म. टा. प्रतिनिधी, नाशिक
भरजरी नऊवारीचा साज जपत, मस्तकावरील फेट्याचा रूबाब सांभाळत विविधरंगी, विविधढंगी वेशभूषेसह संवेदनशील सामाजिक संदेशांमुळे रविवारी ‘महाराष्ट्र टाइम्स’तर्फे आयोजित ऑल वूमेन्स बाइक रॅली शहरात चर्चेचा विषय ठरली. भोसला कॉलेजच्या मैदानावर आयोजित करण्यात आलेल्या या उपक्रमास रविवारी हजारो महिलांनी उत्स्फूर्त प्रतिसाद दिल्याने या उपक्रमास बहार आली. अगदी कॉलेजकन्यकांपासून ते साठी उलटलेल्या आजीबाईंपर्यंत सर्वांनी विविध प्रकारच्या बाइकवर स्वार होत, आपल्यातला उत्साह, उमेद दाखवून दिली आणि जबरदस्त जल्लोष केला.
वेशभूषेसाठी पारंपरिक थीमसह वेस्टर्न लूकवरही भर देत अनेक महिला वूमेन्स डेनिमित्त आयोजित या उपक्रमात सहभागी झाल्या होत्या. हाती असणाऱ्या स्कूटीपासून, तर रॉयल एनफ‌ल्डिपर्यंत विविध गाड्या रुबाबदारपणे चालवत महिलांनी उत्साही जल्लोष केला. सीएचएमई सोसायटीच्या विद्या प्रबोधिनी शाळेच्या (कॉलेजरोडकडील गेट) मैदानावरून सकाळी ७.३० वाजेच्या सुमारास या रॅलीला सुरुवात झाली. महापौर अशोक मुर्तडक, उपमहापौर गुरुम‌ति बग्गा, माजी मिस फेम‌निा उत्तरा खेर, आंतरराष्ट्रीय धावपटू मोनिका आथरे, क्रीडा प्रशिक्षक विजयेंद्र सिंग, ब्रह्माकुमारी परिवारातील मान्यवर यांच्या प्रमुख उपस्थितीत बाइक रॅलीला हिरवा झेंडा दाखविण्यात आला. या उपक्रमात सहभागी महिलांनी त्यांच्या वाहनांची कल्पकतेने सजावट करत सामाजिक संदेशांचे फलक हाती घेतले होते. पारंपरिक वेशभूषेतील महिलांच्या सहभागाने या उपक्रमात रंगत आणली.
भोसला मिलिटरी कॉलेजपासून सुरू झालेल्या रॅलीचा कॉलेजरोडमार्गे डोंगरे वसतिगृह मैदान, गंगापूररोड, जेहान सर्कल, नवश्या गणपती, बारदान फाटा, साधना मिसळ, मोतीवाला कॉलेज, त्र्यंबकरोड, एबीबी सर्कल असे सुमारे बारा किलोमीटरचे अंतर पूर्ण करून पुन्हा भोसला मिलिटरी कॉलेजच्या मैदानावर समारोप झाला.
संदेशांतून समाजप्रबोधन
घराच्या उंबरठ्यापासून तर प्रत्येक आघाडीवर लढणाऱ्या महिलांनी या उपक्रमात सहभागी होताना सामाजिक संवेदनाही जागविल्या. यावेळी ‘मुलगी वाचवा’, ‘पर्यावरण, पाणी वाचवा’, ‘वाहतूक नियम पाळा’, ‘सार्वजनिक स्वच्छता’ यांसारख्या विविध सामाजिक विषयांबाबत प्रबोधन करणारे संदेश दिले.
