म. टा. प्रतिनिधी, नाशिक
स्त्रीभ्रूण हत्या रोखण्यासाठी सरकारने सोनोग्राफी सेंटर्सवर लादलेल्या अटी जाचक ठरू लागल्याने नाशिकमध्ये काही वर्षांत तब्बल १५१ सोनोग्राफी सेंटर्स डॉक्टरांनी बंद केली आहेत. अशा सेंटर्सचे परवाने कायमस्वरूपी रद्द होणार असल्याचे संकेत जिल्हाधिकाऱ्यांनी दिले आहेत. नाशिक जिल्ह्यात दरहजारी मुलांमागे ९२५ मुलींचा जन्मदर असल्याचे धक्कादायक वास्तव समोर आले असून, सिन्नर तालुक्यात सर्वांत कमी ८४४ पर्यंत मुलींचा जन्मदर घसरला आहे. पेठसारख्या आदिवासीबहुल तालुक्यात मात्र मुलींचा जन्मदर सर्वाधिक १०३२, तर त्याखालोखाल येवला तालुक्यात ९७० एवढा आहे.
सोनोग्राफी सेंटर्स चालकांकडून गर्भलिंगनिदान चाचण्या, तसेच मुलीचा गर्भ आढळल्यास गर्भपाताचे प्रकार वाढू लागले आहेत. त्यामुळे मुलींचा जन्मदर घसरत असून, प्रशासनाची डोकेदुखी वाढली आहे. गर्भातच कळी खुडण्यास सोनोग्राफी सेंटर्स कारणीभूत ठरत असून, असे अक्षम्य गुन्हे रोखण्यासाठी सरकारही कठोर पावले उचलू लागले आहे. सोनोग्राफी सेंटरवर येणारी प्रत्येक गर्भवती महिलेची माहिती एफ फॉर्ममध्ये भरणे आवश्यक असून, ती माहिती प्रशासनाकडे सादर करणे आवश्यक आहे.
गर्भलिंग निदानासाठी येणाऱ्या महिलेकडून रेडिओलॉजिस्टला एफ फॉर्म, संमतीपत्र, जाहीरनामा भरून घ्यावा लागतो. अशा कारकूनी कामात काहीवेळा महिलेची स्वाक्षरी, तपासणीची तारीख अशा किरकोळ त्रूटी राहतात. संबंधित डॉक्टरांना दोषी धरून त्यांच्यावर सरसकट फौजदारी गुन्हा दाखल केला जातो. आरोग्य विभागाकडून होणाऱ्या त्रासाला कंटाळून अनेक डॉक्टरांनी सोनोग्राफी सेंटर्स बंद ठेवण्याचा निर्णय घेतला आहे. प्रशासनाने दिलेल्या माहितीनुसार जिल्ह्यात ६१८ नोंदणीकृत सोनोग्राफी सेंटर्स आहेत. त्यापैकी ३६७ केंद्रच कार्यान्वित असून ८४ सेंटर्स तात्पुरते तर १५१ सेंटर्स कायमस्वरुपी बंद करण्यात आले आहेत. ते सर्व महापालिका क्षेत्रातील आहेत. १० सोनोग्राफी सेंटर्सच्या बाबतीत न्यायालयीन प्रकरणांचा अडसर निर्माण झाला आहे.
एकीकडे शहरात अशी परिस्थिती असताना जिल्ह्यात मुलींचा जन्मदर ९२५ एवढा आहे. सिन्नर तालुक्यात हा जन्मदर अवघा ८४४ आढळून आल्याची जिल्हा प्रशासनाने गंभीर दखल घेतली आहे. त्याखालोखाल चांदवडमध्ये ८५८ एवढा जन्मदर आहे. जिल्ह्यातील नऊ तालुक्यांमध्ये मुलींचा जन्मदर ९२५ पेक्षा कमी आहे. सटाणा, कळवण, देवळा, मालेगाव, नांदगाव या तालुक्यांमध्ये तो ९२५ ते ९५३ या दरम्यान असून येवल्यात ९७० आणि पेठमध्ये १०३२ एवढा मुलींचा जन्मदर असल्याची माहिती प्रशासनाने दिली आहे. नाशिक शहरात हाच जन्मदर ९३५ एवढा आहे.
तालुका मुलींचा जन्मदर
सिन्नर ८४४, चांदवड ८५८, इगतपुरी ८७८, त्र्यंबकेश्वर ८८७, मालेगाव ८९९, दिंडोरी ९११, नाशिक ९२०, सुरगाणा ९२०, निफाड ९२३, सटाणा ९२९, कळवण ९३२, नाशिक शहर ९३५, नाशिक ब्लॉक ९३६, देवळा ९४६, मालेगाव शहर ९४७, मालेगाव ब्लॉक ९५३, येवला ९७०, पेठ १०३२
मोबाइल अॅप डाउनलोड करा आणि राहा अपडेट
म. टा. वृत्तसेवा, सिडको
