राज्य महामार्गावर दररोजच दुतर्फा वाहनांच्या लांबच लांब लागणाऱ्या रांगा, क्षणोक्षणी खोळंबणारी वाहतूक अन् या सर्व मोठ्या वाहतूक कोंडीतून सर्वांनाच मार्ग काढताना करावी लागणारी तारेवरची कसरत हे येवल्यातील चित्र कधी बदलणार, असा सवाल आता सर्वसामान्यांकडून उपस्थित केला जात आहे.
येवला शहरातून जाणारा मनमाड-नगर राज्य महामार्ग अन् त्यावर दिवसातील बऱ्याचदा होणारी वाहतूक कोंडी आता डोकेदुखीचा विषय बनला आहे. त्यातही नगर-मनमाड आणि नाशिक-औरंगाबाद राज्य महामार्गांचा शहरातील विंचूर चौफुलीजवळ असलेला संगम लक्षात घेता या महामार्गावरून धावणारी शेकडो वाहने, त्यातून होणारा वाहतुकीचा मोठा खोळंबा चिंतेचा विषय बनला आहे.
पोलिस यंत्रणेने गांभीर्याने लक्ष द्यावे
नगर-मनमाड राज्य महामार्गावरील येवल्यातील कृषी उत्पन्न बाजार समितीत दररोजच कांदा, मका लिलावासाठी येणारे हजारो ट्रॅक्टर्स रस्त्यावर आडवेतिडवे आवागमन करताना महामार्गावरील अवजड वाहनांसह मार्गक्रमण करणाऱ्या अनेक वाहनांना बसणारा ‘ब्रेक’ यातून निर्माण होणारी वाहतुकीची कोंडी मार्गावर वाहनांच्या लांबच लांब रांगा निर्माण करतात. दररोजच समोर येणाऱ्या या वाहतुकीच्या महाकोंडीवर मार्ग काढून कोंडी दूर करण्यासाठी येवला शहर वाहतूक पोलिसांच्या वतीने प्रभावी प्रयत्न होताना दिसत नाहीत.
शहर पोलिसांचा येवल्यातील विंचूर चौफुलीवर वाहतूक नियंत्रण कक्ष असून त्यात चार वाहतूक पोलिस तैनात केलेले आहेत. मात्र, त्यातील किती पोलिस सातत्याने निर्माण होणारी वाहतूक कोंडी दूर करण्यासाठी पुढे सरसावतात? हा मोठा विषय आहे. आता पोलिस यंत्रणेने या वाहतूक कोंडीकडे गांभीर्याने बघणे गरजेचे आहे. येवला शहरात भेडसावणारा हा प्रश्न कायमस्वरूपी मार्गी लावण्यासाठी वाहतूक पोलिसांसह संबंधित यंत्रणांनी तात्काळ पावले उचलण्याची नितांत गरज असल्याचे मत नागरिकांकडून व्यक्त होत आहे.
मोबाइल अॅप डाउनलोड करा आणि राहा अपडेट