ड्रेसकोडने वेधले लक्ष
या उपक्रमात अनेक महिलांनी नावनोंदणी ही समूहानेच केली होती. समूहाने सहभागी होताना वेशभूषा, केशभूषा, ड्रेसकोडची थीम, सामाजिक संदेशांच्या संकल्पना यावेळी महिलांनी मांडल्या. यात ब्रह्माकुमारी परिवारातील साधक महिलाही सहभागी झाल्या होत्या. याशिवाय महिलांसाठी कार्यरत विविध संघटनाही रॅलीत उत्स्फूर्तपणे सहभागी झाल्या. ग्रुपमधील महिलांच्या विविध ड्रेसकोडने सर्वांचे लक्ष वेधून घेतले होते.
कॅप अन् फेट्यांची भुरळ
बाइक रॅलीत सहभागी अनेक तरुणी आणि महिलांनी छाप पाडण्यासाठी वेगवेगळे शिरस्त्राण परिधान केले होते. हेल्मेटसोबतच वेगवेगळ्या रंगांचे फेटे, राजस्थानी पगडी घालून महिला या रॅलीत सहभागी झाल्या होत्या. सोबतच पुणेरी पगडी, गांधी टोपी, ट्रॅव्हल कॅप, ट्रॅडिशनल रेट्रो कॅप यांचीही कमालीची चलती बाइक रॅलीत बघायला मिळाली. कॅप आणि फेट्यांमुळे प्रत्येकीचा लूक हटके दिसून येत होता.
हटके बाइक्सला पसंती
बाइक रॅलीमध्ये बुलेट, रॉयल एन्फिल्ड, यामाहा आरएक्स १०० या विंटेज बाइक्स आकर्षण ठरत होत्या. त्याचबरोबर रॅलीत सहभागी अनेक तरुणींनी यावेळी स्पोर्टस बाइकला पसंती दिली. कावासाकी निन्जा, यामाहा एफजी, करिझ्मा या बाइक्सवर स्वार होऊन तरुणींनी आपली वेगळी झलक दाखवून दिली. याचबरोबर गॅझेट क्लाउड ही ऑफ रोड बाइकही या रॅलीत आकर्षणाचा विषय ठरली. रोजच्या वापरातील मोपेड, बाइक्ससोबत गीअर बाइक्सचा अफलातून अनुभव घेत सर्वांनी बाइक रॅलीत कल्ला केला.
मराठमोळा तोरा...
नऊवार साडी, डोक्यावर फेटा, गॉगल, कोल्हापुरी चप्पल असा मराठमोळा तोराही यावेळी दिसून आला. बहुतांश महिला, तरुणींनी ही वेशभूषा साकार करून मराठी संस्कृतीचे दर्शन दाखवून दिले. विविधरंगी फेट्यांमधूनही महिलांची विविधतेत एकता यावेळी दिसून आली. महिला सक्षमीकरणासाठी भारतमाता, मदर तेरेसा यांच्या वेशभूषा महिलांनी साकारल्या होत्या. त्याचबरोबर एका चिमुकलीने गीता फोगट या कुस्तीपटूची वेशभूषा करून ‘छोरिया छोरों से कम नहीं’ असा फलक हातात घेऊन सामाजिक संदेश दिला.
नारीशक्तीचा दिला नारा
बाइक रॅली म्हणजे केवळ आनंद, उत्साह असे न माय़ता यापलीकडे सामाजिक जबाबदारीचे भानही महिलांमध्ये दिसून आले. आपल्या गीअर, मोपेड बाइक्स, टी-शर्ट, कॅपवर प्रत्येकीने संदेश लिहून आणला होता. तसेच, रॅलीमध्येही नारीशक्तीचा नारा या महिलांनी दिला. बेटी बचाओचा संदेश देण्यापासून ते सेफ ड्रायव्हिंग, पर्यावरण संरक्षण, सामाजिक विषयांना हात घालणाऱ्या घोषणा या महिला देत होत्या. या संदेशांनी बघ्यांची मने जिंकली.
