना सोबत घेऊन त्यांनी सक्षम पॅनल तयार करण्याचे काम सुरू केले असून, ऐनवेळेस कोण कोणत्या पक्षाचा उमेदवार असेल, हे सांगणे अवघड आहे. त्यामुळे या प्रभागातील राजकीय गणिताकडे लक्ष लागून आहे.
---
प्रभाग ३०
मुस्लिम मते निर्णायक
प्रभाग ३० मध्ये राणेनगर, इंदिरानगर, लिंकरोडच्या उत्तरेकडील भाग, राजीवनगर, वैभव कॉलनी, किशोरनगर, कानिफनाथनगर, पेठेनगररोड, हायवेपासून चार्वाक चौकापर्यंत, वडाळा गाव, चिंतामणी कॉलनी, श्रद्धा विहार, शिव कॉलनी, पांडवनगरी, गुरू गोंविद सिंग पॉलिटे‌क्निक कॉलेज परिसर आहे. विस्तीर्ण असा हा मतदारसंघ असून, नगरसेविका दीपाली कुलकर्णी, सतीश सोनवणे, रशिदा शेख यांचा हा प्रभाग आहे. त्यामुळे हे तिघेही पुन्हा उमेदवारीसाठी इच्छुक आहेत. कुलकर्णी, सोनवणेंनी मनसेचा त्याग करून भाजपमध्ये प्रवेश केला आहे. सोबतच सुनील खोडे, संजय चव्हाण, वंदना बिरारी, संध्या तोडकर, प्रकाश खोडे, आकाश खोडे, जगन पाटील यांनीही उमेदवारीसाठी फिल्डिंग लावली आहे. गेल्या वेळी मनसेचे प्राबल्य असलेला हा विभाग असून, मुस्लिम मते या प्रभागात निर्णायक आहेत. त्यामुळे कोणत्याही पक्षाला निवडणूक जिंकण्यासाठी एक मुस्लिम उमेदवार घ्यावा लागणार आहे.
---
प्रभाग ३१
मोठ्या विस्ताराचे आव्हान
प्रभाग ३१ मध्ये गणेश कॉलनी, नगरकर लेन, इच्छापुरी चौक, राणेनगर, सिमेन्स कॉलनी, साई पॅलेस हॉटेलच्या पूर्वेकडील भाग, अनमोल नयनतारा गोल्ड, हॉटेल सेवन हेवनच्या पूर्वेकडील भाग, ज्ञानेश्वरनगर, समर्थनगर, वडाळा पाथर्डीरोड, गुरू गोविंद सिंग कॉलेजसमोरील भाग, पाथर्डी फाटा ते पाथर्डी गावठाणाच्या पाथर्डीरोडच्या उत्तरेकडील व दक्षिणेकडील भाग, प्रशांतनगर, अयोध्या कॉलनी, नरहरीनगर, दामोदरनगर, दादासाहेब फाळके स्मारक व लगतचा भाग, पाथर्डी गाव, पाथर्डी दाढेगावरोडचा पूर्व-पश्चिम भाग, दाढेगाव, पिंपळगाव खांबरोडचा पश्चिमेकडील भाग असा विस्तीर्ण परिसर असून, पूर्व विभागातील हा सर्वांत मोठा प्रभाग आहे. विद्यमान स्थितीत या प्रभागातून वंदना बिरारी, सुदाम कोंबडे प्रतिनिधित्व करतात. परंतु, बदलेल्या परिस्थितीत कोंबडे यांनी मनसेची साथ सोडून भाजपमध्ये प्रवेश केला आहे. सोबतच देवानंद बिरारी, वंदना बिरारी, भगवान दोंदे, संजय नवले, अमोल जाधव, सुदाम ढेमसे हे इच्छुक आहेत.
--
ताकद लावलीय पणाला
महापालिका निवडणुकीत कोणत्याही पक्षाला सत्ता स्थापण्यासाठी नाशिक पूर्वचा कौल महत्त्वपूर्ण ठरणार आहे. त्यामुळे शिवसेनेसह भाजपनेही या विभागावर वर्चस्व मिळवण्यासाठी पूर्ण ताकद पणाला लावली आहे. मनसेनेही हा गड कायम ठेवण्याचा प्रयत्न सुरू केला असला, तरी नवख्या उमेदवारांच्या भरवशावरच त्यांना हे लक्ष्य गाठावे लागणार आहे. दुसरीकडे विरोधात असलेल्या काँग्रेस व राष्ट्रवादीला उमेदवार मिळण्याची मारामार असल्याने सद्यस्थितीत तरी या विभागात शिवसेना, भाजप व मनसेतच तिरंगी सामना रंगण्याची चिन्हे आहेत.
---
विभागातील आरक्षणांची स्थिती
प्रभाग १५
अ : नागरिकांचा मागास वर्ग प्रवर्ग (महिला)
ब : सर्वसाधारण (महिला)
क : सर्वसाधारण
-
प्रभाग १६
अ : अनुसूचित जाती (महिला)
ब : अनुसूचित जमाती (महिला)
क : नागरिकांचा मागास वर्ग प्रवर्ग
ड : सर्वसाधारण
प्रभाग २३
अ ः अनुसूचित जमाती (महिला)
ब ः नागरिकांचा मागास वर्ग प्रवर्ग (महिला)
क ः सर्वसाधारण
ड ः सर्वसाधारण
-
प्रभाग ३०
अ ः अनुसूचित जाती
ब ः नागरिकांचा मागास वर्ग प्रवर्ग (महिला)
क ः सर्वसाधारण (महिला)
ड ः सर्वसाधारण
-
प्रभाग ३१
अ ः अनुसूचित जाती
ब ः नागरिकांचा मागास वर्ग प्रवर्ग (महिला)
क ः सर्वसाधारण (महिला)
ड ः सर्वसाधारण
मोबाइल अॅप डाउनलोड करा आणि राहा अपडेट
