म. टा. प्रतिनिधी, नाशिक
हिंदवी स्वराज्याचे संस्थापक छत्रपती शिवाजी महाराज यांची तिथीनुसार जयंती बुधवारी शहरात जल्लोषात साजरी करण्यात आली. यावेळी शहरातील वातावरण भगवेमय झाले होते. नूतन महापौर रंजना भानसी यांच्या हस्ते मिरवणुकीला प्रारंभ झाला. यावेळी आमदार सीमा हिरे, उपमहापौर प्रथमेश ग‌िते यांच्यासह भारतीय जनता पार्टीचे पदाधिकारी मोठ्या संख्येने उपस्थित होते. यानिमित्त नाशिक शहरातून पारंपरिक मिरवणुकीचे आयोजन करण्यात आले होते.
दरवर्षीप्रमाणे नाशिक महापालिकेच्यावतीने मिरवणूक मार्गावर जय्यत तयारी करण्यात आली होती. मिरवणूक मार्गावरचे खड्डे बुजवण्यात आले होते. यावेळी विविध संस्थांच्यावतीने मिरवणुकीचे स्वागत करण्यात आले. शिवजयंतीनिमित्त शहरात सर्वत्र भगवेमय वातावरण झाले होते. युवकांमध्ये मोठ्या प्रमाणात उत्साह दिसून येत होता. अनेक युवकांनी भगवे फेटे, सलवार, झब्बा असा वेश परिधान करुन दुचाकींवर रॅली काढली.
मिरवणूक मार्गावर महापालिकेच्या वतीने पिण्याच्या पाण्याची व्यवस्था करण्यातच आली होती. तर मिरवणुकीच्या स्वागतासाठी महिलांनी जागोजागी रांगोळी काढली होती. मिरवणूक सुरू होण्याअगोदर बॉम्बशोधक व नाशक पथकाकडून मिरवणूक मार्गाची श्वानांच्या मदतीने व यंत्राच्या साहाय्याने तपासणी करण्यात आली. नवनिर्वाचित महापौर रंजना भानसी यांनी प्रथम नागरिक या नात्याने श्रीफळ वाढवून मिरवणुकीला प्रारंभ केला.
शिवछत्रपतींच्या जयंतीनिमित्त शहरात सर्वत्र उत्साहाचे वातावरण होते.भगवे झेंडे, पताका लावून परिसरात सजावट करण्यात आली होती. विविध सामाजिक, धार्मिक संघटनांसह मित्र मंडळांचे कार्यकर्ते छत्रपती शिवरायांना अभिवादन करण्यासाठी सज्ज झाले होते. दुपारी चार वाजता वाकडी बारव, जुने नाशिक परिसरातून शिवजयंतीच्या मिरवणुकीला प्रारंभ करण्यात आला.
बारा मंडळांचा सहभाग
शहीद भगतसिंग क्रांतीदल (द्वारका), स्वराज्य ग्रुप (राजीवनगर), जनता मित्रमंडळ (म्हसरूळ), साईबाबा मित्रमंडळ (अशोकस्तंभ), युवक मित्रमंडळ (मुंबईनाका), अर्जुन क्रीडा मंडळ (द्वारका), भोई समाज पंच ट्रस्ट (भोई गल्ली), शनैश्वर मित्रमंडळ (चौक मंडई), लोकप्रिय मंडळ (बुरूड गल्ली), शिवसाई मित्रमंडळ (जुने नाशिक), राम बाल मंडळ (सीतागुंफा), आत्मविश्वास व्यायाम शाळा (इंदिरानगर) या बारा मंडळांनी भद्रकाली पोलिस ठाण्यात मिरवणुकीसाठी नोंदणी केली होती.
