म. टा. खास प्रतिनिधी, नाशिक
इंजिन किती धावेल, धनुष्यबाण कोणाला घायाळ करील, कमळ किती फुलेल, राष्ट्रवादीच्या घड्याळाचा काटा सरकेल की मागे फिरेल, काँग्रेसला किती हात मिळेल, याची चिंता समस्त नाशिककर बुधवारी करीत असताना या पक्षांचे धुरीण मात्र चक्क एकत्र येऊन मिसळवर ताव मारत होते. निमित्त होते एका आगळ्यावेगळ्या श्रमपरिहाराचे. ‘मिसळ पे चर्चा’ उपक्रमाचे.
निवडणुकीत चिखलफेकीमुळे निर्माण झालेली कटुता कमी करतानाच आता शहर विकासासाठी एकत्र येण्याचा संदेश या राजकीय पक्षांच्या नेत्यांनी दिला. सोबतच निकालानंतर पुन्हा चिखलफेक होऊ नये अशी अपेक्षाही व्यक्त करण्यात आली. ज्या प्रमाणे सर्व पदार्थांची सरमिसळ केल्याने मिसळचा स्वाद वाढतो, त्याच धरतीवर विचारांची सरमिसळ होऊन राजकारणाचा स्वाद वाढावा, या उद्देशाने मिसळ पार्टी आयोजित करण्यात आली होती. प्रचारात घडलेले किस्से, घाऊक पक्षांतरासह अनेक मुद्द्यांवर या वेळी हास्यविनोद करीत काही मंडळींनी चर्चेची रंगत वाढवली.
‘महाराष्ट्र टाइम्स’ने निवडणूक काळात घेतलेल्या ‘मटा जाहीरनामा’ प्रकाशन सोहळ्यात जमलेल्या राजकीय पक्षांच्या कार्यक्रमात राष्ट्रवादीचे शहराध्यक्ष रंजन ठाकरे यांनी निवडणुकीनंतर राजकीय कटुता कमी करण्यासाठी ‘मिसळ’ पार्टीची संकल्पना मांडली होती. त्यानुसार रंजन ठाकरे यांनी मतदान संपल्यानंतर बुधवारी सर्वपक्षीय शहराध्यक्षांना मिसळ पार्टीसाठी आमंत्रित केले. महापौर अशोक मुर्तडक, उपमहापौर गुरूम‌ित बग्गा, शिवसेनेचे महानगरप्रमुख अजय बोरस्ते, भाजपचे शहराध्यक्ष आमदार बाळासाहेब सानप, आमदार प्रा. देवयानी फरांदे, आमदार जयंत जाधव, काँग्रेसचे शहराध्यक्ष शरद आहेर, राष्ट्रवादीचे प्रदेश सरचिटणीस नाना महाले, नगरसेवक सचिन महाजन व माध्यमांचे ज्येष्ठ प्रतिनिधी उपस्थित होते. राजकीय कटुता कमी करण्याचा शहराध्यक्षांचा प्रयत्न वाखणण्याजोगा असून, या आदर्श पॅटर्नचे अनुकरण राज्यातही व्हावे अशी अपेक्षा व्यक्त करण्यात आली.
मह‌िनाभरापासून उमेदवारांची निवड, प्रचाराचे नियोजन, बाहेरून येणाऱ्या नेत्यांच्या सभांच्या यशस्वीतेच्या जबाबदारीसह प्रत्यक्षात पक्षाला विजयी करण्यात व्यस्त असलेल्या नेत्यांनी राजकीय शीण घालवण्यासह प्रचारात झालेली कटूता दूर करण्याचा प्रयत्न केला. काही मंडळींनी एकमेकांची खेचाखेची करत, निवडणुकीत कार्यकर्ते आणि पदाधिकाऱ्यांचे आलेले कटू अनुभवही शेअर केले. सोबतच निकालानंतर होणाऱ्या राजकीय मोर्चेबांधणीची धावती चर्चा केली. कार्यकर्ते ते प्रदेश नेत्यांची व्यवस्था करत, झालेल्या दमछाकीचे काही अनुभवही कथन केले.
मिसळ ही नाशिकची संस्कृती आहे. त्यामुळेच हा उपक्रम निवडलाय एकमेकांबद्दल झालेली कटूता दूर करण्याचा हा एक प्रयत्न होता. निकाल काहीही लागो, आता कटुता विसरून शहर विकासासाठी आम्ही काम करण्याचा प्रयत्न करणार आहोत.
- रंजन ठाकरे
शहराध्यक्ष, राष्ट्रवादी काँग्रेस
प्रत्येकाने पक्षाच्या प्रचाराचे काम प्रामाणिकपणे केले. निवडणुकीत एकमेकांवर आरोप जरी केले असले तरी सगळ्यांचे मित्रत्वाचे संबंध असून, ते कायम राहण्यासाठी हा चांगला पायंडा आहे.
-आमदार बाळासाहेब सानप
शहराध्यक्ष, भाजप
मिसळ ही नाशिककरांना एकत्र आणते. निवडणुकीत एकमेकांवर आरोपांची चिखलफेक, हेवेदावे निवडणुकीपुरतेच मर्यादित होते. आता आम्ही सगळे शहराच्या हिताचा विचार करणार आहेत.
-अशोक मुर्तडक,
महापौर,नाशिक
निवडणुकीतील कटुता विसरून एकत्र येऊन नाशिकची संस्कृती जपण्याचा हा चांगला उपक्रम आहे. मतभेद विसरून पुढील पाच वर्षे शहराच्या विकासासाठी एकत्र यावे, अशी इच्छा आहे.
गुरूम‌ित बग्गा, उपमहापौर,नाशिक
मिसळ पार्टीच्या निमित्ताने नाशिककर म्हणून सगळेच एकत्र आले आहेत. आम्ही सर्व एकत्र आहोत हा संदेश या माध्यमातून सगळ्यांनाच जाणार आहे.
-अजय बोरस्ते
महानगरप्रमुख, शिवसेना
निवडणुकीत कार्यकर्त्यांच्या भावना टोकाच्या असतात. त्यामुळे नेत्यांनाही झुंजावे लागते. परंतु, निकोप लोकशाहीमुळे सर्वांना एकत्र यावे लागते.
-जयंत जाधव
आमदार
आमच्यात मनभेद नव्हते. आता शीण गेला असून, सर्वांनी एकत्र येणे हे निकोप लोकशाहीचे लक्षण आहे. आम्ही विकासासाठी एकत्र काम करू
-शरद आहेर
काँग्रेस शहराध्यक्ष
निवडणुकीत आरोप प्रत्यारोपांमुळे एकमेकांची मने दुखावली असली तरी मिसळ चर्चेतून आता ती दूर होतील. आता सर्वांनाच नाशिककरांच्या विकासासाठी सर्वांना झटावे लागणार आहे.
-प्रा. देवयानी फरांदे, आमदार, भाजप
मोबाइल अॅप डाउनलोड करा आणि राहा अपडेट
