म. टा. खास प्रतिनिधी, नाशिक
जिल्हा परिषद व पंचायत समितीत मंत्र्यांच्याच मतदारसंघात झालेल्या दारुण पराभवामुळे नैतिक जबाबदारी स्वीकारून पक्षाकडे राजीनामा देणारे ग्रामविकास खात्याच्या कॅबिनेट मंत्री पंकजा मुंडे व राज्यमंत्री दादा भुसे हे बचत गटाच्या कार्यक्रमानिमित्त नाशिकला एकत्र आले होते. दोन्ही मंत्र्याचे पक्ष वेगवेगळे पण खाते एकच असल्यामुळे त्यांनी बचावात्मक पवित्रा घेत राजकीय भाष्य टाळले.
ग्रामविकास खात्याशी निगडीत असलेल्या जिल्हा परिषद व पंचायत समितीत या नेत्यांना यश मिळणे अपेक्षित असतांना त्यांच्या पक्षाला मात्र पराभव स्वीकारावा लागला. त्यामुळे हे नेते कमालीचे नाराज झाले व
त्यांनी थेट राजीनामा देण्याची घोषणा केली. पण पक्षाने त्यांचे राजीनामे स्विकारले नाही. दोन्ही मंत्र्यांनी शनिवारी डोंगरे वसतीगृहाच्या मैदानावर हजेरी लावली व कानात गुजगोष्टी केल्या. आता या कानातल्या गोष्टी आपल्या खात्याबद्दल होत्या की शिवसेना-भाजपाच्या सुरु असलेल्या
तणावाबद्दल हे मात्र गुलदस्त्यातच राहिले असले तरी या गुजगोष्टीमुळे कार्यकर्त्यांमध्ये व उपस्थितांमध्ये चर्चा रंगली.
परळी नगरपरिषदेपाठोपाठ जिल्हा परिषद व पंचायत समितीत पक्षाच्या झालेल्या पराभवामुळे पंकजा मुंडे कमालीच्या अस्वस्थ झाल्या होत्या. विशेष म्हणजे या पराभवापेक्षा धनजंय मुंडे वरचढ ठरल्यामुळे ते त्यांना जिव्हारी लागले होते. तर दादा भुसेंना सुध्दा त्यांचे राजकीय विरोधक असलेले हिरेंचे समर्थक भाजपाच्या साथीने जिंकल्यामुळे ते सुध्दा अस्वस्थ होते. पण नाशिकच्या मेळाव्यात जमलेली गर्दी बघून दोघेही समदु:खी मात्र हरखून गेले.
युतीतील तणावाबाबत बोलणे टाळले
पंकजा मुंडे व दादा भुसे यांनी जाहीर कार्यक्रमात कोणतेही राजकीय भाष्य केले नाही. त्यानंतर मुंडे यांनी पत्रकार परिषदेतही त्यावर बोलणे टाळले. पत्रकारांनी त्यांना शिवसेना- भाजपाच्या तणावाबद्दल विचारल्यानंतर त्यांनी कोअर कमिटी निर्णय घेईल. वरिष्ठ नेते बोलतील, असे सांगून वेळ मारुन नेली.
मोबाइल अॅप डाउनलोड करा आणि राहा अपडेट
