नाशिक ः आजची पिढी ही इंटरनेट व्हॉट्सअॅप, फेसबुक या माध्यमांमध्ये व्यस्त असून, त्यांना धार्मिक, सामाजिक प्रश्नांची जाण नाही, अशी ओरड केली जाते. मात्र, आता तरुणाईसह सर्वांनाच त्यांच्या आवडत्या माध्यमांद्वारे गुरुचरित्राच्या माध्यमातून जीवन जगण्याचे धडे देण्याकामी प्रभा आठवले यांनी पुढाकार घेतला आहे. वयाच्या ८० व्या वर्षी त्यांनी गुरुचरित्र या पोथीची वेबसाइट तयार केली असून, जगातील असंख्य यूजर्सपर्यंत ती पोहोचवली आहे. गुरुचरित्राचे मराठीत भाषांतर करून वेबसाइट बनविणाऱ्या त्या जगातील पहिल्या व्यक्ती ठरल्या आहेत.
आपल्या मुलीबरोबर आठवले या गोंदवले या ठिकाणी गेल्या असता, तेथे हाती लागलेली गुरुचरित्राची पोथी चाळून पाहताना त्यांना जाणवले, की यातील ओव्या या ४५० वर्षांपूर्वी लिहिलेल्या असून, त्या सामान्य माणसाला समजणाऱ्या नाहीत. ही पोथी कानडी लेखक गंगाधर साखरे यांनी लिहिली असून, ती सर्वांना समजेल यासाठी मराठीत असावी, अशी इच्छा त्यांच्या मनात आली. त्यांनी लगेचच कामाला सुरुवात केली आणि मराठीतील भाषांतरानंतर वेबसाईटदेखील साकारली.
७९ व्या वर्षी मराठी टायपिंगचे धडे
गुरुचरित्राचे मराठीतील लिखाण जगभरातील वाचकांपर्यंत पोहोचावे यासाठी त्यांनी वेबसाइट या माध्यमाचा प्रयोग करण्याचे ठरविले. वेबसाइट तयार करण्याची माहिती नसल्याने यातील तज्ज्ञ दीप्ती नाशिककर व भाग्यश्री केंगे यांच्याकडून माहिती घेऊन गुरुचरित्राची पहिली वेबसाइट त्यांनी www.shrigurucharitra.com या नावाने साकारली. हे करण्यासाठी आठवले वयाच्या ७९ व्या वर्षी युनिकोडमध्ये मराठी टायपिंग शिकल्या.
चार फोल्डर्सचा समावेश
गुरुचरित्राची चार फोल्डर्समध्ये वेबसाइट तयार केली असून, पहिल्या फोल्डरमध्ये गुरुचरित्र, दुसऱ्या फोल्डरमध्ये आशय असून, त्यात आधुनिक काळातील मीमांसा मांडण्यात आली आहे. तिसऱ्या फोल्डरमध्ये यातील प्रत्येक शब्दाचा अर्थ सांगितला आहे. चौथ्या फोल्डरमध्ये प्रत्येक शब्दाविषयी चर्चा करण्यात आली आहे. ही वेबसाइट लॉन्च झाल्यानंतर जगभरातून प्रतिसाद मिळाला. त्यावर उत्तमोत्तम प्रतिक्रिया आल्या. सर्वांत जास्त प्रतिक्रिया अमेरिकेतून आल्या असून, हाँगकाँग, ऑस्ट्रेलिया, जपान आदी देशांबरोबरच मध्य प्रदेश, आंध्र प्रदेश येथूनही प्रतिक्रिया आल्या आहेत.
२ अध्याय, ७४९१ ओव्यांचे भाषांतर
दोन वर्षांच्या अथक परिश्रामांनंतर ५२ अध्याय, ७ हजार ४९१ ओव्या यातील प्रत्येक शब्दाचा अर्थ लावून त्यांनी गुरुचरित्राचे मराठीत भाषांतर केले. गुरुचरित्रात जगण्याचा मंत्र दिला असून, तो सगळ्यांनी आचरणात आणावा, असे सांगण्यात आले आहे. अनेकांनी त्यांच्याकडून मराठी गुरुचरित्राच्या झेरॉक्स कॉपी घेतल्या. सोप्या भाषेत मराठी असल्याने त्याची मागणी वाढली. अनेक लोकांनी त्याचे पुस्तक करून विकावे, असा सल्लाही दिला. परंतु, मला या माध्यमातून पैसा नको, असे सांगून त्या शेकडो लोकांपर्यंत पोहोचवल्या.
ऑडिओदेखील अपलोड
गुरुचरित्र अंधांना समजावे यासाठी त्याचे ऑडिओदेखील अपलोड करण्यात आले आहे. अनेक लोक रोज एकतरी अध्याय वेबसाइटच्या माध्यमातून ऐकत आहेत. गुरुचरित्रात तुमची वागणूक कशी असावी, याचे मार्गदर्शन केले आहे. त्याप्रमाणे दत्तात्रयांनी सांगितलेले त्रिपुरा रहस्य हे मानसशास्त्र वेबसाइटच्या माध्यमातून आणण्याचा त्यांचा मानस आहे. वेबसाइट तयार करण्याचे जे काम तरुणांना येणार नाही ते काम प्रभा आठवले या सहजासहसहजी करीत आहेत.
मोबाइल अॅप डाउनलोड करा आणि राहा अपडेट