सप्टेंबर महिन्याच्या सुरुवातीला शहरात गणपतीचे जोरदार स्वागत झाले. गौरीपूजनाची सर्वत्र लगबग होती. स्त्रीशक्तीचा जागर होत असताना एका निर्दयी कुटुंबाने अवघ्या १५ दिवसांच्या मुलीला मरण्यासाठी रस्त्यावर फेकले. नशीब बलवत्तर म्हणून ती वाचली. मात्र, सहा महिने झाले तरी तिच्या पालकाचा पत्ता नाही. २०१६ मध्ये अशा प्रकारे दहा मुलांना मरण्यासाठी रस्त्यावर सोडून देण्यात आल्याचे पोलिस नोंदीवरून स्पष्ट होते. हे अर्भक शिंदे हॉस्पिटलपासून काही फर्लांगावर आढळल्याने या घटनेचा संबंधही पोलिस आता नव्याने पडताळून पाहत आहेत.
मुंबई नाका पोलिस स्टेशनचा दूरध्वनी ९ सप्टेंबरच्या भल्या सकाळी खणखणला. कपड्यात गुंडाळलेलं लहान मूल मोकळ्या जागेत असून, रडत असल्याचे समोरील व्यक्तीने सांगितले. गर्भपात प्रकरणात चर्चेत असलेल्या डॉ. बळीराम शिंदेच्या हॉस्पिटलपासून काही फर्लांग अंतरावर हा प्रकार घडला होता. त्या वेळी पोलिसांच्या डॉग स्क्वॉडने भाभानगरमार्गे भारतनगर झोपडपट्टीपर्यंत माग काढला. मात्र, तपासात पुढे काही प्रगती झाली नाही. तपासाची फाइल बंद होण्याच्या मार्गावर असताना डॉ. बळीराम शिंदेच्या हॉस्पिटलमध्ये सुरू असलेला गैरप्रकार उघडकीस आला. शिंदे हॉस्पिटलपासून काही फर्लांग अंतरावर हे अर्भक सापडले होते. त्या वेळी या दोन घटनांचा अर्थाअर्थी संबंध जोडला गेला नव्हता. आता मात्र पोलिस तसे कनेक्शन शोधून काढण्यासाठी प्रयत्न करत आहेत. तपासाधिकारी पीएसआय प्रणिता पवार यांनी सांगितले, की डॉ. शिंदे हॉस्पिटलमध्ये झालेल्या गैरप्रकारांबाबत गुन्हा दाखल असून, चौकशी सुरू आहे. त्यात या अर्भकाच्या प्रकरणाचे डॉ. शिंदे हॉस्पिटलशी काही कनेक्शन आहे काय, हे तपासून पाहिले जात आहे. यासाठी डॉ. शिंदे हॉस्पिटलच्या कर्मचाऱ्याकडे चौकशी केली जाईल, असे पीएसआय पवार यांनी स्पष्ट केले. अर्भकास मरण्यासाठी रस्त्यावर सोडून देण्याचे शहरात महिन्याकाठी किमान एक प्रकरण समोर येते. कोवळे जीव वाचले तर त्यांना ‘वात्सल्य’मध्ये भरती केले जाते. गत वर्षात १० पैकी तीन अर्भक मृतावस्थेत आढळले होते.
पीएसआय पवारांची इच्छा अद्याप अपूर्ण
१५ दिवसांच्या त्या निरागस मुलीची दोन दिवस पीएसआय पवार यांनी देखभाल केली. रस्त्यावर सोडून देण्यात आल्याने डासांनी तिला हैराण करून सोडले होते. या मुलीला दत्तक घेण्याची त्यांची इच्छा आहे. त्यांनी तसा अर्जही संबंधीत विभागाकडे केला आहे. मात्र, मूल दत्तक घेणाऱ्या पालकाला कोणते मूल दत्तक घ्यायचे हे सांगता येत नाही. तसा अधिकारच पालकांना नाही. माझे प्रयत्न सुरू असून, त्याला कितपत यश मिळते, याची प्रतीक्षा असल्याचे पीएसआय पवार यांनी सांगितले.
मोबाइल अॅप डाउनलोड करा आणि राहा अपडेट