ग्रुप्समुळे दिसले एकीचे बळ
बाइक रॅलीत आकर्षणाचा महत्त्वाचा भाग ठरला तो महिलांचे विविध ग्रुप्स. या ग्रुपमध्ये पाच वर्षांच्या चिमुरडीपासून ते पन्नाशी ओलांडलेल्या महिलांचा सहभाग होता. या प्रत्येक ग्रुपने आपले वेगळेपण दाखवून देण्याचा प्रयत्न यावेळी केला. प्रत्येक ग्रुपने आपली एकी दाखवून स्त्रिया सक्षम आणि खंबीर असल्याचे दाखवून दिले. वेगवेगळे ग्रुप्स असले, तरीही महिला सक्षमीकरणासाठी एकत्र येऊन एकीचे बळ महिलांनी दाखवून दिले.
झुम्बा डान्स अन् कौतुक
या रॅलीच्या समारोपाच्या सत्रात झुम्बा डान्स आकर्षण केंद्र ठरला. सहभागी सर्वच महिलांनी झुम्बाच्या तालावर ठेका धरत जोरदार जल्लोष केला. यावेळी रॅलीत सहभागी महिलांचे उत्कृष्ट पोशाख, उत्कृष्ट वाहन सजावट, चांगले सामाजिक संदेश आदी वर्ग करून त्यांच्यातील निवडक महिलांना प्रोत्साहनपर बक्षिसे देण्यात आली.
बक्षिसांद्वारे कौतुक...
रॅलीत सहभागी महिलांना प्रोत्साहन देण्यासाठी विविध बक्षिसे यावेळी देण्यात आली. यामध्ये सर्वांत जास्त वय असलेल्या प्रमिला पाटील यांना विशेष बक्षीस देण्यात आले. तसेच, ब्रह्माकुमारी ग्रुपलाही वेशभूषा आणि सामाजिक संदेशाबद्दल बक्षीस देण्यात आले. यावेळी ‘टाइम्स ग्रुप’च्या नाशिक रिस्पॉन्स हेड मंजिरी शेख, ‘महाराष्ट्र टाइम्स’चे निवासी संपादक शैलेन्द्र तनपुरे यांची प्रमुख उपस्थिती होती.
या ठरल्या बेस्ट
बेस्ट वेस्टर्न कॉश्च्युम - जुईली पानसे
बेस्ट ट्रेडिशनल कॉश्च्युम - ईशा कुमावत
बेस्ट डेकोरेटेड हेल्मेट - डॉ. मनीषा रौंदळ
बेस्ट डेकोरेटेड बाइक - दीप्ती पुराणिक
बिगेस्ट ग्रुप - ठेवा संस्कृतीचा ग्रुप
बेस्ट मेसेज - आय अॅक्टिव्ह ग्रुप
---
मान्यवरांकडून दाद
‘महाराष्ट्र टाइम्स’चा हा उपक्रम म्हणजे महिलांसाठी जणू एक पर्वणीच असते. मी तर म्हणेण, फक्त महिला दिनानिमित्त नाही तर विविध कारणांनी महिलांनी एकत्र यावे, जेणेकरून खऱ्या अर्थाने महिला सशक्तीकरण होईल. ‘महाराष्ट्र टाइम्स’वर्षभर असेच उपक्रम राबवावेत, असे मनापासून वाटते.
- अशोक मुर्तडक, महापौर
महाराष्ट्र टाइम्सची वूमेन्स बाइक रॅली म्हणजे एकप्रकारे नाशिकच्या महिलांसाठी एक सणाचा आणि आनंदाचा माहोल असतो. त्याचमुळे महिलांच्या एकीचे दर्शन आपल्याला घडते. इतक्या महिलांना एकत्र आणण्याचे काम सोपे नसते. भविष्यातही ‘मटा’ने असेच उपक्रम घेऊन महिलांसाठी व्यासपीठ उपलब्ध करून द्यावे.
