म. टा. वृत्तसेवा, पंचवटी
आदिवासी विकास विभागासमोर अनेक आव्हाने आहेत. ती स्वीकारून आदिवासींना विकासाकडे नेण्यासाठी सेवाभावी लोकांचे आणि संस्थांचे सहकार्य मिळत आहे. त्यांच्या सूचनांनुसार आदिवासी विकास काम करीत राहणार आहे. आदिवासी सक्षम होण्यासाठी त्यांच्यासाठी असलेल्या योजना लाभार्थींपर्यंत पोहोचविण्याचे काम प्राधान्याने करण्यात येईल, असे प्रतिपादन आदिवासी विकासमंत्री विष्णू सावरा यांनी केले. आदिवासी विकास विभागातर्फे २०१५-१६ व २०१६-१७ या दोन वर्षांच्या आदिवासी सेवक व सेवा संस्था पुरस्कार वितरण समारंभात ते बोलत होते.
महाकवी कालिदास कलामंदिर येथे झालेल्या समारंभास ग्रामविकास राज्यमंत्री दादा भुसे, महापौर रंजना भानसी, आमदार निर्मला गावित, जे. पी. गावित, आदिवासी विकास विभागाचे आयुक्त राजीव जाधव, सचिव मनीषा वर्मा, आंतरराष्ट्रीय धावपटू कविता राऊत, किसन तडवी आदी उपस्थित होते. मंत्री सावरा म्हणाले, की आदिवासींच्या विकासासाठी अनेक योजना असल्या, तरी त्यांचा विकास झालेला नाही. यंदापासून २५ हजार विद्यार्थ्यांना नामांकित शाळेत प्रवेश देण्याचा निर्णय घेण्यात आला, त्याचा आदिवासी विद्यार्थ्यांना लाभ मिळाला. वसतिगृहात प्रवेश मिळत नसलेले आदिवासी विद्यार्थी स्वतंत्र खोली घेऊन राहत असतील, तर त्यांना राहण्याचा खर्च शासनातर्फे देण्यात येईल, असेही त्यांनी स्पष्ट केले.
‘विकासाआड लांडगे’
ग्रामविकास राज्यमंत्री दादा भुसे यांनी आपल्या छोट्याशा भाषणात मंत्रालयातील आदिवासी विभागात कार्यरत बाबूशाहीवर तीव्र टीका केली. राज्य सरकार आदिवासींच्या विकासासाठी भरपूर योजना तयार करते. हे पुरणपोळीचे ताट आदिवासी मंत्रालयात तयार होते. परंतु, प्रत्यक्षात आदिवासींपर्यंत पोहोचत नाही. काही लांडगे मध्येच ते पुरणपोळीचे ताट गिळंकृत करतात, असा टोला मारत त्यांनी मंत्रालयातील लालफितीचा कारभार व भ्रष्ट कारभारावर तीव्र टीका केली. आदिवासींच्या विकासासाठी आपण प्रयत्न करू, असे आश्वासनही त्यांनी दिले.
कविता राऊतला देणार संधी
आंतरराष्ट्रीय धावपटू कविता राऊत हिला आदिवासी विकास विभागात सेवेची संधी मिळण्यासाठी मुख्यमंत्र्यांकडे पाठपुरावा करावा, अशी मागणी ग्रामविकास राज्यमंत्री दादा भुसे यांनी केली. आदिवासी विकासमंत्री सावरा यांनी त्यांच्या भाषणात कविताला कामाची संधी देण्यात येणार आहे. याविषयीचा प्रस्ताव मुख्यमंत्र्यांना देण्यात आलेला आहे. अशा प्रकारच्या संधीमुळे क्रीडा क्षेत्रात येणाऱ्या क्रीडापटूंना प्रोत्साहन मिळणार असल्याचे सांगितले.
आदिवासी सेवक पुरस्कारार्थी
प्रमोद गायकवाड (नाशिक), रमेश रावले (कळवण, नाशिक), बापूराव साळवे (पिंपळगाव, अहमदनगर), डॉ. कांतिलाल टाटिया (शहादा, नंदुरबार), सरस्वती भोये (विक्रमगड, पालघर), लक्ष्मण डोके (जव्हार, पालघर), हरेश्वर वनगा (डहाणू, पालघर), मनोहर पादिर (कर्जत, रायगड), रामेश्वर नरे (महाड, रायगड), भगवान देशमुख (नांदेड), पूर्णिमा उपाध्ये (गारखेडा, अमरावती), सुनील देशपांडे (लवादा, अमरावती), सदाशिव घोटेकर (सरपधरी, यवतमाळ), सुखदेव नवले (कारकीन, औरंगाबाद), प्रमोद पिंपरे (गडचिरोली) या आदिवासी सेवकांना २५ हजार रुपये, सन्मानपत्र व शाल देऊन सन्मानित करण्यात आले.
पुरस्कारार्थी आदिवासी सेवा संस्था
शाश्वत संस्था, मंचर, जि. पुणे, विवेक रुरल डेव्हलपमेंट सेंटर संचालित राष्ट्र सेवा समिती, ग्रामविकास केंद्र, वसई, जि. पालघर, डॉ. हेगडेवार सेवा समिती, नंदुरबार, आम्ही आमच्या आरोग्यासाठी, कुरखेडा, जि. गडचिरोली, वनवासी कल्याण आश्रम, महाराष्ट्र प्रदेश, सुयश चॅरिटेबल ट्रस्ट, पुणे, महाराष्ट्र एज्युकेशन सोसायटी संचालित राणी लक्ष्मीबाई मुलींची सैनिकी शाळा, कासार आंबिवली, ता. मुळाशी, जि. पुणे या संस्थांना ५० हजार रुपये, सन्मानपत्र व शाल देऊन सन्मानित करण्यात आले.
आयुक्तच आदिवासी सेवक
आदिवासी विभागाचे आयुक्त राजीव जाधव यांनी आयुक्तपद बाजूला ठेवून आदिवासी सेवकाची भूमिका निभावली. विभागातील इतर अधिकारी ऐटीत बसले असताना जाधव यांनी मात्र प्रोटोकॉल बाजूला ठेवून पुरस्कार वितरण सोहळ्याचे नियोजन केले. पुरस्कारार्थींना स्टेजवर कसे आणायचे इथपासून तर पुरस्कारार्थींना दिले जाणारे शाल, श्रीफळ आणि सन्मानचिन्ह स्वतः हातात घेऊन ते नेत्यांच्या हातात देण्याचे काम त्यांनी केले. पुरस्कारार्थींना व्यासपीठावरून खाली उतरण्याचाही मार्गदर्शनाचे कामही त्यांनीच केले. त्यांनी थेट कार्यकर्त्याचीच भूमिका निभावल्याने जाधवच आदिवासी सेवक झाल्याची चर्चा रंगली होती.
मोबाइल अॅप डाउनलोड करा आणि राहा अपडेट
