म. टा. वृत्तसेवा, धुळे
शिक्षण संस्थामध्ये नियुक्या करताना नियमांचा भंग केल्याप्रकरणी तक्रारदाराला गुन्ह्यात आरोपी करू नये, यासाठी धुळे जिल्हा माध्यमिक शिक्षणाधिकारी व उपशिक्षणाधिकारी यांनी साडेतीन लाखांची लाच मागितली होती. त्यापैकी तक्रारदाराकडून दोन लाख ३० हजार रुपयांची लाच घेताना धुळे माध्यमिक शिक्षणाधिकारी प्रवीण पाटील आणि उपशिक्षणाधिकारी किशोर पाटील यांना मंगळवारी नंदुरबार लाचलुचपत प्रतिबंधक विभागाच्या पथकाने रंगेहाथ पकडले. या दोन्ही अधिकाऱ्यांना अटक करण्यात आली आहे.
शिक्षक व शिक्षकेतर कर्मचाऱ्यांची नेमणूक, मान्यता व संबंधितांच्या आस्थापनांचे काम गेल्या तीन वर्षांपासून संबंधित तक्रारदाराकडे आहे. सन २००७ ते २०११ या कालावधीत शैक्षणिक संस्थांमध्ये कायम आरक्षित, खुल्या व इतर पदांवर नियुक्त्या करताना, संबंधित तक्रारदाराने नियमांचा भंग केला होता. याप्रकरणी चौकशी करून उपशिक्षणाधिकारी किशोर पाटील यांनी २४ फेब्रुवारीला तक्रारदाराविरुद्ध धुळे शहर पोलिस ठाण्यात गुन्हा दाखल केला होता. या गुन्ह्यात तक्रारदाराचे आरोपी म्हणून नाव न टाकण्यासाठी शिक्षणाधिकारी प्रवीण पाटील आणि उपशिक्षणाधिकारी किशोर पाटील यांनी त्याच्याकडे साडेतीन लाख रुपयांच्या लाचेची मागणी केली होती. मात्र, तडजोडीअंती दोन लाख ३० हजार रुपये देण्याचे ठरले. त्यानुसार मंगळवारी दोन्ही अधिकाऱ्यांना लाच घेताना नंदुरबार जिल्हा लाचलुचपत विभागाने रंगेहाथ अटक केली.
अधिकारी-कर्मचाऱ्यांचा काढता पाय
शिक्षणाधिकारी प्रवीण पाटील आणि उपशिक्षणाधिकारी किशोर पाटील यांना लाचलुचपत प्रतिबंधक विभागाने लाच घेताना रंगेहाथ अटक केल्यानंतर कार्यालयातील अन्य अधिकारी व कर्मचाऱ्यांनी कार्यालयातून काढता पाय घेतला. त्यानंतर काही वेळाने शिक्षणाधिकारी कार्यालयाच्या आवारात शिक्षकांनी गर्दी केली होती. अजून काही लाच घेणारे कर्मचारी व अधिकारी या कार्यालयात आहेत. त्यांच्यावरही कारवाई झाली पाहिजे, अशी चर्चा दबक्या आवाजात शिक्षकांमध्ये सुरू होती.
चांगला अधिकारी हवा
धुळ्यात आतापर्यंत कारवाई झालेले प्रवीण पाटील हे सातवे माध्यमिक शिक्षणाधिकारी आहेत. यापूर्वी जे. के. ठाकूर, जी. के. पाडवी, भगवान सूर्यवंशी, जी. एन. पाटील, डी. एल. साळुंखे आणि परचुरे अशा सहा माध्यमिक शिक्षणाधिकाऱ्यांवर कोणत्या ना कोणत्या कारणाने निलंबनाची कारवाई झाली आहे. त्यामुळे आता तरी शिक्षण विभागात प्रामाणिक अधिकारी येणे गरजेचे आहे, अशी मागणी शिक्षकांनी ‘मटा’शी बोलताना केली.
मोबाइल अॅप डाउनलोड करा आणि राहा अपडेट
