प्रशांत धिवंदे, देवळाली कॅम्प
राज्यभरात महापालिका निवडणुकांसह जिल्हा परिषदांच्या निवडणुकांमध्ये महिलावर्गाचा सहभाग ५० टक्के आरक्षणामुळे वाढला आहे. अनेक राजकारण्यांनी आपली पत्नी, मुली, सुनांना राजकारणाच्या आखाड्यात उतरवले आहे. त्यापैकी बऱ्याच महिला स्टेज डेअरिंग व आत्मविश्वासवृद्धीसाठी छोट्या-मोठ्या कोर्सेसना प्राधान्य देत असल्याचे दिसून येत आहे.
यापूर्वी असे प्रक्षिक्षण मिळविण्यासाठी नाशिककरांना थेट मुंबई-पुण्यामध्ये जावे लागत होते. मात्र, आता नाशकातही असे कोर्सेस उपलब्ध झाले आहेत. अनेक महिला उमेदवारांना निवडणुकांच्या काळात महत्त्वाची बाब असणारे भाषण येत नसल्याचे व अंगी सभाधीटपणा (स्टेज डेअरिंग) नसल्याचे दिसून येते. अशा राजकारणात उतरणाऱ्या महिलांमध्ये आत्मविश्वास निर्माण करण्यासाठी विविध व्यावसायिक वक्त्यांकडून मार्गदर्शन घेतले जात असल्याचे दिसून येत आहे. नाशिकमध्ये अशा राजकारण इच्छुक महिलांसाठी खास प्रशिक्षण वर्गाचे आयोजन विविध संस्था करीत असून, महापालिका निवडणुकीची चालून आलेली संधी अशा प्रशिक्षण संस्थांकडून कॅश करून घेतली जात आहे. आठवड्यातून दोन तासांच्या प्रशिक्षण वर्गाला अनेक महिला राजकारणी हजेरी लावत आहेत. विविध क्षेत्रांतील मान्यवर व्यक्तींकडून त्यांना मार्गदर्शनही मिळत आहे. काही बड्या राजकारण्यांनी तर एकत्रितपणे नको, तर खासगी प्रशिक्षण देण्याची मागणी केली असल्याचे एका संस्थाचालकांनी सांगितले.
हे प्रशिक्षण घेतले जातेय...
या कोर्सेसच्या माध्यमातून आपला आत्मविश्वास वाढीस लागावा याकरिता वक्तृत्व, सभाधीटपणा, मेक-अप, संभाषणकौशल्य, हावभाव, देहबोली, वाचिक अभिनय, शुद्ध भाषा, शब्दोच्चार यांचे प्रशिक्षण घेण्यावर भर दिसून येत आहे. यासोबतच आपल्या व्यक्तिमत्त्वाचा प्रभाव समोरच्यावर कसा पडेल याकरितादेखील प्रशिक्षण घेतले जात असल्याचे पाहावयास मिळत आहे.
अनेक महिला राजकारणात आहेत. मात्र, संभाषणकौशल्य व आत्मविश्वासाचा अनेकींमध्ये अभाव दिसतो. अशा कोर्सेसच्या माध्यमातून संबंधित महिलांचा व्यक्तिमत्त्व विकास घडविण्याचे काम केले जात आहे.
- मधुरा क्षेमकल्याणी, सेलिब्रिटी
मोबाइल अॅप डाउनलोड करा आणि राहा अपडेट
