बाबरी मशिदीचा ढाचा पडला त्यावेळी जे. पी. जाधव यांच्या मनात एकच काहूर माजलं. या कालावधीत अनेक ठिकाणी जातीय दंगली सुरू झाल्या. माणसं माणसाशी अशी का वागतात, या विचारांनी त्यांना भंडावून सोडलं. दंगलींसंदर्भात येणाऱ्या वर्तमानपत्रांतील बातम्या वाचून त्यांचे मन विषण्ण झाले. यासंदर्भात आपण काहीतरी केले पाहिजे, असा विचार त्यांच्या मनात आला आणि मग भारतीय एकात्मता समितीच्या कामाला त्यांनी सुरुवात केली. या संस्थेच्या माध्यमातून धर्मा-धर्मांत जातीय सलोखा, बंधुभाव कसा राहील यासाठी त्यांनी विशेष प्रयत्न केले. आज वयाच्या सत्तरीतही त्यांचे कार्य अविरत सुरू असून, भारतीय एकात्मता समिती आणि जे. पी. जाधव हे एक अतूट समीकरण झाले आहे.
जे. पी. जाधव यांचा जन्म मालेगाव जिल्ह्यात झाला. वडील सरकारी नोकरीत असल्याने नाशिक जिल्ह्यातील मालेगाव, येवला, नांदगाव अशा बदल्यांच्या ठिकाणी प्राथमिक शिक्षण पार पडले. लहान काका मुंबईला असल्याने उच्च शिक्षणासाठी वडिलांनी त्यांच्याकडे पाठ‍विले. बी.एस्सी.पर्यंत शिक्षण झाल्यानंतर त्यांना मालेगाव येथे शिक्षकाची नोकरी लागली. मात्र, या नोकरीत ते फारसे रमले नाहीत. त्यांनी गव्हाचा व्यवसाय सुरू केला. यादरम्यान वेळ मिळत असल्याने काही ना काही सामाजिक उपक्रम राबविण्यास सुरुवात केली. स्वतःच्या खिशात पैसा नव्हता. मात्र, समाजसेवा करण्याची धडपड पाहून अनेकांनी त्यांच्या कार्याला हात दिला. स्थानिक वर्तमानपत्रात एका मोठ्या ट्रान्सपोर्ट कंपनीत जागा भरायच्या असल्याची जाहिरात वाचायला मिळाली. तेथे त्यांनी अर्ज केल्यावर त्यांना लगेचच रुजू करून घेण्यात आले. पुढे अनेक वर्षे या व्यवसायात ते होते. १९९२ पासून त्यांनी स्वतःच्या ट्रान्सपोर्ट व्यवसायास प्रारंभ केला. तेव्हापासून ते या व्यवसायात आजही कार्यरत आहेत. घरातील जबाबदाऱ्या पार पडल्यानंतर समाजकार्याला खऱ्या अर्थाने जोर आला. भारतीय एकात्मता समितीत काम करीत असल्याने २६ जानेवारी, १५ ऑगस्ट रोजी लहान मुलांमध्ये एकात्मतेची भावना रुजावी यासाठी त्यांनी सांस्कृतिक कार्यक्रमांची मुहूर्तमेढ रोवली. त्याचप्रमाणे बैसाखीच्या काळात शहरातील गुरुद्वारांमध्ये जाऊन तेथे कार्यक्रम सुरू केले. रमजान ईदच्या दिवशी गोल्फ क्लब येथे येणाऱ्या मुस्लिम बांधवांना शुभेच्छा देण्याची प्रथा सुरू केली. बाबरी मशीद ज्यावेळी पाडली गेली त्यावेळी शहरातील वातावरण कलुषित झाले होते. अशा वेळी त्यांनी सर्वधर्मीयांची मानवी साखळी तयार करून एक आदर्श समाजापुढे निर्माण केला. ही साखळी नाशिक शहरातील अशोक स्तंभ ते मुंबई नाका