- गुरुमित बग्गा, उपमहापौर
‘महाराष्ट्र टाइम्स’च्या इतक्या मोठ्या उपक्रमात सहभागी होऊन खूप छान वाटले. अगदी सर्वच वयोगटांतील सहभागाने महिलांची एकी दिसून आली. अनेक मुली स्वतः सजून आल्या होत्या. काहींनी आपली बाइक सजवली होती, हे बघून महिला कुठेच मागे राहिलेल्या नाहीत हे दिसले.
- मोनिका आथरे, धावपटू
नाशिकच्या मुलींमधील स्पार्क बघता पुढील वर्षी मोपेडपेक्षा गीअर बाइक्सची संख्या जास्त असेल यात शंका नाही. ‘मटा’ बाइक रॅलीच्या निमित्ताने सर्व महिला एकत्र येतात. नवीन ओळख होते, अनेकांना नवीन मैत्रिणी भेटतात, सोबतच ऑफीस आणि घरच्या कामातून काही तरी हटके करायला मिळते, हे या वूमेन्स बाइक रॅलीमुळे शक्य होते.
- उत्तरा खेर, माजी मिस फेमिना
--
सहभागींचे बोल...
बाइक रॅलीने आम्हाला खूप प्रोत्साहन मिळाले असून, सामाजिक संदेश देण्यासाठी व सामाजिक उपक्रमांसाठी ‘मटा’ची वूमेन्स बाइक रॅली’ एक महत्त्वाचे व्यासपीठ आहे. या रॅलीत सर्व महिला एकमेकींची तारीफ करीत प्रोत्साहित करत होत्या. वूमेन्स युनिटीची पॉवर या रॅलीतून नक्कीच सर्वांना समजली आहे.
- जयश्री पेखळे
यंदा बाइक रॅलीत सहभागी होण्याचे दुसरे वर्ष होते अन् पुढील वर्षीही नक्की येणार आहे. जास्तीत जास्त महिलांनी यात सहभागी व्हायला हवे. बाइक रॅलीमुळे उत्साह दुणावतो हे नक्कीच. बाइक रॅलीत नारीशक्तीचा जल्लोष वाखाणण्याजोगा होता. अनोखा महिला दिन साजरा करता आल्याने ‘मटा’ला खूप धन्यवाद.
- दीप्ती भुतडा
महिला दिनानिमित्त आयोजित केलेल्या रॅलीसाठी आधीपासूनच खूप उत्सुक होते. रॅलीचा एकूणच अनुभव खूप छान, रिफ्रेशिंग अन् जबरदस्त होता. रोजच्या धावपळीतून उसंत काढत महिला बाइक रॅली एन्जॉय केली. महिलांसाठी बाइक रॅली क्वचितच असते. वुई आर स्पेशल ही जाणीव नव्याने झाली.
- डॉ. रुपाली खैरे
आम्ही या बाइक रॅलीमधून ब्रेस्ट कॅन्सरबाबतचा सामाजिक संदेश देत रॅली फुल टू एन्जॉय केली. वूमेन्स बाइक रॅलीमुळे आम्हाला एक नवा प्लॅटफॉर्म मिळाला आणि यातून समाजात एक नवी चेतना निर्माण होऊ शकेल. महिलांना एकत्र आणणारे चांगले व्यासपीठ ‘मटा’ने उपलब्ध करून दिले असल्याचे मला वाटते.
- स्नेहल पुराणिक
‘मटा’च्या वूमेन्स बाइक रॅलीमध्ये आम्ही ग्रुपने खूप धम्माल केली. जागतिक महिला दिनानिमित्त बाइक रॅली घेऊन सामाजिक संदेश देण्यासाठी एकत्र आल्याने अभिमान वाटला. महिलांसाठी असे व्यासपीठ कायम उपलब्ध करून देण्यात यावे.
- गौरी मेतकर
मोबाइल अॅप डाउनलोड करा आणि राहा अपडेट
