म. टा. खास प्रतिनिधी, नाशिक
आपली अर्थव्यवस्था ग्रामीण भागावर अवलंबून असून, शेतकरी या ग्रामीण अर्थव्यवस्थेचा कणा आहे. त्यामुळे ग्रामीण अर्थव्यवस्था अधिक मजबूत करण्यासाठी, शेतीवर आधारित उद्योग-धंदे वाढीस लागणे काळाची गरज आहे. युवकांनी नोकरीमागे न धावता शेती आधारित उद्योगांना प्राधान्य द्यावे. नोकरी मागणारे न बनता नोकरी पुरविणारे बना, अशी ओळख निर्माण करावी, असे प्रतिपादन यशवंतराव चव्हाण महाराष्ट्र मुक्त विद्यापीठाचे कुलगुरू डॉ. दिलीप म्हैसेकर यांनी केले.
यशवंतराव चव्हाण महाराष्ट्र मुक्त विद्यापीठाच्या कृषी विज्ञान केंद्रामार्फत ‘जनावरांचे आरोग्य व्यवस्थापक’ आणि ‘आळंबी उत्पादन’ या दोन विषयांवर आजपासून प्रत्येकी ३० दिवसांच्या प्रशिक्षण कार्यक्रमाचा प्रारंभ करण्यात आला. या कार्यक्रमाच्या उद्घाटनप्रसंगी अध्यक्षस्थानाहून ते बोलत होते. कार्यक्रमासाठी प्रमुख पाहुणे म्हणून, विद्यापीठाचे कुलसचिव डॉ. दिनेश भोंडे, वित्त अधिकारी मगन पाटील आणि आडगाव येथील पशुधन व्यवस्थापन पदविका विद्यालयाचे प्राचार्य डॉ. चंद्रशेखर परदेशी उपस्थित होते.
कौशल्य हे यशस्वी उद्योजक बनण्याची पहिली पायरी असल्याचे मत, विद्यापीठाचे कुलसचिव डॉ. दिनेश भोंडे यांनी यावेळी व्यक्त केले. महिनाभर चालणाऱ्या या प्रशिक्षणादरम्यान प्रशिक्षणार्थींनी संपूर्ण कौशल्य प्राप्त करून घ्यावे, असे आवाहनही त्यांनी केले. वित्त अधिकारी मगन पाटील यांनी शेतमाल उत्पादनाच्या विपणनाकडे विशेष लक्ष पुरविण्याची गरज बोलून दाखविली.
या प्रशिक्षण कालावधीत जनावरांची निगा, लसीकरण, विविध आजार व त्यांचे निदान, प्राथमिक औषधोपचार, तसेच उत्पादनवाढीसाठी शास्रीय दृष्टिकोनासंबंधी संपूर्ण प्रशिक्षण ‘जनावरांचे आरोग्य व्यवस्थापन’ याविषयीची माहिती देण्यात येणार आहे. आळंबीचे प्रकार, स्पॉन तयार करणे, माध्यमे बनविणे, रोगांचे व्यवस्थापन, वातावरणातील घटक नियंत्रण, बेड भरणे व एकूणच आळंबी उत्पादन करणे यासंबंधी संपूर्ण माहिती दिली जाणार आहे. पशुसंवर्धनतज्ज्ञ डॉ. श्याम पाटील, गृहविज्ञानतज्ज्ञ अर्चना देशमुख मार्गदर्शन करतील. कृषी विज्ञान केंद्राचे प्रमुख प्रा. रावसाहेब पाटील यांनी प्रास्ताविक केले. विस्तार शास्रज्ञ डॉ. नितीन ठोके यांनी सूत्रसंचालन केले. पशुसंवर्धनतज्ज्ञ डॉ. श्याम कडूस यांनी आभार मानले. या प्रशिक्षणासाठी जिल्ह्यातील ४० प्रशिक्षणार्थींनी भाग घेतला आहे.
तांत्रिक ज्ञान पुरविणार
डॉ. म्हैसेकर म्हणाले, की युवकांनी स्वयंरोजगार निर्माण करावेत. स्वयंरोजगाराची गरज ओळखूनच कृषी विज्ञान केंद्रामार्फत कौशल्याधिष्ठित प्रशिक्षणाचे आयोजन केले आहे. ज्ञान आणि कौशल्य यांची सांगड घालून यशस्वी उद्योजक बनता येते, याची प्रचीती केंद्राने यापूर्वी राबविलेल्या प्रशिक्षणातून तयार झालेल्या प्रशिक्षणार्थींना पाहून येते. आज ते मोठे व्यावसायिक बनले असून, ग्रामीण भागातील महिलांना व ग्रामीण युवकांना मोठ्या प्रमाणावर रोजगार पुरवीत आहेत. आगामी काळात ग्रामीण युवकांनी उद्योग सुरू करण्यासाठी पुढाकार घ्यावा, त्यांना कृषी विज्ञान केंद्रामार्फत तांत्रिक ज्ञान पुरविण्यात येईल, अशी ग्वाही त्यांनी याप्रसंगी दिली.
मोबाइल अॅप डाउनलोड करा आणि राहा अपडेट