इतक्या मोठ्या अंतराची होती. शहरापासून दूर असलेल्या क्षेत्रात उल्लेखनीय कार्य करणाऱ्या कार्यकर्त्यांचा नाताळच्या कालावधीत सत्कार घडवून आणला. ज्या महिलांनी त्यांच्या कर्तृत्वाने समाजाला वेगळी दिशा दाखवली, अशा महिलांचादेखील दर वर्षी सत्कार करीत असतात. शहरातील अनेक मुस्लिम वस्त्यांमध्ये जाऊन मोतीबिंदू शिबिरे घेतली असून, दोन हजारांच्या वर ऑपरेशन्स त्याद्वारे केली गेली आहेत. याला लागणार सर्व खर्च भारतीय एकात्मता समिती करीत असते. त्याचप्रमाणे आंतरजातीय विवाह केलेल्या जोडप्यांच्या सत्काराचेदेखील सातत्याने आयोजन करीत असतात. मुलांमध्ये एकात्मतेचे बीज रोवल्यास येणारी पिढी अधिक सक्षम होईल, असे ते म्हणतात. या कामाव्यतिरिक्त त्यांनी जेसीज्, जायंट्स ग्रुप, लायन्स क्लब यांसारख्या संस्थांच्या माध्यमातून काम केले आहे. त्याचप्रमाणे कॉलेजरोडवरील निरामय जॉगिंग ट्रॅकचे ते अध्यक्ष असून, आजपर्यंत लाखो रुपये महापालिकेकडून मिळवून अनेक सुधारणा केल्या आहेत. नाशिक शहरात एकात्मता भवन असावे यासाठी त्यांनी खूप प्रयत्न केले. परंतु, त्याला यश आलेले नाही. जे सरकार एकीकडे राष्ट्रीय एकात्मतेच्या गोष्टी करीत होते, त्याच्या प्रचारासाठी कोट्यवधी रुपये खर्च करीत होते, त्याच सरकारच्या काळात मान्यता मिळवण्यासाठी सरकारी बाबूंकडून पैशाची मागणी करण्यात आली. त्यामुळे एकात्मता भवन उभे राहू शकले नाही, ही खंत त्यांच्या मनात घर करून राहिली आहे. ज्या दिवशी शाळेच्या दाखल्यावरून जात आणि धर्म जाईल तो दिवस माझ्यासाठी भाग्याचा असेल, असे ते सांगतात.
नाशिककरांनो, लिहिते व्हा!
ज्येष्ठ नागरिक म्हटले, की वयाचा उत्तरार्ध आणि त्यामुळे कमी झालेला अॅक्टिव्हनेस असा बऱ्याच जणांचा समज असतो. पण, अनेक ज्येष्ठ हे केवळ वयाने वृद्ध असतात, त्यांचे मन मात्र तरुणच असते. त्यांच्या कामातून, समाजसेवेतून किंवा अन्य अॅक्टिव्हिटीजमधून ते आपण अजूनही तरुण आहोत हे दाखवून देतात. अशाच ज्येष्ठांसाठीचे हे व्यासपीठ म्हणजे आमचा ‘यंग सीनिअर्स’ कॉलम. चला तर मग, तुम्ही जर असे यंग सीनिअर असाल, तर थेट आमच्याशी संपर्क करा किंवा तुमच्या ओळखीत, पाहण्यात असे कोणी असेल, तर त्यांचे नाव सुचवा. योग्य व्यक्तींना या सदरातून नक्कीच प्रसिद्धी दिली जाईल.
आमचा पत्ता : महाराष्ट्र टाइम्स, अल्फा स्क्वेअर बिल्डिंग, तिसरा मजला, डिसुझा कॉलनी, कॉलेजरोड, नाशिक.
समन्वय : फणिंद्र मंडलिक- ९४२३१७४४९५.
ई-मेल : fanindra.mandlik@timesgroup.com
(पाकीट आणि ई-मेलवर ‘यंग सीनिअर्स’ उल्लेख करावा.)
मोबाइल अॅप डाउनलोड करा आणि राहा अपडेट
