स्बबळावर निवडणूक लढविण्याचा निर्णय घेतलेल्या शिवसेनेने इतर पक्षातून आलेल्या, तसेच स्वपक्षातील अशा एकूण २७ नगरसेवकांना पुन्हा निवडणूक रिंगणात उतरविले आहे. या नगरसेवकांना पुन्हा निवडून आणतानाच स्वबळावर सत्ता स्थापण्यासाठी ६२ ठिकाणी विजय प्राप्त करण्याचे कसब शिवसेनेला पेलावे लागणार आहे.
शिवसेनेने आपल्या पक्षाचे विद्यमान नगरसेवक मनीषा हेकरे, अजय बोरस्ते, विलास शिंदे, सचिन मराठे, मंगला आढाव, शैलेश ढगे, शोभना शिंदे, अशोक सातभाई, सूर्यकांत लवटे, नयना घोलप, सुनीता कोठुळे, केशव पोरजे, कल्पना पांडे, सुधाकर बडगुजर, हर्षा बडगुजर, डीजी सूर्यवंशी, वंदना बिरारी यांना पुन्हा संधी दिली आहे. इतर पक्षातून सेनेत दाखल झालेले विद्यमान नगरसेवक संजय चव्हाण, अरविंद शेळके, रत्नमाला राणे, सुवर्णा मटाले, कल्पना चुंभळे, रमेश धोंगडे, रंजना बोराडे, नंदिनी जाधव, यतीन वाघ, योगिता आहेर यांना उमेदवारी बहाल केली आहे.
तर, काही विद्यमान नगरसेविकांऐवजी त्यांच्या कुटुंबीयांना शिवसेनेने रिंगणात उतरविले आहे. त्यात नगरसेवक सुरेखा नागरे यांचे पती गोकुळ नागरे, सुमन ओहोळ यांचे पती विजय ओहोळ, नगरसेवक गणेश चव्हाण यांच्या पत्नी जयश्री चव्हाण, शिवाजी चुंभळे यांचे पुतणे कैलास चुंभळे यांना उमेदवारी दिली आहे.
सारेच आयाराम खूश
निवडणुकीपूर्वी विविध पक्षातून शिवसेनेत दाखल झालेल्या आयारामांना सेनेने खूश केले आहे. त्यामुळेच सर्वांना उमेदवारी देऊन शिवसेनेने वेगळा संदेश दिला आहे.
निष्ठावंत कार्यकर्ते नाराज
गेल्या अनेक वर्षांपासून शिवसेनेत कार्यरत असलेल्या अनेकांना संधी दिलेली नाही. त्यामुळे अनेक शिवसैनिकांमध्ये नाराजी आहे. निवडणुकीच्या तोंडावर दाखल होऊन उमेदवारी दिलेल्यांचा प्रचार आम्ही करायचा का, असा सवालही काही कार्यकर्त्यांनी विचारला आहे.
चुंभळे, चव्हाणांना दोन तिकिटे
राष्ट्रवादी काँग्रेसमधून शिवसेनेत दाखल झालेले शिवाजी चुंभळे यांच्या कुटुंबातील दोघांना शिवसेनेने उमेदवारी दिली आहे. त्यात विद्यमान नगरसेवक कल्पना चुंभळे आणि त्यांचे पुतणे कैलास चुंभळे यांना प्रभाग २४ मधून तिकीट देण्यात आले आहे. तर, गुरुवारीच शिवसेनेत दाखल झालेले नगरसेवक संजय चव्हाण यांना प्रभाग ३० मध्ये, तर त्यांची कन्या डॉ. स्नेहल यांना प्रभाग १३ मध्ये उमेदवारी देण्यात आली आहे.
मोबाइल अॅप डाउनलोड करा आणि राहा अपडेट