सिन्नर तालुक्यातील शिवडे येथील शेतकऱ्यांनी समृद्धी महामार्गाच्या मोजणीसाठी विरोध कायम ठेवला आहे. अधिकाऱ्यांनी शनिवारी शेतकऱ्यांशी संवाद साधला. जमिनीला प्रतिगुंठा सात लाख रुपये भाव, कुटुंबातील एका सदस्याला सरकारी नोकरी, ज्येष्ठांना पेन्शनसह विविध मागण्या करण्यात आल्या. जिल्हाधिकारी आणि सरकारने लेखी आश्वासन दिले तरच मोजणी करू देऊ, असा पवित्रा शेतकऱ्यांनी घेतल्याने शनिवारी मोजणी होऊ शकली नाही.
समृद्धी महामार्ग या राज्य सरकारच्या महत्त्वाकांक्षी प्रकल्पात सिन्नर आणि इगतपुरी तालुक्यातील शेतकऱ्यांच्या जमिनी जात आहेत. या जमिनींच्या सर्वेक्षणात अडथळे येऊ लागल्याने प्रशासनाने पोलिस बंदोबस्तात हे काम सुरू केले आहे. इगतपुरी येथील शेतजमिनींचे सर्वेक्षण गुरुवारी पूर्ण झाले. त्यामुळे प्रशासनाने आता मोजणीसाठी सिन्नर तालुक्याकडे आपला मोर्चा वळविला आहे. मोजणी करण्यासाठी अधिकारी कर्मचाऱ्यांचे पथक शुक्रवारी शिवडे गावात पोहोचले. मात्र, शेतकऱ्यांनी रस्त्यावर टायर जाळून या मोजणीला तीव्र विरोध केला. त्यामुळे मोजणी होऊ शकली नाही. रविवारी पुन्हा शेतकऱ्यांची मनधरणी करून मोजणीला सुरुवात करण्यासाठी अधिकारी शिवडे गावात पोहोचले. तेथे शिवडे, घोरवड गावातील शेतकरी मोठ्या संख्येने उपस्थित होते. मात्र, शेतकऱ्यांचा विरोध आजही कायम राहिला. आमच्या जमिनी बागायती असून, त्यामध्ये आम्ही बाराही महिने पीक घेतो. त्यामुळे त्यांची कोणतीही किंमत होऊ शकत नाही. तरीही वाटाघाटीची वेळ आलीच तर जमिनींना योग्य मोबदला मिळायला हवा, असा पवित्रा शेतकऱ्यांनी स्वीकारला आहे. जमिनी देण्याची तयारी शेतकऱ्यांनी दर्शविली असली तरी त्यांना मागण्यांच्या पूर्ततेची लेखी हमी हवी आहे.
शेतीमधील पिकास योग्य मोबदला मिळावा, शेतीमधील झाडे, विहिरी, बोअर, पाइपलाइन, शेडनेट, फळबागा यांच्या योग्य मोबदल्याची मागणी शेतकऱ्यांनी अधिकाऱ्यांकडे केली. प्रकल्पात विहिरी जाणार असल्याने बारमाही पिण्याच्या पाण्याची व्यवस्था करावी, बाधित शेतकऱ्यांच्या मुलांना शिक्षणाप्रमाणे सरकारी नोकरी मिळावी, ठरेल ती रक्कम काम सुरू करण्यापूर्वी एकरकमी मिळावी, बाधित शेतकऱ्यांच्या आईवडिलांना किमान १० हजार रुपये पेन्शन दरमहा मिळावी, अशा मागण्या करण्यात आल्या आहेत. याबाबतचे लेखी आश्वासन जिल्हाधिकारी, तसेच मुख्यमंत्र्यांनी द्यावे, अशी शेतकऱ्यांची मागणी आहे. बळाचा वापर करून मोजणी करण्याचा प्रयत्न केल्यास होणाऱ्या परिणामांना पोलिस, प्रशासन आणि सरकार जबाबदार राहील, असा इशाराही शेतकऱ्यांनी दिला आहे.
शिवडे गावात तणाव कायम
शिवडे गावात शनिवारीदेखील तणावपूर्ण वातावरण होते. मंदिरात प्रांत, तहसीलदारांनी काही शेतकऱ्यांशी चर्चा केली. मात्र, अधिकारी मोजणीला येतील या धास्तीने त्यांचे कुटुंबीय शेतातच बसून होते. पोलिसांनी शनिवारी मध्यरात्री तीन वाजता शेतकऱ्यांना सोडल्याबद्दल शेतकऱ्यांमध्ये तीव्र नाराजी आहे. येथे शनिवारीदेखील रुग्णवाहिका, राज्य राखीव दल हजर होते.
मोबाइल अॅप डाउनलोड करा आणि राहा अपडेट
