म. टा. प्रतिनिधी, नाशिक
कविवर्य सुरेश भट हे गझल या प्रकाराला वैभव मिळावे म्हणून सदैव प्रयत्नशील होते. अखिल भारतीय मराठी साहित्य संमेलनात त्यासाठी स्वतंत्र कार्यक्रम असावा, अशी त्यांची इच्छा होती. गझलची वाढती लोकप्रियता बघून यंदाच्या डोंबिवलीतील साहित्य संमेलनात गझल कट्टा हा कार्यक्रम आयोजित केला होता.
यामध्ये नाशिकच्या कवींनी आपली छाप पाडली. महाराष्ट्र साहित्य परिषदेच्या नाशिकरोड शाखेतर्फेही मराठी राजभाषा दिनाच्या दिवशी गझल कार्यक्रमाचे आयोजन करण्यात आले आहे. सोमवारी (दि. २७) सायंकाळी ६ वाजता ‘रंग अक्षरांचे’ हा कार्यक्रम आशानगर सभागृह, व्यापारी बँकेसमोर, बिटको चौकाजवळ, नाशिकरोड येथे आयोजित करण्यात आला आहे.
गझल सादर करतांना कवीचा कस लागतो. या साहित्य प्रकारास मोठ्या प्रमाणात स्वीकारल्यास त्यास राज्यस्तरावर मान्यता मिळेल आणि म्हणून नाशिक शहरातील रसिकांनी जास्तीत जास्त संख्येने कार्यक्रमास उपस्थित राहावे, असे आवाहन कार्याध्यक्ष उन्मेष गायधनी, उपाध्यक्ष दत्ता गायकवाड, प्र. कार्यवाह प्रसाद पवार, जिल्हा प्रतिनिधी नितीन ठाकरे, कोषाध्यक्ष सुदाम सातभाई, प्रशांत केंदळे, दशरथ लोखंडे, कामिनी तनपुरे, सुरेखा गणोरे, सुजाता हिंगे, विश्वास गायधनी, हर्षल भामरे, शिवाजी म्हस्के, रमेश औटे, मानसी घमंडी, मनीषा विसपुते, राहुल बोराडे, महेश वाजे आदींनी केले आहे.
‘शेर’ ठरणार आकर्षण
नाशिकचे वैभव ज्ञानपीठ पुरस्कारविजेते साहित्यिक कुसुमाग्रज यांची जयंती मराठी राजभाषा दिन म्हणून साजरी केली जाते. त्यानिमित्त महाराष्ट्र साहित्य परिषदेच्या नाशिकरोड शाखेने या वर्षी मराठी गझलांचा कार्यक्रम आयोजित केला आहे. यामध्ये नाशिकचेच ज्येष्ठ कवी गौरवकुमार आठवले आणि ज्यांच्या नावावर गझलांचे रेकॉर्ड आहे असे हरहुन्नरी कवी संतोष हुदलीकर यांच्या गझलांचा कार्यक्रम होणार आहे. गझल पेश करण्याच्या आधी एक शेर सादर करण्याची परंपरा असल्याने त्यासदेखील तेवढेच महत्त्व असते आणि म्हणूनच ही मैफल रंगत जाते. परिसरातील रसिकांना या साहित्याच्या मेजवानीचा लाभ मिळवा यासाठी हा कार्यक्रम आयोजित करण्यात आला आहे.
मोबाइल अॅप डाउनलोड करा आणि राहा अपडेट
