जिल्हा परिषद व पंचायत समितीच्या पंचवार्षिक निवडणुकीच्या निकालानंतर आता मिनी मंत्रालय समजल्या जाणाऱ्या ‘झेडपी’ अध्यक्षपदाच्या रुपाने लाल दिव्याची गाडी कुणाकडे येणार, अन् तालुक्यातील गावोगावच्या गावगाड्याची नाडी हाती असलेल्या पंचायत समितीच्या ‘सभापती’पदी नेमकी कुणाची वर्णी लागणार? याकडे येवला तालुक्यातील जनतेच्या नजरा लागल्या आहेत.
निवडणुकीत दहापैकी सात जागा जिंकत स्पष्ट बहुमत प्राप्त केलेल्या शिवसेनेचाच सभापती व उपसभापती होणार हे येवल्यातील उघड चित्र लक्षात घेता या पदांवर पहिल्यांदा नेमकी कुणाला संधी मिळते? याची सर्वांनाच उत्सुकता लागली आहे.
सभापती-उपसभापतीपदी अनेक नावे चर्चेत असताना इच्छुकांच्या आशेला देखील घुमारे फुटले आहेत. जिल्हा परिषद आणि पंचायत समितीच्या लक्षवेधी निवडणुकीत येवला तालुक्यात अगदी जोरदार मुसंडी मारलेल्या शिवसेनेने राष्ट्रवादीच्या अनेक वर्षांच्या बालेकिल्ल्याला सुरुंग लावला. सेनेच्या झंजावातात राष्ट्रवादीचा येवल्यातील गडाचे बुरुज ढासळले. शिवसेनेने ‘झेडपी’च्या तालुक्यातील पाच जागांपैकी तीन, तर पंचायत समितीच्या दहापैकी सात जागा जिंकल्या. पंचायत समितीत सेनेचे निर्विवाद बहुमत समोर आहे. त्यामुळेच या पदांच्या साधारण १२ अथवा १३ मार्चच्या होणाऱ्या निवडीकडे सर्वांचे लक्ष लागल्याचे दिसत आहे. पहिल्या अडीच वर्षांसाठी येवला पंचायत समितीचे सभापतीपद हे ओबीसी स्त्री राखीव प्रवर्गासाठी राखीव आहे. अंदरसूल गणातून विजयी झालेल्या नम्रता जगताप, सावरगाव गणातील आशाबाई साळवे यांचे नाव शिवसेनेकडून सभापतीपदासाठी अधिक चर्चेत आहे. या दोघींशिवाय पंचायत समितीच्या चिचोंडी गणातून विजयी झालेल्या सेनेच्याच कविता आठशेरे यांचे देखील नाव आता सभापतीपदासाठी चर्चेत येण्यास सुरुवात झाली आहे. आठशेरे या ओबीसी स्त्री राखीव जागेवर निवडुन आलेल्या नसल्या तरी त्यांच्याकडे ओबीसीचा दाखला असल्याचे बोलले जात आहे. जगताप, साळवे व आठशेरे या तिघींना प्रत्येकी दहा-दहा महिन्याची ‘टर्म’ असा फॉर्म्युला राबविला जाण्याची दाट शक्यता आहे. असा फॉर्म्युला राबवला गेला तर आताची पहिली संधी कुणाला मिळते हे पाहणे औत्सुक्याचे ठरणार आहे.
मोबाइल अॅप डाउनलोड करा आणि राहा अपडेट
