स्वातंत्र्यासाठी सशस्त्र क्रांतीचा पुरस्कार करणारे थोर देशभक्त, साहित्यिक आणि समाजसुधारक व स्वातंत्र्यवीर म्हणून ओळखले जाणारे विनायक दामोदर सावरकरांच्या पुण्यतिथीनिमित्त त्यांच्या स्मृतींना उजाळा देण्यासाठी ‘महाराष्ट्र टाइम्स’तर्फे भगूर येथे रविवारी, २६ फेब्रुवारीला सकाळी ८.३० वाजता हेरिटेज वॉकचे आयोजन करण्यात आले आहे. भगूर येथील सावरकर राष्ट्रीय स्मारक येथे ‘मटा’ हेरिटेज वॉकच्या माध्यमातून स्वा. सावरकरांना अभिवादन तसेच त्यांच्या कार्याची माहिती करून देण्यात येणार आहे.
देशभक्तीचे स्फुल्लिंग चेतविणारे स्वातंत्र्यवीर विनायक दामोदर सावरकर (जन्म २८ मे १८८३; मृत्यू २६ फेब्रुवारी १९६६) हे आजही देशभक्तीच्या विचारांनी तरुणांच्या नसानसांत सळसळताना दिसतात. भारतीय स्वातंत्र्यलढ्यातील एका क्रांतिकारक चळवळीचे धुरीण, स्वातंत्र्यपूर्व आणि स्वातंत्र्योत्तर भारतीय राजकारणातील एक महत्त्वाचे राजकारणी, हिंदूसंघटक व हिंदुत्वाचे एक विशिष्ट तत्त्वज्ञान मांडणारे तत्त्वज्ञ, विज्ञानाचा पुरस्कार व जातिभेदाला तीव्र विरोध करणारे समाज क्रांतिकारक, भाषाशुद्धी व लिपिशुद्धी या चळवळींचे प्रणेते, प्रतिभावंत साहित्यिक आणि प्रचारक असे अनेक पैलू सावरकरांच्या व्यक्तिमत्त्वाला होते. कवी व लेखक म्हणूनही प्रसिद्ध असलेल्या स्वा. सावरकरांनी पत्रकारिता ते समाजसुधारक म्हणूनही केलेले कार्य अनोखे आहे. असे अनेक पैलू मटा हेरिटेज वॉकच्या माध्यमातून थेट त्यांच्याच जन्मघर असलेल्या स्वा. सावरकर राष्ट्रीय स्मारकात उलगडले जाणार आहेत. हेरिटेज वॉकमध्ये प्रा. रामनाथ रावळ, प्रशांत पाटील, न‌िखील देशमुख उपस्थितांना सावरकरांच्या विविध पैलूंविषयी माहिती देतील. सावरकांच्या घरातील स्वातंत्र्यलक्ष्मीची मूर्ती खंडोबा मंदिरात आहे हे मंदिर व स्वातंत्र्यलक्ष्मीचे दर्शनही घेण्याची संधी हेरिटेज वॉकच्या माध्यमातून मिळणार आहे. तसेच करंजकर गल्लीतील मुरलीधर मंदिरही पाहण्याची संधी नाशिककरांना मिळणार आहे.
काय पाहता येणार?
हेरिटेज वॉकमध्ये सहभागी होऊ इच्छ‌िणाऱ्यांनी सकाळी ८.३० वाजता सावरकर स्मारकात जमायचे आहे. स्वा. सावरकरांचे जन्म घर पाहिल्यानंतर करंजकर गल्लीतील मुरलीधर मंदिर व त्यानंतर अष्टभुजा स्वातंत्र्यलक्ष्मीची खंडोबा मंदिरातील मूर्ती पाहणार आहोत.
नावनोंदणी आवश्यक
मटा हेरिटेज वॉकमध्ये सहभागी होण्यासाठी नावनोंदणी करणे आवश्यक आहे. सहभागी होऊ इच्छ‌िणाऱ्यांनी रमेश पडवळ यांच्या ८९९९००८५८८ या क्रमांकावर आपले नाव व सोबत येणाऱ्यांची संख्या व्हॉटसअप अथवा एसएमएस करावी.
मोबाइल अॅप डाउनलोड करा आणि राहा अपडेट