पारंपरिक वाद्यांचा गजर
यंदाच्या मिरवणुकीत डिजेच्या वापराला बंदी असल्याने सर्वच मंडळांनी पारंपारिक वाद्यांचा आधार घेतला होता. डीजेचा मिरवणुकीत वापर करू नये, असे पोलिसांनी बजावले होते. डीजे वाजविणाऱ्या मंडळावर कडक कारवाई करण्यात येईल असा इशारा देण्यात आला होता. ध्वनिप्रदूषणमुक्त शिवजयंतीची मिरवणूक असावी, असा संदेश समाजाला द्यावा, असे आवाहन करण्यात आले होते. राज्य प्रदूषण नियंत्रण महामंडळाकडून देण्यात आलेल्या ध्वनिमापक यंत्राद्वारे पोलिस कर्मचाऱ्यांना प्रशिक्षणही देण्यात आले होते. मिरवणुकीवर पोलिस व महामंडळाचे अधिकारी लक्ष ठेवून होते.
भाजपकडून सोहळा हायजॅक
यंदाच्या मिरवणुकीत महापालिकेच्या निवडणुकीचा फिव्हर दिसून आला. या मिरवणुकीत भारतीय जनता पार्टीचे पदाधिकारी व कार्यकर्ते वगळता कोणत्याही पक्षाचे पदाधिकारी दिसले नाहीत. एरव्ही शिवसेनेचे पदाधिकारी फारसे कुणी नव्हते.
जेलरोडला वीजपुरवठा खंडित
जेलरोडला शिवजयंतीच्या कार्यक्रमादरम्यान वीजपुरवठा खंडित झाल्याने शिवप्रेमींचा हिरमोड झाला. यामुळे शिवसेनेच्या जिल्हा नेत्यांना माघारी परतावे लागले. सुमारे दीड हजार नागरिकांना अंधारात घरचा रस्ता शोधावा लागला. भाजप नेत्यांनी आपले वजन वापरून वीजपुरवठा खंडित केल्याचा आरोप सचिन मोगल यांनी केला. दरम्यान, जेलरोडला दसक स्टॉप येथे नगरसेविका मंगला आढाव व नरेंद्र आढाव यांच्या कार्यकर्त्यांत राडा झाला. यावेळी एक स्कॉर्पियोची तोडफोड करण्यात आली. पोलिसांनी दहा ते बारा कार्यकर्त्यांना ताब्यात घेतले.
नाशिकरोडला डीजेचा दणदणाट
‘जय शिवाजी, जय भवानी’ या उद्घोषासह ढोल अन् डीजेच्या दणदणाटात नाशिकरोडमध्ये बुधवारची सायंकाळ अक्षरशः न्हाऊन निघाली. सर्वपक्षीय शिवप्रेमींनी जाणता राजा छत्रपती शिवरायांना मानाचा मुजरा करण्यासाठी हजारोंच्या संख्येने हजेरी लावली. छत्रपती शिवाजी महाराजांच्या जयंतीनिमित्ताने सार्वजनिक जयंती उत्सव समिती आयोजित मिरवणूक प्रचंड उत्साहात पार पडली. बिटको चौकातून या मिरवणुकीस प्रारंभ झाला. भगवे फेटे परिधान केलेले आणि भगवे ध्वज हाती घेतलेल्या शेकडो नागरिकांनी या मिरवणुकीत सहभाग घेतल्याने संपूर्ण शहर भगवेमय झाले. शिवाजी पुतळा या मुख्य चौकात भाजप आणि शिवसेना कार्यकर्त्यांत प्रचंड चढाओढ दिसून आली. आमदार बाळासाहेब सानप, मंडलाध्यक्ष बाजीराव भागवत, लक्ष्मण सावजी, सुनील आडके, शांताराम घंटे उपस्थित होते. भाजपचे गटनेते संभाजी मोरुस्कर, नगरसेवक शरद मोरे, पंडित आवारे यांनी ढोलपथकावर ताल धरला. शिवसेनेच्या मंचावरही प्रचंड उत्साह होता. आमदार योगेश घोलप,जिल्हाप्रमुख विजय करंजकर, दत्ता गायकवाड, नगरसेविका सत्यभामा गाडेकर, सूर्यकांत लवटे, सुनीता कोठूळे, केशव पोरजे आदी सहभागी झाले होते.
मोबाइल अॅप डाउनलोड करा आणि राहा अपडेट
